《逃學》 by雨天霹靂
第五章 「防守」

Day3 10:00
我琴晚真係好攰,所以訓到依家
「起身啦!幾多點啦你仲訓」
我被人嘈醒咗,起身睇下我隻錶
「威你做咩呀,10點za,訓多陣都唔得」
「威你個死人頭,你個friend依家係果邊俾我班手下捉住,唔想佢死嘅就乖乖地聽我講」
我坐咗起身,望下四周




同我講野嘅係一個高form學生
頭髮凌亂,仔細睇佢嘅左手手臂有紋身
跟住我就見到阿威俾人捉著咗
佢雙手被綁起
佢隔離有個人用刀指著佢條頸
「咁你想我點?」
「琴日發生咗咩事
呢個醫療室入面嘅3個人呢?」
我猶豫咗一陣,講大話對我冇好處
「我殺咗佢地。」




「係咩,咁我就要多謝你,幫我殺咗我個仇人。不過一筆還一筆,將你地琴日攞到嘅學生證交出黎,唔係嘅話我就殺咗佢」
佢指著阿威
「Ok,Fine」
我係床下底攞咗個藍色膠袋出黎
「呢D係你要嘅嘢,放咗人先」
「你當我傻架?如果你唔俾我點算?」
我指一指我手上嘅傷口
「大佬,我咁樣點夠你地打呀
我唔交貨你再殺咗我地兩個都唔遲」
佢向另一個同伴點點頭




佢將阿威解綁,推佢過黎我呢邊
「人我放咗,警告你唔好挽嘢」

我行過去將個藍色膠袋俾咗佢
我同佢講:
「咪行著,食唔食枝煙?」
佢攞咗我手上嘅煙
枝煙我琴日係醫療室搵到嘅
「識做wor,有冇興趣加入我地」
我攞咗盒火柴出黎
點燃一支,幫佢點著枝煙
「但係你地老師有冇教過,酒精係易燃品?」
我將隻火柴扔咗入去個藍色膠袋入面
入面係果樽我琴日用剩嘅酒精
個膠袋好快就燒著咗




我順勢攞埋琴日把刀出黎
「仲想挽嘅,我奉陪。
三個人都殺得死,仲驚你地兩個?」
佢地顯露出好驚嘅樣
「你...你好嘢,我地一定唔會放過你」
隨後佢地就跑咗出去醫療室門口
我用張防火氈滅咗個膠袋嘅火
「峰,你挽火挽上癮?」
「仲好意思講,多得頭先我救你」
「係啦係啦,救命恩人
但係點解頭先你唔俾學生證佢地」
「我冇信心可以搵到辦法出去
呢D學生證,再加多十幾張
至少可以帶你地一個人出去」
「哇,我聽到真係好感動。




咁大英雄,我地係咪應該返會客室啦?」

會客室
呢個時候,兩個女仔係入面挽緊手機
「你地竟然有叉電線,等陣借黎用下」
佢地兩個對望,跟住曉晴同我地講
「想用嘅話...同我地講琴日發生咩事
你地兩個就咁留兩個女仔自己係度
算咩男子漢wor
有冇當我地係一個team架」
我知佢唔係真係嬲我地
佢發細佬女脾氣嘅時候真係好得意
「好啦,同你講咪係lor」
我將呢幾日我地嘅威水事績講曬俾佢地聽
若琳聽完之後話




「哦,原來就係你地兩個琴日整響個火警鐘嘈醒我地,搞度我地訓唔好」
「咁請問兩位大小姐,我依家用得個叉電線未」
「未呀,你地兩個發誓以後唔會再單獨行動」
我向阿威打咗個眼色,示意佢做
佢向我反咗白眼,跟住我地舉起右手
「我地發誓以後唔會單獨行動,會帶埋兩位大小姐,如果唔係嘅話就成世A0」
曉晴滿意地點點頭,俾咗條叉電線我
「好啦咁多位,我地黎解下提示密碼」
提示:F.L.I.T 密碼3·1·5·2
曉晴首先開口
「flit嘅意思係掠過
同個密碼有咩關係?」
「或者我地唔可以從正面去諗
呢4隻英文字應該有其他意思
同埋密碼淨係可以使用一次




