那年，我在補習社遇上她..: Pre-Finale

「其實我冇諗過大家會發揮得咁好，大家拎到殿軍，亦都證明左呢幾個月嘅特訓唔係無用。今日餐飯我嘅！」李sir完場嘅時候同我地講

最後我地決定—打邊爐

望著成班人聚首一堂，Hugo同crystal一齊，高佬俊又同kitty一齊，10幾個人一齊拎著汽水個玻璃杯互相乾杯，熱鬧嘅氣氛為漆黑嘅晚上點綴左一翻嘅色彩

「喂屌，你做乜撚呀」
「屌，打邊爐係咁架啦」
「用筷子拎魚蛋姐，我阿媽都識啦」



我一直浸淫係一片吵雜嘅環境，好好咁享受緊呢一分，呢一秒

只係—心入面嘅結一直都未能解開，係眾人觥籌交錯之間更加相形見絀，心入面嘅疑惑不停湧現係腦海入面

亦都提示著我，係時候要做翻啲野

「😭對唔著呀，我靜係拎到第四咋」我wts angela

縱然換黎嘅只有早剔，盡人事，盡天命，我暗忖，踏出左第一步，心結好似又被解鬆左。



睇到我地籃球隊嘅wts群組，見到原來有攝影師幫我地影左相

當然，我毫不猶豫就down左落黎

一打開instagram⋯⋯⋯⋯



「喂你知唔知學界馬拉松遲咗打，好似因為話有颱風，變咗做7月24號」高佬俊同我講



「係咩」我答

「屌你可唔可以唔好成日咁呀，你係唔係仲返煩緊果個angela呀」高佬俊講

「我…我唔知」我答

「好心你啦鍾意人又唔敢同人講，有啲嘢錯過左就真係冇架啦」佢講

「死蠢，你幾時比賽呀？🙊」angela wts我

「我應該24號打😛你黎睇我呀？😍」

「24號我好似約左人😢，不過唔緊要啦，我心靈上支持你🙊」

「好啦😢😢😢😢」



颱風過後帶來嘅潮濕溽熱，總令人希望落一場沁人心霏嘅雨，我已經分唔清楚我頭上冒緊嘅係普通嘅汗，抑或係由比賽所引發嘅緊張而出嘅冷汗

「加油呀☺🙈等你好消息😍」angela wts我

我冇理到佢，我想趁呢段時間調整我自己嘅心情

經過一番龍爭虎鬥，我地學校入左四強賽，當然，有大程度都係靠運氣

體育館內五光十色，各學校嘅錦旗都被場內嘅燈光渲染得美輪美奐

司儀介紹完各隊球員，每個人都如箭在弦，唯獨係我-仲記掛緊angela

呢個心結其實一早就蟄伏係我個心入面，由我同crystal分手一刻開始



仲好記得佢係遊學團果陣，佢sd左一個心比我，令我心入面嘅結好似鬆解左一小刻，但係回頭諗諗，如果佢真係對我有感覺，點解我約佢果時佢會一推再推？心入面嘅結又綁緊左好多….究竟佢對我嘅感覺係點？

我唔清楚。

「喂，阿希！接波呀！」就係電光火石之間，高佬俊拎左個籃板，正朝著我個方向傳

無錯，既然angela一直以黎都肯同我維持曖昧嘅關係，哪怕佢真係收我做兵？我諗，至少我一直對佢嘅真心，真意都會打動到佢

呢場比賽，許勝不許敗，我要比angela知，我為左佢可以去到佢盡，為左佢，我一定要擇下一面獎牌

「咇咇—咇」

曲終，終究人散

任憑我地再努力都好，我地終究唔可以打破宿命，贏翻一次傳統名校..



