[少年監獄] 感受沙咀: 37.路向
自從搬了上A座旁邊C座的上層後(J仔的樓上,簡稱C2室),
我發覺我自己係沙咀既生活,慢慢變得輕鬆
姐係話, 我開始覺得生活無咁巴
住係C2後, 之前好多會衰既細節位, 都可以做的唔使咁嚴苛
由於我地S開始多人, 分左兩個倉, A1那邊有四個滿倉, 而C2呢到目前得我地五個人
所以第一個重大既轉變係早上Check我地毯既阿sir不再係戈sir.
因為戈sir作為S的正IC,一定會留係A1坐鎮, 負責檢點A1的早上事務
因此君實sir則會上黎我地C2招呼我地五個
所以只要唔係太過分, 君實sir都會比我地五個二年班超多走棧,
就算找,都係偶爾故意刁難一下, 藉啲意笑住同你玩幾板
有陣時,早上check毯甚至係笑住黎Check, 比起在A1的時候,輕鬆了不少
至於第二個覺得輕鬆既原因, 大概係我入了洗衣吧
雖然入左洗衣才一個多星期, 但我已覺得自己多左好多腦袋放空既時間, 可以係洗衣入面諗嘢, 再也不像係大棚步操的時候, 精神時刻都在繃緊, 提防責罵.
而且每日係洗衣同武傑一路吹水(細細聲),一路燙衫, 就算殺到又好, 幫水位搬下嘢又好,比起大棚的生活其實都算輕鬆
大棚步緊操既時候, 我係到燙衫
大棚頂住太陽曬緊既時候, 我同武傑可能仲吹緊水
甚至要去廁所既時候, 我都不用再擔心帶我地既阿sir要收左廁所數先俾我去
因為洗衣門口就有個廁所, 同張sir揼地舉手報完, 通常佢都會揚手比你去
中班既阿sir, 只是上班
於是日子開始變得清閒, 我發覺每天身體都會勞累既一年班日子, 原來已經隨著二年班呢個身份過去
我終於習慣左呢到既生活
夜晚回到倉後,靜坐開始
武傑已經打緊瞌睡, 我就舒服地挨係墻邊發呆,諸家威則同志豪細細聲吹水.
呢啲放肆既行為, 如果我係一年班, 我一定無想象過我夠膽做
不過我地之所以咁大膽,其實係因為我地C2有地理優勢
因為上C2既果條樓梯至少都有二十來級,每個阿sir返工又係著同我地差唔多同款既黑皮皮鞋
如果有人上來的話, 爬樓梯既聲音其實好應, 特別係寧靜既空氣中, 阿sir上樓既聲響就好似鬧鐘咁, 無得聽唔到.
所以我地C2既靜坐時間,其實唔一定要係"靜坐時間",於是我地既懶態就出曬黎喇
撻撻..
我地心頭一震,這是進入作戰狀態既信號
撻
撻
撻
.
.
.
漸漸上來的腳步聲, 提醒我地係時候歸位
我地重新坐正個姿勢係床邊, 預備做樣比夜更sir睇
撻
羅sir探頭,望了望倉內的我們
原來今晚係羅sir夜更
我地五人都無說話, 繼續望住前方繼續做戲, 扮無嘢
但係我就硬係覺得氣氛好怪異, 所以我偷偷雕左雕門口
一望,就 不得了,我和羅sir眼光立即撞上,對望
但呢個都唔係最攞命,
最攞命既係羅sir佢仲要用一副似笑非笑既表情望住我, 一副好似想逗我笑出黎既樣
「噗哧」
屌... 仆街又中呢招
呢到既阿sir真係好興用啲狗招,引你係啲輕鬆時間衰, 跟住合理化地找你數.同你玩
我好難忍笑, 頭下果下「噗哧」係我發出的
「哈哈,」
羅sir面露出"仲唔比我陰到你"既得逞樣
「笑笑笑, 笑你家姐咩, 肥衡等陣過黎找數啊,嘻嘻.. 」
「Sorry sir..」
我尷尬地應返句....屌,咁都比你陰到
羅sir走下樓繼續巡更,我地亦重新回復懶態
但我當然少不了被其他四人恥笑
「哎衡仔..咁都衰你真係..」
對面既武傑開始笑住潤我
「屌咁果下眼神接觸真係好巧合啊嘛...唔覺意就笑左出黎..」
「咁咪姐係你廢咯..哈哈..」
「啊屌你凈係講風涼話...」
「誒唔潤你啦, 同我玩下十五二十解下悶啦..輸左彈額頭一下」
「呃..好啦.」
「咁預備了wor」
我同武傑伸出雙手握拳預備
「咁我先了wor, 十, 十 !」
「下?」
我個腦load左一下, 屌咩事? 佢嗌得咁快既! ?
