飛一次大阪，談了一場六天的「同地戀」: 20
「妳自己？」
「係呀，我係嚟拯救你。」她搭著我的肩膀說，轉個頭就拉著我的衣袖，急忙說：「快啲買咗野飲先啦，我好頸渴呀！」
敵不過她，只好先陪她到收銀櫃買飲品，剛付完錢，她已經「咕嚕咕嚕」大口地喝起來。
「有無咁頸喝呀妳。」我嘲笑她，她擦一擦嘴說：「吹咩。」
「妳咁夜係度，佢地唔會擔心架咩？」
「放心啦，我瞞住小美出嚟架，佢而家仲以為隻小熊維尼係我～」
剛步出超市門口，她便拉著我說：「喂喂，我都未話走得。」
「妳仲要買咩？」
「我訓咗成日呀，飯都未食過，可憐我嘅肚仔，」她按著自己的肚說：「餓到係咁叫～」
「聽唔到嘅。」
「你行近啲先聽到架！」
我側頭想靠攏一點去聽時，她卻對準我的耳朵大聲一呼：「嘩！」
「嘩，痴線我差啲聾！」
「邊個叫你真係想聽呀。」
「妳講哂，又係妳叫嘅。」
「我叫你就做，咁係咪我叫你放低，你就會放低？」
「......」
到底她是怎樣知道？
「講笑咋～」她笑著說：「我想食野。」
「咁妳咪食囉。」
「你可唔可以揀一樣我鍾意食嘅野？」
「我點知你鍾意食咩？」
「憑你感覺囉，又或者揀你自己鍾意食嘅野。」
超市的熟食繁多，我想她現在不會想吃杯麵之類，因此可以剔除在外。在壽司、炒飯和麵食之間，我選了蕎麥麵。
對，其實只是我自己愛吃。
「蕎麥麵啱唔啱呀？」她只望著麵盒，猜不透她的表情代表什麼。
「好呀。」她說。
在她大快朵頤地吃著蕎麥麵的時候，我問：「點解.......妳知我會唔開心？」
「我聰明嘛。」
「聰明同乜都知係兩回事嚟架啵。」
不消一會，她已經把一整盒蕎麥麵都吞掉，她的進食速度和食量實在令我吃驚。
「做咩啫，咁人地肚餓嘛。」可能她瞧見我驚訝的眼神，就連急解釋道：「平時我唔係咁架。」
我搖搖頭道：「唔係，妳平時都好大食，不過我無諗到妳會食得咁快。」
「都話人地肚餓囉，我返咗去之後就無食過野啦。」她緊張地道：「你試下到而家都未食野呀。」
「都唔會食到妳咁嘅樣。」
「去死啦你。」
此時她的手機響了，她查看一下後，伸一伸舌頭說：「死啦我畀小美發現咗。」
「咁送妳返去啦。」我們終於離開超市。
「咁你地夜晚去咗邊？」我問。
「我地去咗食大阪燒，不過味道麻麻，然後去咗酒吧。」
「唔怪得成陣酒味啦。」她掩鼻道，我問：「妳聞到咩？」
她鬆開手傻笑說：「其實聞唔到哈哈哈。」
「低B！」
她冷不防爆出一句：「咁......係你前度搵你呀？復合？」
我停下腳步問：「妳點知架？」
「我猜架。」
「真係？」
「呃你做咩啫？真係估架！」
我在心中起了幾分疑心，但她的確不可能知道我們的事。
「仲有咩事可以令你咁掛心呀？」她解釋道。
「無呀......其實佢搵我都係訴下苦，同埋......同埋講下佢男朋友嘅野。」
復合兩個字太遙不可及。
「男朋友嘅意思係......唔係我，係佢新嘅一個。」我補充道。
「我知呀。」
「妳又知？」
「如果係你，就唔洗而家愁眉苦臉咁係度啦。」她說。
「呵......」我都不知如何應對。
「喂。」
「做咩？」
「陪我跑呀。」
「吓？」
還未來得及反應，她已經率先跑起來，然後轉頭對我說：「你試下唔跑！」
逼得不已，我只好追隨她，兩個香港人於深夜在大阪的街頭奔跑馳騁。
猶如在機場趕飛機的速度，女生來說，她的跑速算快。
當我與她並駕齊驅時，她就捉住我的手臂：「喂你咁快嘅！」
「再快啲都仲得！」
「喂！」她鬆開手，然後道：「.....一係咁你捉到我，我請你飲野。」
「好，一言為定！」我信心滿滿地說，因為論速度，我確實比她快。
可是當我以為追上她是一件極為簡單，應該只花幾秒就可以捉到她的時候，事情就往我完全相反的方向發展。
我完全碰不到她。
她時而煞速急轉，時而住腳後奔，充分利用她嬌小身軀的優勢，加上異常的敏捷，左穿右插的，穿過一條條大街與小巷，我還是連衣邊都摸不到，反而只是單純地在消耗體力。
兩個人隔著一定距離，都一同停下來喘氣休息。
「妳咁難追架......」
「呵呵，本小姐係難追架。」她笑道。
「但我會捉到妳架。」
「睇下點，最後直路啦。」她望一望前方的酒店。
我本想趁她不備，突進偷襲，誰料她反應迅速，立即拔足而奔。
只差一點點。
距離一直縮短，只要給我多幾秒時間，絕對可以追上，可是這麼短的距離......已經......
不行吧？
就當我這樣想的時間，她的速度突然減慢，正好於酒店門前，我成功追上她。
「無氣啦......你想飲咩呀？」她喘著氣說。
我總覺得她並不是沒有氣力。
「檸檬茶！」
在自動飲品機買好飲品後，她瞧了我一眼說：「你笑返啵～」
「少少啦，出咗身汗，又有野飲。」
「知唔知.......有一句說話係永遠都唔可以信。」
「係咩說話？」
「就係：『你唔得。』」她說：「你得嘅，一定可以忘記過去。」
我相信在她轉身離開時，牽走了我某部分的靈魂。