飛一次大阪，談了一場六天的「同地戀」: 7

如果剛才是停頓一秒，那麼我現在的心臟應該是停頓一分鐘，一陣寒冷的白雪凝結在心頭。


「呃？吓？吓......？我唔明白......」我說。


「唔明白咩？」她沾沾自喜地道。


「妳......妳點搵到我？」




「訊息呀，你FB專頁有人搵你，你手機又有個專頁APP，咪好奇禁咗入去睇。」她一邊說，臉帶奸詐的笑容。


我故作生氣地說：「妳媽媽無教妳，唔可以偷睇人地私隱架咩？」


她也馬上反駁道：「你媽媽無教你，唔可以笠亂畀電話人架咩？」




其實我從來覺得自己頗會說歪理，把曲掰成直的是我常做的事，但眼這個女生遠比我更能言善辯。


「喂，你嬲呀？」她探頭問。


「無呀。」我續問：「咁妳有咩咁緊急呀？」




「好緊急呀，本身好肚餓，但而家唔肚餓lu～」她隨手拉一架手推車，再次推進超級市場，在裡頭玩起飄車來。


「淨係咁咋？」我急腳追上前問。


「唔係你以為咩？」她左飄右轉，在一行行琳琅滿目的貨架中縱橫馳騁。


我有一秒覺得自己被當成傻子。


「如果我有事，都唔會搵你，搵咗阿森啦。」




「咁我走啦。」


「你咁易嬲架。」


「我都無嬲。」


「喂，點解你要寫到咁慘？好悲觀咁。」忽然她話題一轉，讓我有點接不下去。


「......可能我本來就係悲觀嘅人。」




「我唔鍾意咁慘。」她抿著嘴不滿地道：「做人愁眉苦臉好咩？」


她飄著車，經過一個女人抱著嬰兒，嬰兒凝視著BoBo，她對嬰兒擺起鬼臉，逗得嬰兒哈哈大笑。


「笑先好嘛。」


「咁我又未去到愁眉苦臉嘅。」我為自己辯護一下。


最起碼我相比叔本華，是樂觀100倍。




「明明就苦瓜乾咁，BB都笑得好睇過你。」


「BB得意嘛。」


BoBo眺望著遠處問：「喂，你好鍾意你個ex架？」


不知為何，唯獨這一題，我不太想回答。


「嗯？」




良久後，我才回答說：「嗯，咁當然架啦。」


她的腳步倏地停下，站在超市的中心，不少人在我們身邊穿過，她緩緩地問道：「究竟人係因為鍾意而鍾意？定係因為失去而鍾意？」


「重要咩？」


「我覺得重要。」


「我覺得我自己係前者，其他人唔知。」我回答。


她沒有說話，繼續闊步向前。


「咁冷淡嘅.......」我問，答完得不到任何回應。


「你都仲未答我問題。」她轉身向後說。


「我咪答咗囉。」


「我唔係指哩條，我係指機場問你嗰條。」


時間又再靜止，心臟又再漏拍。


「重要咩？」


「我覺得重要。」