「哈哈哈, 明顯你無落過club啦, 等哥哥我收你學費啦.」
說罷佢想伸手出黎彈我額頭
我連忙縮開
「喂屌..熱下身先啦.頭先唔計.. 」
「哇你咁茅嫁.哈哈,好, 咁今次黎真了wor」
「嗯.」
我靜下來,開始聽佢嗌
「十十!」
我立即作出反應! 對手震左一震!
但我都係輸...因為我齋係震左震, 但手仍然係無反應
「拿, 你今鋪無得賴啦掛」
「哎黎黎黎...」
我閉上眼將頭靠過去.
嘭一聲
「我屌 ! 使唔使咁大力啊! 哇屌..」
呢下額頭既劇痛真係痛到我眼淚都飆左幾滴.
「哈哈..有無咁誇啊你.比機會你復桌啦哎.」
「屌我先.」
我等陣一定要彈到你仆街!
「十十 !」
啊屌, 佢及時變手,無中招
「五五 !」
屌, 我又係震左震無反應到 !
「哎唔玩啦, 唔玩啦, 準備磨鞋啦哈」
我立即賴貓說道
「喂你又耍奸茅..找數啊你個仆街」
說罷武傑打算撲上來
「good evening sir 」
我立即向門口叫去
「Sorry sir...!?」
武傑以為羅sir上左黎,望去門口
但當然我係呃佢嫁啦
「啊屌你啊.」
「喂喂喂唔好亂黎啊你..哇!」
無錯, 上左C2既我地晚晚都係咁開心, 結果在那晚,戈sir既那條問題我都無乜點諗,
其實絕對有時間諗既, 不過我未敢諗,
已經身處係一個抹殺左未來既地方了,仲要去諗自己的未來,
成件事讓我覺得矛盾,反智.
現在最應該擔心的, 是明天巴唔巴吧?
後尾被羅sir笑住玩幾板之後,
我地拎出皮鞋, 一邊磨, 一邊渣正牌吹水
交替既夜晚, 再次懸掛的月亮
在被鎖上的倉內,五人暢談世事
在倉內, 我仍未了解過的, 只有諸家威同阿拉達
吹過水後, 諸家威比我印象都算係個爽快既人,
佢衰既係販賣私煙,平時係出面中意踢波,
所以佢好鬼期待黎緊既新年大衛day可以一落球場,再試一試腳
而阿拉達,與華利沙一樣衰同一條褲入黎
但佢既廣東話講得好水皮, 但聽就無乜野
所以有陣時佢有啲唔識字眼,需要我地幫手補充,亦都有唔少笑料係呢到出現
到了第二日, 那晚雖然訓得舒服, 但心中有股小小既不安,開始萌生
不過呢個不安好快沖淡了
我地五人比勁sir草草check完毯後, 落左A1倉同大棚匯合.
然後, 同係洗衣既阿偉笑笑口咁舉高手, 想搵野報
「咩事啊阿偉? 笑到咁有野想報啊?」
勁sir好奇問道
「Yes sir..噗..」阿偉拼命忍了忍笑,望左望旁邊面露難堪既阿大,說
「同sir報.趙氣榮同學琴晚夢遺.哈哈哈..」
大棚的我們聽罷, 立即哄堂大笑
阿偉更是指住阿大黎笑,笑到佢面都黑埋
我亦都笑了笑,
竟然係夢遺?
事情開始變得有趣
「哈哈..阿大你真係?..哈哈哈....」
勁sir都忍唔住,笑到猛咁拍枱道
「Yes sir....」
阿大難得露出委屈既一面, 低聲道
附近既笑聲仍然不斷,哈哈哈哈哈
「笑笑笑笑, 你地無試過咩笑..」
哈哈, 佢開始發脾氣了.
