「乜撚野呀……」我面色一沉……

紅隧唔塞……「今日星期日?」我問。「係呀。放假番黎做咩呀你?」基哥食住燒賣答我。

又星期日?我又行去馬會,真係開左門。即係點呀!結界呀家陣!但係我識肚餓架喎!我果五千幾萬點呀!前日、琴日、今日都星期日……咁聽日呢?我即係困死左係呢日入面呀?

到底發生咩事?咁我果五千幾萬點呀?「依家你無,將來或者會有」但係我無將來喎家陣!!喂唔好搞我啦大佬,我普通廢青一個渣……

「喂,呀誠,出黎食個早餐丫。」呀誠係我識左十幾年既兄弟,有咩事要幫手一定搵佢。約左十點半係華星,我九點未夠已經到左,凍啡都飲左三杯……呢個時候我亂過亂馬,個腦一片空白,唯一可以做既就係坐係到等呀誠。





「喂點呀大佬,星期日俾我訓多陣丫好心」呀誠一見到我,未坐低就咁講。
我聽到「星期日」皺哂眉頭,「你老實話我知,今日星期幾?」
「星期日囉咪講左,你係咪傻鳩左呀……喂靚仔早餐A,凍檸茶唔該」
「咁琴日呢?」
「係咪玩野呀家陣,今日星期日,琴日咪星期六囉!」
「如果我話俾你聽,前日係星期日,琴日又係星期日,今日都仲係星期日,你點睇?」
「哈哈哈,我睇你痴鳩左線囉。」呀誠笑到停唔到。

我原原本本咁將件事講俾呀誠聽,佢話:「咁就簡單啦,你依家去買多次條三T,我返去訓陣先,夜晚出黎同你食飯,一齊望撚實個鐘,跳到0000果一下,咪搞撚掂囉!哈哈哈哈」





係喎!如果聽日正常返,我無買條3T,咪唔見五千幾萬!
「好兄弟!聽日攞左錢,分三百萬俾你!」
「哈哈哈,請食飯得啦,錢係你既,無理由無啦啦分兄弟錢既。」
「十點、春夏秋冬!」

我又返到屋企,開電視,等。一切就同琴日一樣,賽果一樣,派彩一樣。但係我已經係睇第三次,好似一切係我掌握之內咁,完全唔需要緊張……緊張既係今晚。

十點,我去到春夏秋冬,見到呀誠已經坐低左,嗌到成檯野食,又象拔蚌、又龍蝦、又和牛……喂我未攞錢架大佬,邊有錢埋單。佢一見到我就四萬咁口,「喂多謝哂呀大佬,聽你講頭三場我買左,中哂!都百鳩幾萬,呢餐我既,你果餐留返下餐,屹屹屹屹。」

原來死仔一心諗住買另外果幾場搵錢……不過佢都無買條3T,如果唔係彩池分薄左,派彩就會少左,依家派彩一樣……果然好兄弟。又食又飲,眨下眼就十一點半。





「嗱,唔係話唔信你,但係邊有可能架。日日都星期日?係就好呀,唔撚洗做,屹屹屹」呀誠話。
「唔知你係邊到搵貼士咁堅,場場都中。不過你戇鳩既,梗係買三重彩四連環啦,即日有錢收,屹屹屹屹。」原來由頭到尾佢都以為我鳩嗡……不過又有道理喎,買其他彩池派彩唔過五百萬,咪即日派彩收錢囉……咪住,重點唔係呢樣,重點係過唔過到今日呀。

23:58……23:59……
已有 0 人追稿