那年，我在補習社遇上她..: 第二十二章 聯歡會

排緊隊果陣，原來仆佳都係到，點解佢冇啦啦會補習？至今都係一個迷，佢行過黎同我細細聲講：「陣間補完門口等」
 
其實我都知咩料架啦，咪又係我同兩個女仔啲野…
 
過左個半鐘，岩岩好補完
 
「crystal呀，你自己翻屋企先啦，我有野要同仆佳斟呀」
 
「吓，你隻腳咁樣得唔得架」
 


「得啦，仆佳會送我翻去架嘛」我講
 
「咁好啦，你翻到去記得打電話比我呀，死蠢」
 
「知啦」
 
之後同crystal講完拜拜之後，我又見到angela…佢今次明明見到我…但係就扮唔識我，同佢班frd直行直過。係咪因為佢見到我同crystal?算啦，我係佢心目中可能一啲地位都冇..
 
對唔住..angela…我都好辛苦...
 


仆佳一見到我，拉實我隻手，帶我去到佢屋企附近吹水
 
「喂，其實你想點姐，之前又口口聲聲話中意angela，依家又同crystal一齊」
 
「屌，你估我唔想同angela一齊架？仆街，我點夠佢班frd爭呀？唔好講我個身高，人地band 1中，成績閒閒地都好過我地幾條街啦，要揀都唔撚會揀我」
 
「所以你為左拍拖，就同crystal一齊？」佢問
 
「係…我好似當左佢係水泡…」
 


之後，我地靜左一陣。大概，我地仲係懵懂無知，對處理感情方面真係一竅不通..
 
「其實你覺唔覺得自己好濕尻？你對人冇feel就唔好拖唔耐啦，為拍而拍」仆佳咁同我講
 
我支吾以對..
 
同左仆佳吹左陣水，隊左罐啤酒之後就返左屋企。
 
或者，酒精對我黎講係逃避現實嘅最好辦法。迷迷糊糊，將我嘅空虛感一併揮發。
 
返到屋企，原來已經11點幾，原來crystal打左6個電話比我，仲不停炸我機問我係邊。
 
「喂，我返到屋企啦」我打翻電話同crystal講
 
「衰人，睇少你一陣就咁，你知唔知我幾擔心你呀，你知你自己隻腳啦」


 
「sorry呀，我以後唔會架啦，我應承你啦，我以後聽曬你話」我咁同crystal講..
 
「算你乖啦」於是，我地就咁樣傾左成晚。
 
之後啲日子都冇乜特別，補習一樣見到angela同佢班仔，而我就見到仆佳同肥民一齊。
 
每次補完習之後，我都有股衝動想snapchat又或者係wts angela…
 
真正中意一個人係咩感覺？我會答你如果你真係中意一個女仔，你見到佢同其他男仔一齊果陣你會呷醋，你會不停諗佢同果幾個男仔係咩關係；你個心每次見佢都會七上八落，忐忑不安…有時即使你係ig唔覺意睇到佢嘅post，你都會即刻面紅耳赤…
 
Angela…你又知唔知我次次見到你都會咁…我真係好中意你…
 
話咁快又到左聖誕節，學校一定會搞啲聖誕聯歡會咁，啲老師都唔會理我地，個個由得我地癲。
 


聖誕聯歡會呢日特別凍，我諗應該15度都冇…
 
我隻腳其實仲未好翻曬，畢竟韌帶撕裂，起碼要抖足半年，所以，我冇同肥民，仆佳果班一齊玩running man，反而我係去左crystal果班入面邊佢hea。望著高佬俊個契弟去隔離班拖著班花Kitty隻手，係條走廊行，佢地幸福滿溢嘅笑容，我幾希望係你—angela黎陪我一齊過….
 
「做咩你隻手咁凍架？學人懶壯咁著件冷衫就算，陣間病嘅話點算」crystal冇啦啦捉著我隻手問
 
「我專登比機會你做我暖包架」我借啲意捉著crystal隻手
 
「冇人想做你暖包wo」講完之後，佢成個人挨落我個身到..
 
傻妹…我唔值得你咁愛我
 
「係wo，平安夜我地去邊到玩呀?」crystal咁問我。
 
其實我靜係想同angela一齊..


 
「我冇所謂呀，你話事啦」我咁講。應該話其實我根本唔重視crystal，所以連諗都唔想諗..
 
「都估到你會咁講架啦，我養嘅豬咁蠢。嗱，晏就就去長洲一日遊，之後呢我地就翻去中環睇燈飾啦」佢咁講。
 
「好啦」我咁講..
 
我真係愈黎愈仆街…

angela...我真係好中意你...
 
之後我比仆佳同拉左出走廊…原來佢岩岩坐左係crystal隔離，乜都聽到曬...

ps 係到同各位讀者道個歉先，因為小弟近排比較忙，可能未必一日出到一篇，但係最遲3日一定嘔到一篇出黎，去到八月就可能比較得閒。同埋多謝你地咁支持我，你地每一個cm我都有用心去咀嚼。放心，一定唔會爛尾的。多謝曬你地 :)