「都叫左你.哈哈哈.靜靜雞搵日落night嫁啦..哈哈哈哈哈.」
(監房地方, 打J叫"落night" )
「妖你仲講 !」
「啊哈哈哈哈.咳咳哈哈哈哈!」
阿偉真係同阿大好Friend ,笑到毫不俾面
「誒好啦好啦, 屌夢遺咋嘛, 無乜野既, 咁咪證明阿大無偷偷地落night 咯.哈哈」
勁sir說
「Sorry sir...」
「唔笑你住啦, 阿峰 ! 睇下有無條底褲比阿大換一換佢, 如果唔係既話, 等陣佢就要袋住成兜精去做PE嫁啦..哈哈哈哈..」
勁sir吩咐道
爾後, 此事開始蔓延,阿大既夢遺事跡就好似中學既戀愛傳聞一樣, 一傳就傳到成個沙咀啲阿sir都知.
而阿大自然係比啲阿sir當狗咁撚喇
佢換完褲, 上PE被戴sir潤
「操咁撚多你都仲射得出!? 我屌啊 !? 」
「Sorry sir...」
去食早飯時, 又被廚房sir撚
「哇, 好食好住wor呢到, 睇下你幾舒服, 咁都可以係呢到射得出, 我返咁耐工都係第一次聽.」
「Sorry sir...」
甚至回到洗衣後,張sir亦無放過佢
「哈我屌你啊...真係...醒目啲趁夜晚全部人訓著, 再留意下阿sir既巡更間隔去落night 啊嘛,睇下,出事啦哈哈哈哈..屌你真係..」
張sir真係撚佢撚得幾盡下
「Sorry sir...」
「誒你唔使Sorry sir啦, 果條被你射過既底環呢? 丟左佢, 唔要啦.費事全部人既底環都同你果條洗埋一齊.」
「Yes sir...」
當然, 並不只是得阿sir撚鳩佢
就連我地洗衣既其他人, 都去笑左佢幾句
特別係阿偉, 已經費事潤, 見到佢就笑出黎, 撚到阿大成朝都係到發脾氣
但剛才的只是左班的反應, 右班呢?
接更時, 戈sir和君實sir步入了飯堂, 然後勁sir搶住同戈,君實報呢單笑料
「哇, 唔撚係啊!? 趙氣榮你夢遺呀! ?」
戈sir誇張地放大聲量, 向成個飯堂既沙咀學童同右班阿sir發放呢個消息
哇哈哈哈哈哈
整個飯堂頓時傳出爆笑
我亦都係第一次見到沙咀會咁開心,那一天歡樂既恥笑聲，充斥住成個沙咀
因為趙氣榮夢遺既柒事已經柒出沙咀，柒到甚至連旁邊RC的阿sir都略有所聞
而右班的阿sir們自然唔會放過這個玩樂機會，個個都撚狗咁撚到佢盡
「唉，睇黎都係操得你少啦，仲有咁多精力可以射」戈sir先行發炮,笑道
「Sorry sir….」
「咁咪好咯戈sir, 佢可以夢遺到,證明佢無偷偷地落night啊嘛」虎sir亦加把嘴笑道
「咁點解其他人無夢遺既!? 唔通你地個個都有偷偷地...!?」戈sir立即狠問
「Sorry sir.!」
我們大棚立即回應 ,表示否定
「佢地邊到敢啊哈哈...其實打飛機係你地呢個年齡都係正常既...不過呵呵, 如果比我地當場捉到,斷正的話就.....嘿嘿嘿嘿嘿嘿......」
虎sir邪惡地說出讓人心寒既說話
「誒嘿, 可能阿趙氣榮發左春夢都唔定呢? 一係過黎試下我啲雞翼啦, 正所謂日頭有擺位,夜晚冇夢遺啊嘛」
羅sir亦都笑住插入潤埋一份.
仲作勢翹高手袖,想過黎比佢幾隻雞翼咁既款
「啊唔好啊唔好啊羅sir ! 羅sir你啲穿心雞翼我真係受唔起嫁! 」
阿大驚慌大叫,心諗夢遺姐, 唔使攞命啊嘛!?
「欸唔好怕醜啦, 黎黎黎, 過黎擺位,哈哈.」
阿sir們想撚狗般既眼神和招手, 讓他相當難堪和無奈
「sorry sir..」
不過縱使笑到佢面黃, 撚到佢無曬面子又剩
佢都係無得介意嫁喇, 哈哈
「過黎啦, 過黎接受擺位既喜悅 ! !」
虎sir大笑道
「Yes sir..」
就這樣, 阿大被阿sir笑左成日, 直到夜晚
食完晚飯,回到A座.
