那年，我在補習社遇上她..: 第三十五章 前夕

考試果兩個禮拜冇咩特別，有時我又約下crystal，佢又約下我咁..

至於angela…唉…我真係唔知佢想點…

一時又可以同我連續wts 3 4個鐘，仲要唔係普通傾計，而係大部分都係曖昧嘅對話，好似情侶調情咁..

一時又可以藍剔我..

真係好陌生，好陌生..好似兩個完全唔同嘅人咁…



慶幸嘅係，就算佢點藍剔我都好，佢snapchat都會keep著同我儲火…一時又影下佢食嘅野，一時又影下風景咁…

我諗，呢個應該係snapchat唯一嘅好處…..

「喂，你點姐其實，你識左個angela都差唔多成年啦，依家六月中啦大佬，點解你同佢一啲進展都冇？」高佬俊係考試最後果一日問我

「屌，我都唔知呀，佢對我忽冷忽熱咁..同佢出街都唔知會唔會deadair，淆淆地呀」我講

「屌，淆乜春呀，出街睇戲，食餐飯姐，到時佢比第二條友溝左你唔好後悔呀」高佬俊講



係wo…點解我一直冇諗過呢個問題..angela條件咁好…一定大把人好似我咁溝緊佢

我唔敢諗如果依家佢有男朋友會點…

唔知你地有冇試過去想像一啲野，一啲你唔敢去面對嘅野…

你心入面愈諗就愈亂..你會好想盡一切代價去阻止呢樣野發生..

但係去到最後，重整完思緒，你就會發現你所擁有嘅力量根本就微小得不值一提..



你內心就會漸漸比堅不可摧嘅現實同無情嘅無力感慢慢侵蝕，最後變成一個失去本心嘅行屍走肉。
即使我知道..我知道自己一定要做啲野..

仲好記得…自己同自己承諾過話唔再懦弱，唔再去錯過一啲事，一啲人..

但係撫心自問，面對自己中意嘅人，緊張同不安已經將我吞蝕得體無完膚..

「時間到，請停筆」

終於，考完。

我問一問自己..唔得，我唔可以再沉淪係恐懼入面，我一定要打破呢片隔膜

「不甘命由天定，就要出擊打破宿命」腦海入面縈繞著yy上堂嘅呢句



沒錯，我唔高，唔靚仔，唔大隻，唔通我呢一世就要活係既定嘅宿命之下？我唔甘心..我要打破佢

「你幾時考完試😛」我wts angela

單剔..佢應該仲考緊試..

翻到屋企，快快手手食左啲野就著左對kobe打波..

望著kobe上面仲有我之前為crystal寫上嘅1314…

Crystal真係好好…我考試有咩唔識佢一定答到我好仔細，好詳盡…

「叮！」

「我呢個禮拜考完😛」原來係angela覆我



「你邊日得閒😳出唔出黎睇戲」我問

「🤔等我check下schedule先」

小姐，試都考完你仲有咩做..

「😢好啦」

「正喊包黎🙁成日都喊」angela講

「唓😕😕😕」

我唔知應該點覆..應該係話..我唔想去覆



跌跌宕宕嘅關係對我黎講已經習以為常..

「我不願讓你一個人..」望一望電話，係crystal打黎..

「喂，死蠢，你陣間有冇野做」crystal問

「冇呀，做咩呀？想約我呀」我講笑咁講

「係呀..陣間…」

「咁得啦，我陣間3點黎你樓下接你啦」佢未講完已經比我打斷左

「好啦，唔好遲到wo」

「得啦，仲煩過我阿媽」我講



待續...