飛一次大阪，談了一場六天的「同地戀」: 17
大概我們處於山頭較高的位置，人流稀少，已甚少遊客到來。
除了前頭遊客的嬉戲聲，逐漸遠離後，就只有小貓喵喵的叫聲，還有雨打在雨傘的響聲。
「妳唔要佢啦？」我指著懷中的公仔。
「邊個話唔要！」她一手就搶回Minions。
「妳跑得咁快，咁好氣，邊個追到妳呀？」我說，泳隊果然非同凡響。
「邊個話要畀你追到。」
「但我真係追到。」
她瞪了我一眼。
「對唔住呀。」我道歉：「頭先好似語氣重咗。」
她再摸一摸貓咪的頭，那兩隻貓大概是一對情侶，互相依靠，親纏得很。
「我走啦貓貓，唔好唔捨得我，記住避雨呀。」最不捨得的大概是她，從她的眼神便可看出。
看她濕漉漉的樣子，我才記起要遞上紙巾。
她接過後，終於笑逐顏開，重捨她陽光的笑容：「你請我飲野補返數，我就原諒你啦～」
「係係係，無問題！」如果飲料可以修補一段友情，那麼買一百枝我也願意。
此時，我們二人應該拋棄他們一段距離。
「我地係度等佢地？」我說。
WIFI蛋都不在我們手中，聯絡不上他們，這真是最糟糕。
「我地行返山頂再落返去等佢地啦～」BoBo不停腳步說，我只得跟著她。
「明明大部分人行到啱先嗰度就走，得我地先繼續往前行。」我說。
「睇多啲野唔好咩？」她說。
「無話唔好嘅。」
「你寫文係因為你女朋友？」BoBo忽然這樣說，我呆愣一秒。
「......妳又知？」
「你鍾唔鍾意貓？」
「鍾意呀？」
「又係因為你女朋友？」她問。
「......」我不解地道：「點解會咁，妳係咪入過我個腦入面？」
她憨笑：「點解你做乜野都好似圍住佢轉嘅。」
「.......」
「咁唔得架.....如果你嘅世界一切都建基係佢身上，咁你同佢都會好痛苦。」
此時，她忽然打了一個噴嚏，臉頰也漸漸漲紅，眼神好像開始迷糊。
我問：「妳發燒呀？」
「黑痴！」話未言盡，她又連續打了數個噴嚏。
「可能......係傷風？」
「九成係妳啱啱淋雨。」我伸手摸一摸她的額頭，滾熱燙手。
「你都燒幾嚴重。」
「你又唔遮我.....」她的聲音漸漸變得嬌嗲起來，重回小朋友的聲線。
「小姐，妳跑到劉翔咁，我揸車都唔夠妳快啦。」我說。
她偷笑，扁嘴站在原地。
「我地落返去啦。」我說。
「我想上去同公仔影相呀。」
「妳病呀。」
「你就有病～我無病！」
「係啵！我唔記得咗今朝買咗藥！」我立即從袋中拿出有村感冒藥，給三粒BoBo。
她吞下藥後，不出三秒就說：「我好似好返好多啦。」
「我唔會信妳，邊有可能咁快好得返。」盲的也不相信她。
「哎呀，畀你識穿咗添.....」她拉著我的衣袖說：「嚟啦，我地繼續行。」
我抵擋不過她的撒嬌攻擊，只好順她的意思，兩人繼續上山。
「知唔知點解我會知？」她問。
「因為我乜野都寫哂係塊面到？」我問。
「呵。」她輕輕搣了我的臉頰：「咁我幫你搣走啲唔開心。」
臉頰頓時一陣滾燙，分不清是由於她手暖熱的溫度，還是我的敏感。
「你耳仔紅。」病態中的她瞇眼，臉頰緋紅。
雨勢漸漸減弱，陽光嶄現，光線穿透樹葉，散落在她的身上，影襯著她的美。
在路經的神社和鳥居裡，為她與公仔拍了好幾張照片後，終於滿足她的心願。
我取笑BoBo跟Minions只是大細版的分別。