雖然負責打包奶的,不會再包括我, 但今晚的試煉, 有可能會問起我
「好啦, 開始喇, 出左去之後有咩打算啊 ?」
A座的我們, 一片靜音
我甚至諗都無諗過呢個打算
「下? 無人諗咩? 上次講左今日要講嫁. 」
戈sir開始面露不滿
「三年班 ? 有咩打算啊? 今晚你地四個三年班唔撚講既,就唔使指意走啊,哼!」
「Sorry sir....」
阿大, 阿偉同華利沙,阿拉達,默默道
「講啲嘢啦, 就算無乜明確既嘢, 都講下個方向之類啊.」
在旁的君實sir看不過眼, 給了些提示
「Sorry sir....」
「我比多你地四個,五分鐘 」戈sir豎起了一個手掌,五隻手指
「過左都未有野講既, 就唔好走啦, 等打爆啦你地 」
「Sorry sir....」
那麼尷尬既氣氛和時間, 又維持多了五分鐘
戈sir既五隻手指已經放下
「夠鐘啦, 邊個講先啊? 華利沙 ?」
「Yes sir.」
華利沙打起了精神, 直望戈sir
「恩呵. 講吧.」
「Yes sir...同sir報...我真係未諗到, 出返去之後想做啲咩.」
華利沙引笑既廣東話, 卻說出了句可能搏衰既說話
「蛤? 仲未諗到? 真係無乜打算咩?」
果然, 這句話引來戈sir同君實sir既質問
於是華利沙先舉起了手
「華利沙係唔係講啊? 」
「Yes sir...」
接著, 他便一臉認真開始說 :
「同sir報,其實我有諗過...但我真係覺得我未有啲咩想返既工, 中意做既野.不過我出返去之後, 一定會對我屋企人好啲.」
「呃..因為我屋企人啦, 我爸爸就係巴基斯坦人, 我媽媽就係香港人...佢地都有返工,朝九晚九,尤其係我爸爸佢.因為佢唔太識講廣東話, 所以佢份份工都未必做到咁長.所以....佢地真係好辛苦...」
不知何時,華利沙既眼眶已經濕潤,
佢收不住的鼻水, 忍不住的兩行淚,
同樣扯起了我心中既內疚和慚愧
仿佛屋企人永遠都係沙咀仔既痛處一般
一講, 就後悔,
一想起, 就傷心.
「但係我就.我就..我就真係好衰...好唔爭氣..我細個唔中意讀書,中學又跟左啲壞人, 入埋黑社會..日日夜晚出街..搞事..」
「最後就同阿拉達一齊入左黎..其實阿拉達佢同我好似...」
我望向阿拉達那邊, 佢一樣都眼濕濕了
「...所以自從戈sir上次問我地呢個問題之後,我都有係倉到諗.我諗我出返去之後我會離開社團先.唔再同之前啲..有關係」
「嗯...」
戈sir在前面,發出肯定既哼聲
「同埋...雖然我唔知中意做咩, 但我出返去會搵左一份工先..咩都好, 做送外賣, 茶餐廳都得.總之做住先..因為我有呃....responsibility..我要去做..」
佢講得有啲激動, 發音雖然模糊又抽泣不停, 就連英文都情不自禁講左出黎.
但我覺得果刻既華利沙喊得好man.
佢喊得好堅強,
佢喊出左一種讓人慚愧既覺悟.