我諗應該有另一個人都收到呢個信息
我地要比佢快」
我地諗咗半個鐘,都係冇結果

我向大家提議:
「不如我地出去周圍睇下」
大家都同意
始終唔可以一直逃避落去
出面嘅大部分人都已經組成隊伍
始終係呢個時候一個人生存好難
回望呢兩日已經死咗超過50人
我地圍繞咗成個地下行一圈
發現咗有D唔尋常
呢度竟然...一條屍都冇
同琴日12點係醫療室嘅情況一模一樣
不過呢個應該唔係好重要嘅問題
所以我就冇理
「喂,阿峰最近好嗎?」
有人係後面拍咗我一下
係我嘅小學同學林志強
因為佢好肥,所以我通常叫佢「肥強」
不過升咗中學之後就好少聯繫
「咪講笑啦肥強,點會過得好呀」
「你自己小心D,好似有人周圍搵緊你地
冇咩事唔好出黎啦」
「嗯,生存落去」
我拍咗佢膊頭一下,跟住就走咗
我地去到小食部
呢度俾人霸佔咗
佢地向學生收取昂貴嘅金錢
換取食物
好彩我地一早去攞咗物資
跟住我地就去咗教員室
睇下有冇咩物資可以補充
最後都係得幾包零食
我地最後去咗禮堂
入面有一個大銀幕
上面投射咗
「回校學生:671人
存活:613人
死亡:58人
逃出:0人
剩餘時間:4日5小時23分鐘46秒」
其實我一直想知
呢個倒數時間完咗會點
至少琴晚到依家未有人死
我地四個一邊食、一邊傾計劃
一邊分析下個密碼
「弊、8:45啦」
差唔多要上返去
唔係嘅話我地會成team覆沒
我地即刻跑返上一樓
諗住返去會客室

前面有4個高大嘅男仔阻住咗我地條路
「你地諗住去邊呀?」
阿威問:「你地係邊個?」
「今朝先見完,你地咁快唔記得啦?」
佢地攞咗幾條挽康樂棋嘅木棍
我冷笑咗一下
「你當你地係孫悟空呀?不過好似有D唔公平wor,我地有兩個女仔係度」
「今朝又唔見你講唔公平?
比次機會你,將你地四個嘅學生證交出黎
再加上你地之前搵到嘅
同埋我要你係地下扮狗吠
咁你地或者可以生存多幾個鐘」
「咁我地就睇下最後邊個扮狗吠啦」
我同阿威平時都好鍾意打交
平時放咗學就會捉埋D仇人去後樓梯
所以我地身手都唔差
其中一個人用木棍揮向我
我睇清楚閃避之後,用拳頭打佢腹部
跟住轉身背向佢,搶埋佢嘅木棍
阿威亦爽手地解決咗一個
我地趁呢個時候掩護兩個女仔入去會客室
「唔係呀嘛,你D手下得小學雞程度?」
「睇黎要俾你地見識一下
2打2,夠公平啦?」
阿威同佢嘅手下打
其實佢琴晚同我去醫療室被人打完一輪
自己都有傷在身
所以冇咁敏捷同有力
打交嘅時候一直處於下風
直到被人打中個頭
阿威就好似昏迷咗
「好似有人同我講
佢隻手有傷口,仲指咗俾我睇」
佢地嘅「大佬」放低木棍
用拳頭不斷打我傷口
我隻手俾佢打到出唔到力
最終亦倒地
「大佬,D昆蟲黎緊」
「聽唔到你地扮狗吠添
算啦,由得你地今晚俾昆蟲食啦
後會無期」
我合埋雙眼,諗住呢鋪死緊

當我再打開眼嘅時候
我已經係會客室
面前係曉晴
「你醒啦,你地兩個真係好重呀」
「阿威呢?呀!隻手好痛」
「阿威佢仲未醒,
你訓返低先啦
我幫你包紮傷口」
我將焦點放咗係曉晴度
睇住佢認真咁樣幫我包紮
我內心好感動
「做咩ar,我塊面係咪有咩污糟野?」
我回過神來
「哦冇,我發緊呆啫」

「叮咚叮咚」
我已經好憎呢個聲
究竟仲要死多幾多人

「回校學生:671人
存活:603人
死亡:67人
逃出:1人
已經有人離開咗
呢個係大家嘅希望呀?
定係絕望?
點都好,祝你地好運...哈哈哈哈...」

10分鐘前
升降機前面有兩個人
「賢仔,你入去啦
入咗去就走得啦」
「你呢哥哥?」
「呢個遊戲太簡單
F.L.I.T,調一調轉,即係LIFT-升降機」
哥哥係升降機入面順次序按下3152
跟住就出咗升降機
「太冇挑戰性啦
我要留係度....」
佢托一托佢嘅眼鏡
「令個遊戲更加難挽」
升降機關上門
以極快嘅速度向上升
2分鐘之後,終於到達目的地

希望?定係絕望?
個密碼俾人用咗
我地唯一出去嘅機會都冇
不過應該仲會有其他方法
但係依家阿威昏迷不醒
我地team都做唔到D咩
同埋頭先班人一定仲係隔離
聽朝會好危險
阿威,如果你冇昏迷,你會點揀

A-先聲奪人,聽朝一早起身同隔離班人死過

B-轉基地,安心養傷

C-轉基地暫避,自己去探查下逃出嘅真相,睇下有冇咩線索可以出去