「我係專登咁著架，我只會當你係讚我～」
「厚臉皮啦妳。」
她接連打了幾個噴嚏，臉還是紅紅的，看來藥不怎麼奏效。
奇怪，明明我很快痊癒。
「佢地應該係下面，不如我地落去啦。」我說，一方面是擔心她的健康。
「好呀。」她連連打了幾個大呵欠，眼神越來越迷糊。
「點解妳病到好似醉咗咁。」那我倒好奇，她醉倒的時候會怎樣。
「我都無病。」
跟那些醉漢說的詬一樣，毫無說服力。
「妳仲行唔行到呀？」
「如果我話行唔到，咁你會點？」她好像看穿我的想法。
「扶妳落去。」
「你明明係想孭我落去。」
我到底有沒有一樣事情可以瞞得過她。
我就揹起BoBo，開始小心翼翼下樓梯。
大雨過後，濕透的斜路滑溜溜，樹上不時還落下水點纏眼，害我每一步都走得很驚心。
BoBo卻用紙巾刷乾我眼旁的水滴，沒猜想過她會注意到，遠比我想像中更細心。
「唔該。」
「唔洗。」
「知唔知點解我知？」她又再次問起那條問題。
「唔知呀。」
「因為......我睇得出你好鍾意佢囉。」
「妳識咗我幾日咋啵，妳又知。」
「字裡行間睇得出......好鍾意。」
此時眼睛不知怎地蒙上一層水膜，不知怎地看東西變得朦朧不清。
良久後，我才回應一句：「其實我已經好努力。」
「嗯.....我知道呀。」她細語道。
樹葉又落下水點在我眼旁，這一次她沒有用紙巾幫我刷乾。
感謝她的細心。
「係咪覺得我好了解你呢。」
「係呀......妳可唔可以唔好咁了解我？」
「做咩？驚你鍾意我呀？」她開玩笑地說。
「痴線。」
「當女仔下定決心要忘記一個人，佢就會忘記得好快......所以，你都要努力向前望呀。」
「唔好唔開心，一係我吹牧童笛畀你聽。」
「唔.....」我的「洗」字還未說出，她已經順利掏出她的牧童笛。
「妳真係唔驚畀人拍上網？」
「唔驚～」她說：「啊，但我無手......」
她一手抱著minions公仔，一手拿著牧童笛，我以為可以逃出魔掌時，她卻說：「辛苦你啦m仔，入去訓一陣。」應該是把他塞進自己的袋中。
「我一路吹你要一路唱架。」
「下？」
「係呀。」
「妳唔畀我唔識唱架咩？」
「你一定識唱。」
G'C''G'E'C'E'G'C'G'E'C''C''
在森林和原野........
她撞了我一下，我便不情願地唱：「是龜也是.....」
我再被狠狠地拍了一下頭，我絕對感受到她在背後瞪著我的眼神。
「.......在森林和原野是多麼的逍遙親愛的朋友啊你在想什麼........」
「乖啦。」
「送一個貼紙畀你啦。」她在我身後，左翻右動，然後貼了一個小白兔在我的胸口。
「喂，我唔係小朋友呀。」
「Nonono，你係呀。」
「拎開呀，我形象無哂啦。」
「你邊有形象呀，變態佬。」
「又屈我！我唔要貼紙！」
「點解呀......小白兔咁可愛。」她摸著貼紙說。
「唔覺呀。」
她敲一敲我的心口，還自帶配音：「敲敲。請問屋主係唔係度呀？」
「係度，有咩事呢？」我還真是配合。
「請問你間屋仲有無位？」
「嗯......都仲有啲。」我笑說。
「咁......」她的頭十分靠緊我，面頰與面頰的相觸，我的耳朵開始滾燙起來。
「你個心以後可唔可畀隻小白兔住係度？」