佢講既果個responsibility, 我知係咩意思
解作 "責任"
亦是我到現在都未做到的"責任"
「嗯..講得好....responsibility..華利沙你講得好好.」
連戈sir都有少少激動, 佢一句簡單既認可, 讓華利沙點了點頭
「你地都係啊..知唔知responsibility點解啊? 呢個字解責任, 係英文黎嫁....哎..睇怕你地都有啲人唔識嫁啦....」
有些人垂下了頭,好似慚愧咁自己唔識英文
「不過你地又唔使頭得得既...我唔係鬧你地唔識字, 因為始終一樣米養百樣人.讀唔到書既, 自然有唔使讀書既出路; 讀到書既亦都自然有讀到書既出路, 但係呢我覺得你地班撚樣呢, 一直都無意識到自己有幾幸福 .」
戈sir點起了一支黑曼,緩緩道
「你地啊, 生活係一個幸福既年代, 呢到除左某幾個人, 其他人都有屋企人係出面養你,煮飯比你, 比地方你住, 但呢啲嘢唔撚係必然嫁 ! ! 」
「唔信既, 你地可以問下羅子建, 子健我唔係話你啊唔好誤會. 」
戈sir望子健一眼,表示沒有惡意
「子健佢屋企人唔要佢,由細周圍流浪,又無地方住, 好啦, 比起你地,佢幸唔幸福? 咁你地又幸唔幸福? 你地同佢既背景, 都唔一樣,你地既條件好好多, 但點解最後都黎左同一個地方, 係呢到捱生捱死, 過得咁撚巴 ? 我識二倉既鷲sir嫁, 佢一定有同你地講過一句, 你地係好人好姐既, 點會入到黎監房. 所以你地身上, 總會有啲原因令你地入到黎呢到..子建佢就真係屬於無奈既果種啦.但唔代表佢唔使捱..」
「咁你地呢? 個個都就黎到甚至已經到左出去搵工, 為未來打算既年齡 .但屌你地老母, 你地點解仲未撚知道自己既責任? 你地對得住自己既屋企人? 對得住你自己 ?」
戈sir說得有些火燥和痛心...佢那句恨我地唔懂事既責罵,罵入了我們心頭
「Sorry sir..」我們全體都慚愧地垂下頭
君實sir見戈sir動了肝火,於是接上對話
「所以你地真係要學下華利沙.佢知道佢自己既責任, 其實個世界無人規定過生你地出黎,就一定要比你地溫飽, 無人逼你地阿爸阿媽辛辛苦苦賺錢,然後養大你, 無人規定過, 你一出世就會得到咁多幸福.」
「你地未有仔女, 仲係後生, 未知道養仔女既呢份責任同沉重. 但咁唔代表你地可以隨便辜負呢份屋企人對你既責任...屋企人對你地有幾好, 我唔知; 但你地可以無穿無爛活到宜家, 一定多得你地屋企人 ! 所以出去之後, 孝順呢啲, 家用呢啲, 陪佢地多啲呢啲, 唔使我講啦? 」
「Yes sir !」
「唉...」
戈sir放下了點著既黑曼
「其實香港唔係啲咁撚難搵工既地方, 你肯做既,一定大把工可以比你地開, 你肯努力唔怕辛苦既, 點都可以基本地養活自己, 我相信呢個亦都係你地屋企人最想你做到既事.」
「同埋我唔係要你地講,一定要抱住好大既理想, 要發達之類既說話, 我係要你地知道, 腳踏實地按部就班地先養活自己,再孝順屋企人, 先係你地出去之後應該做既事 ! 」
「Yes sir !」
「但係, 你地有幾多個會真係完全做到拋開過去? 我係呢到返工都有幾年了, 口口聲聲話唔返黎既, 到最後都係返黎, 口口聲聲話唔再行古惑既,唔再掂毒品既, 又掂返,有啲結果仲泊去其他環頭. 」
「所以我一直都有同你地講, 雖然呢到係巴, 但好就好再你點衰都好, 呢到頂多都係留你六個月, 你地係出面既時候, 無好好考慮過自己既未來人生; 咁入到黎既, 夜晚唔使操既時間, 咪好好諗下呢回事咯, 好過你地係出面無所事事, 一事無成, 乜都無所謂掛 ? 仲有毒品啊, 呢到有幾多人衰毒品,或者有食過嫁? 舉手黎睇下」
大棚隨即有大概一半人舉了手, 戈sir身後的阿峰亦都舉了手
「放低手,毒品禍害呢啲我唔多講啦, 你地自己身體自己事, 你地自己知, 但你地好好諗諗毒品到底帶左啲咩嘢比你地, 我知, 走一轉貨真係好撚好搵, 啪一次丸仔應該仲正過食幾排煙...但你地真係同我諗下, 值得?」
