遲多一分鐘搵到小渝,小渝就多一分鐘危險。我唔想以後再見唔到小渝,所以即刻跑去小渝屋企。

到得小渝家門口,上次黎到聞到既輕微咸魚臭味,變成一陣令人作噁既惡臭。

「我係阿眉呀! 伯母我有野想再問你。」我大力拍門,卻發現原來門冇鎖到。

走到小渝家入面,搵哂全屋人影都見唔到一個。家中既情景同上次黎既時候大概相同,唯一唔同既係,廁所道門居然變左一塊全身鏡,但係只係反射照出我既右半身,呢塊鏡似曾相識......

惡臭味開始臭到我想暈低,而到呢家我終於知道呢陣味係由廁所入面傳黎。





我嘗試推開呢塊全身鏡查個究竟,但係居然推唔郁。我只好將氣從丹田運至雙手之上,雙掌齊發打到鏡上。

「啪」一聲,全身鏡冇應聲震碎。呢一下聲音係由我手臂發出,原來我既掌力被全身鏡反彈過黎,頓時痛到我叫救命。

「傻仔,塊鏡係拉出黎架。」一把女聲從我身後傳黎。

佢著住一套黑色既緊身連身服。咳咳......除左係某啲影片入面見過之外,現實中都我都未見過人咁著。佢扎住平時小見既馬尾,而著住呢套衫,身材比之平時更顯得玲瓏浮凸,若果被其他男人望見,唔難令人想入非非......

不過對我黎講就難啲。





「家姐,你著成咁做咩?」

家姐總係俾我一股高深莫測丶極度神秘既感覺。先唔講點解佢會現身於此,呢一刻我比較想知道既係點解佢要著成咁。

「睇黎你救唔返小渝係唔會心息。」家姐冇理我既問題,又繼續講:「我同你一齊去啦。」

家姐充滿自信地走到我身邊,拉開塊全身鏡。

「入去啦。」家姐好冷靜咁講。





只見廁所入面訓住一個女人,呢個女人被無數既老鼠咬緊,顯然佢已經死左好耐。

望多兩眼,先發現原來佢係專門照顧小渝媽咪既工人。

「唔通上次黎搵小渝既時候佢已經死左?」我回想起當時,屋入面果一陣細微既臭味:「點解我唔可以細心啲留意當時既情景。。。。。。」

「唔好再哂時間啦。」家姐拍一拍我個膊頭,指住個馬桶:「快啲跳入去。」

「跳入個馬桶到?」我搞唔清家姐既用意。

只見家姐用右手攬住我條腰,輕輕向前一躍,我地兩個就同時跳左入去馬桶入面。

明明依舊感覺到家姐右手既觸感,但係四周漆黑一片,黑到連身旁既家姐我都睇唔到。

我嘗試問家姐呢度係邊度黎,但係明明講左出聲,卻連自己都聽唔到自己講野。





唔知過左幾耐,我終於睇得到野。

眼前係家姐同埋一大片既樹林,四周寂靜無聲。

家姐用手掩住我個嘴,示意我唔好出聲。然後佢四周觀察,好似驚附近有人咁。

突然,我站立既地面穿左一個黑色既窿。
已有 0 人追稿