[科幻．穿越．愛情]失戀第20次的平行世界: 2.平行世界

「喂，細佬，醒呀喂！」我眼前兩位警察呼喝著

「係，呀SIR咩事呢請問？」

「咩事？晨早流流６點幾鍾，你瞓喺到做乜？企起身攞身份證出嚟」

我無奈咁企起身，迷迷糊糊咁拎身份證，然後就係一輪基本無聊問答，住邊，做緊乜.....
警察離開後我馬上打俾扔底我自己一個嘅呀明

「你所打嘅電話號碼，暫時未能接通，請你遲啲再...」





「仆街仔，扔我一個人喺到，自己返屋企瞓」我帶啲生氣嘅心情講

最後我決定返屋企瞓返一覺，但唔知點解感覺哩條由細住到大嘅屋村，哩個早上有一種講唔出嘅奇怪．

「呀軒，你做咩返轉頭呀？係咪有嘢無帶呀？哇，咩你著成咁返嚟呀？」我呀媽問我

「吓，你講咩呀？我琴晚都無返嚟？」我一面？？黑人問號？？咁嘅樣問返佢轉頭

「唔知你講緊咩，我返入房瞓」話畢，我就直接入咗房





「唔係呀..你今日唔係返工咩？$%^&*($%^&*($%^&*(」

喺呀媽嘅一堆問題之下，我就瞓咗

晏就１點，係酒精嘅攻擊底下，我頭痛醒咗．

「哇，成晏就一點，落街買啲嘢咬下先」我頭痛淩亂，衣衫不整地道著

一如以往短褲拖鞋就落街,嗰程奇怪嘅感覺依舊喺到





「喂，煙仔」一把熟識嘅聲音叫停咗我

「哇咁早呀浩少」

佢係俊浩，基於哩個人性格超級麻煩，成個少爺咁，所以我一向叫佢浩少

「咩浩少呀？好地地幫我改新名嘅」佢一臉好奇咁問我

「吓？不嬲叫你浩少架啦，飲大咗呀你」我拍一拍佢膊頭

「九唔搭八是旦啦，喂，唔返工射波搞咩呀」

「返咩工呀，我失業成個幾月啦啵？你失憶呀」我開始覺得好古怪，極懷疑自己發緊夢





「失憶嗰個係你呀話，你隻IT狗同我玩哩套吓話，扮失憶吓話」

I.T？唔係，我突破有種感覺哩個唔係正常嘅世界，我好肯定我發緊夢，我完全無理會浩少叫我咁直接行走咗

「唔通我琴晚飲醉咗有啲咩意外昏迷咗？哩家一切都係我發夢ＦＦ出嚟？」我一邊搖頭一邊問自己

「又唔係啵，我琴晚唔係飲到好大啫，唔會咁都有意外掛？」

「唔係唔係，人地拍戲出事都係眼前一黑就乜都唔知架啵」

「唔通我以前嘅記憶係我自己幻想出嚟？」

「定係其實我以前一路係發緊夢，哩家先係現實呀，搞到我好乿呀」

我行咗入一間茶餐廳，搵咗個角落頭坐底





「喂，煙仔，咁好放假呀？」一位唔識嘅侍應問我

「吓...哦，係呀」我嘗試接受發緊夢哩個說法去回應

「例牌肉丁雞排公架啦你！」講完佢就轉身走咗去

「吓..咩呀，我都唔食肉丁嘅，加上我次次都係叫通粉架喎，到底發生緊咩事」我自言自語咁講

食完個公仔麵，我一邊諗到底發生咩事，一邊去７仔打算買煙，係哩個時候真係啱啱遇著剛剛，我見到呀明．

「喂！呀明！」我大聲叫呀明，打算上前問清楚所有嘢

「你唔好講嘢住，我問你，你琴晚有無同我飲酒？」我緊張咁問佢





「琴晚我趕住做起份功課，又點會出嚟同你飲酒呢？」呀明好自然咁回應我

「你跟我嚟」我捉住呀明隻手拖佢行去一個安靜嘅地方

「呀明，我同你講樣嘢，你唔好當我痴線，唔好當我吹水，我以下講嘅嘢好嚴重」我捉實呀明隻手同佢講

「得，有咩你慢慢講，但放開我隻手先啦男人老狗」

「呀明，我懷疑自己有病，我明明記得我琴日係同你飲完酒嚟，我啱啱撞到俊浩，佢問我做咩無返工，我今朝返屋企，連我呀媽都問我做咩唔返工，但係我明明失業咗成個月」我講都講到自己流曬汗

突然呀明望一望天空，好似看破紅塵咁嘅樣

「煙仔，首先你同我發誓你無講大話先」佢好認真咁望住我講

「我無！我發誓我無呀！」





「我唔識你，哩到所有人都唔識你」

「吓？你咩意思，講清楚啲啦撚樣」我非常心急咁問佢

呀明拎出一包煙，點完火突然係我耳聲問

「你信唔信平行世界？」