大棚無人回應這明知答案的問題
「 你地唔趁呢次機會, 戒左佢, 停左佢, 出到去你地只會又掂返, 只會繼續循環落去... 過埋二十五歲, 再衰就要泊老鬼監房嫁啦, 唔會再有六個月, 一坐就要坐幾年. 你地仲會有幾多年?」
戈sir語重心長繼續道
「仲有你地散貨, 衰運毒果批啊 , 唔好成日話同諗, 我唔做, 其他人都會做嫁啦,呢啲說話, 如果, 少你一個人做既, 咁個市場咪又會少一個人咯, 呢啲犯法, 害人不淺既野, 咪又會少你一個去做咯..個個都好似你咁諗, 我唔做,其他人都會做, 咁呢個市場, 永遠唔會有機會縮細. 我知,快錢同心癮係好吸引,但你地出返去都繼續忍唔住既, 你只會繼續作踐你地自己, 糟蹋自己.仲有啊,出面既世界唔止呢啲誘惑嫁.呢啲都忍唔住既, 你地之後點捱 ? 」
君實sir在旁提醒
「戈sir,時間差唔多了.」
戈sir望了望手錶
「哇咁夜啦.咁阿拉達你同華利沙都係差唔多啊嘛? 咁唔使你講啦,後晚到趙氣榮同黃廷偉啊,好好同我諗下應該點講, 全部人返倉準備靜坐 !」
「Yes sir Thank you sir ! !」
回到倉後, 靜坐開始
確認了夜更sir不會短時間上C2之後,
我挨著墻邊,思考著頭先戈sir說的那番說話,同埋華利沙講既那句責任
原來我真的很犯賤
以前都好似聽了唔少身在福中不知福, 呢啲老屎忽說話
但到了真係失去的時候
我才犯賤地明白, 自己的幸福有多好
父母給予的愛, 有多深
我諗起自己讀唔成書之後, 無所事事在家hea的那段時間,
畢業之後, 隨波逐流地報一個無興趣課程
然後無所事事地在家打機, 日日開住Facebook, youtube羨慕人地既精彩
日日為LOL的白金鑽石牌位,毫無意義地守著中路.
夢回現在,
原來我那段為hea而hea的日子,真係毫無意義
那時候我寧願日日訓在床上打J, 都不願好好利用hea既時間, 認真計劃人生
「你係好人好姐, 點會入到黎呢啲地方 ?」
哈哈....無錯...
可能就係果種不積極,不上進既日子和態度, 才令我墮落到這個地方吧
只是我現在才開始反思起自己既日子, 會唔會已經太遲.
案底, 走期, 表現, PE…...
一場,一場未知既考驗和壓力...始終揮灑不去
我知道出去之後既日子, 點都會有,
就算沒有信心,
但想象起出返去之後仲要處理好多野, 考慮好多野,
對自己的人生負責, 揹起一個作為兒子的責任之類之類
我就覺得其實外面既世界,何嘗不是另一種既巴?
我不禁皺起眉頭
諗起華利沙頭先果番覺悟和眼神
原來華利沙佢真係好犀利呢...
我會唔會有日都可以堅強到好似佢咁, 揹得起那個我早應該承擔既責任呢?
諗下諗下, 我便覺得心理壓力漸大
我大膽地訓在床上,歎了口氣
原來活著, 真的是很累呢
無論是在這裡,還是在那裡
啊對了, 平時係出面既呢個時間, 我覺得想放鬆既時候, 我會做啲咩呢?
我應該會打緊機, 食緊兵, 臨訓前睇埋AV,打返個J之類之類
啊係wor !
我心中一震,
立即坐起身, 整理了一下思緒,
仆街, 話時話,自從入左黎之後, 我都仲未試過解決生理需要wor !
雖然每朝起身個個都會晨勃扯旗,
但因為夜晚返到倉,一早累到成隻狗咁, 仲邊會有打J呢個諗法
但今日唔同, 我今日見識到了阿大既遭遇
係沙咀夢遺, 係一件多麼巴的事,
我甚至覺得呢樣野仲慘過找數, 因為真係會被人笑到後悔出世咁既地步
我諗了諗, 計埋二倉既日子到宜家, 差唔多有三個月都未發洩了
摸了摸袋, 感覺上又真係好似積左唔少子孫係入面
點算呢...唔通真係要好似其他人話咁, 搵機會夜晚偷偷地"落night"?
仆街... 呢個瘋狂既地方, 估唔到打個飛機都要諗咁多嘢.....不如算啦.
但身上的男性荷爾蒙又唔知點解, 鬼死咁蠢動, 那種好耐無試過又想試既慾望,刺激著我
於是心中既天使和惡魔開始對抗了
但強弱懸殊
天使已經被秒殺
惡魔開始鼓勵我
越難做到既嘢, 做到之後既快感就會更加大嫁
去啦, 去啦!