昨夜星辰恰似你: 8 .

放學。

終於到星期五，終於可以打機打通宵。

以前嘅我會好渴望早啲放學，想學校無限放假。

但係宜加，唔知點解我好想早啲翻學，甚至係唔放假。

「黃思，等等」





黃思係門口停咗停，擰轉頭望一望我。

「做咩」

「我想問你個問題」

我同佢坐咗係課室，傾咗好耐。

話題全部都離唔開鄭梓熙。





「你知唔知⋯佢同邊個拍過拖」

黃思沉默。

幾分鐘之後佢終於開口。

「你都識嘅。不過呢啲野你最好問翻佢本人啦」黃思開始執野，好似打算走。

我識？我個心入面，第一個就浮現咗唐誠嘅名，但係同佢做咗咁耐兄弟，都無聽佢提過感情事。





佢見我諗咗咁耐。

「你係咪鍾意梓熙啊」佢抬住頭望住我

「...」

「點先算係鍾意一個人」我望住黃思，好認真咁問

「眼入面淨係得佢一個，見唔到其他任何野。」

黃思都一直望住我。

我係佢眼入面，好清楚見到我自己。有一刻，我真係以為佢鍾意我。

「你唔係以為我鍾意你啊」佢突然坐直翻。





「你點會啊」我彈咗一下佢額頭。

佢笑咗笑，無講野，孭起個書包就出咗門口。

-

翻到屋企，第一時間就係開電腦瘋狂LOL。

「叮！」又係鄭梓熙sd野嚟

掛住同佢傾，傾到俾人殺咗都唔知。

「肥東來電」





「喂？」

「屌你老母，專心打機啦，待乜撚野機啊」

「得啦得啦」講完就cut咗佢線。

後來我一於就退出咗個game，瞓咗落床同鄭梓𤋮傾計。

我同佢乜都傾一餐，由小至大，由遠至近。

「你仲唔瞓XD」上午3:04

「等你瞓咗先瞓」上午3:04

「白癡仔」上午3:04





可能太眼訓，鎖咗屏就可以瞓著。

但係當「叮」一聲，我無論幾眼瞓都會開鎖覆咗先。

因為我唔想錯過佢任何一條訊息。

-
以前我地鍾意一個人，總會無時無刻拎住手機，每分鐘都打手機睇「佢」有冇搵自己，等待嘅過程入面，即使一分鐘都好似過咗一年咁耐。