體育館落下帷幕，象徵著一段嘅比賽完結

如果可以，我都想將我嘅情感一直封存係呢塊帷幕嘅後面，成為一個冇情感，冇感覺嘅人…畢竟—



打開instagram⋯



首入眼簾嘅就係—Angela同佢男朋友嘅合照

我個心恍似被裝左鉛塊咁，一路下沉至等噚線幾萬米之下



突如其來嘅消息，教我只懂佇立在一角

點解我咁肯定係男朋友？因為個caption係係5201314❤️

曲終，終究人散，不論係岩岩經歷過嘅學界馬拉松，定係人生每一件嘅軼事，呢個，係永恆不變嘅定律

只係，只係我唔甘心係我未同angela開始演奏我地嘅樂曲時，呢段樂曲就已經胎死腹中

我明白，我明白的

我條件唔好，唔夠人高，唔夠人大，更遑論給予安全感比佢

佢選擇左呢個男仔，都係人之常情。

我低下頭來，流了兩行淚水

心中嘅結依不停地拉扯，剪不斷，理還亂

眼前一眾隊友嘅觥籌交錯，我輕輕拋下200蚊係枱，同一句「我有事走先」就獨自歸去

黑夜，呢一夜對於我黎講特別空虛，特別可怕

一邊行一邊諗，回憶，恍如打翻左嘅糖果盒，橘紅瓜綠咁湧瀉出黎，我同佢whatsapp snapchat嘅對話言猶在耳..

「死蠢❤️」

我諗，以後佢都會照講呢一句，只係—只係佢唔係對我講

心入面苦笑左一聲，我停止再繼續向前行

海風無情地拍打著我弱小嘅臉龐，彷彿揶揄著我呢個失敗者

倘若當初我可以勇敢地面對自己對佢嘅感覺；倘若我冇一直逃避，一直退縮，我地，會唔會有一個故事？

坐係海旁一方長椅上，望著人群面面笑靨，我彷彿係一個錯配嘅人，錯配在呢個咁歡樂嘅場地之中。


心坎完完全全被一種名叫孤獨嘅情緒所吞噬，光，被寂寞嘅黑夜淹沒，無法溫暖我失落謐靜嘅心房。

黑夜過後，會有黎明嗎？

我諗，我心坎入面嘅呢個死結，根本永遠都解唔開

大概，在感情嘅大千世界入面，並無經濟學中理想嘅「潛在產出Yf」，無論我如何調整，如何在這感情世界入面增加，減少SRAS，都無可能令呢段昔日輓歌重回Yf水平。

為左angela，我付出左幾多？又有邊個可以明瞭？

我明白，有時即使付出，亦都可以一無所有。現實，就係咁殘酷。

只係，只係，我尚未習慣呢個如此恐怖嘅事實⋯

儼如一把鋒利無比嘅刀，將我嘅心房、心室，甚至係整個人，割下一片一片薄如紙的肉片落黎，令我個心，慢慢凋零⋯

眼見海旁每一對情侶手牽著手，彷彿編織著屬於佢地嘅將來

而我，就連將自己嘅情感一直封存係呢塊帷幕嘅後面，成為一個冇情感，冇感覺嘅人都做唔到；連屬於自己嘅情感都控制不到，更談何去編織未來？

熱鬧過後，我卻感到失落；心結，彷彿終世也解不開。

只想去為你 完成時光機器
人人能超越時間生死

如果有時光機，我會翻返去一年前，岩岩好365日前，去重新認識、了解你

子彈鋪滿地 為求情敵撤離
部署戰爭奮勇地尋找轉機

如果有時光機，我一定會翻返去最初，唔再自己放棄自己；我一定會鼓氣勇氣，好好咁愛惜你

天天公開捍衛你 不再逃避

如果有時光機，我一定會大大聲公開我對你嘅感情，唔再逃避

樣樣事也經由我親身主理

如果有時光機，我一定會親身約翻你出黎，唔再囿於手機

被動沒有機 自信再小都緊抱實你

如果有時光機，我一定一定唔會再自卑，一定會大大聲聲主動咁表達對你嘅感情

可惜⋯呢個世界無時光機⋯

我愛你，Angela⋯

「喂，你做咩行得咁快呀，阿sir話佢請呀，叫我比返錢…你…你係咪喊呀？」」

係crystal..