最後一單大茶飯-修訂版: 第一回-輝叔的憤怒
90年代係大茶飯事業既高峰。
老笠、綁架、勒索…數不盡既惡行。
行內既人點會唔知葉繼歡、季炳雄、張子強，
佢地根本就係我地行內既表表者。
佢地食果d茶飯，根本唔係常人可以食到。
之前有人拍埋戲，叫做《樹大招風》聽過未。
我最多都係夜媽媽係D窄巷度，拎住把軍刀，成個傻佬咁，問人地要錢定要底褲。
依家D人要錢都唔要底褲。有d人直情底褲都唔着。果一刻我拎住手上既底褲，覺得自己真係依個行業之恥。
查下維基，發現葉繼歡早係阿爺攞返香港之前已經犯案無數。
1984年，佢係尖沙咀老笠一個金行，比班差佬捉到後，借尿遁走左佬。
1991年，佢拎住枝AK出黎掃射，又搶左價值一千萬既金飾。
係接下黎幾年，又食左無數既大茶飯。
1999年，比人判入獄，36年。
葉繼歡最後淪落至係獄中受洗成為耶拎。
張子強，又名大富豪。我最欣賞依位前輩，因為佢所做既事，係三個之中最轟動，甚至揚名世界。
1991年，係啟德機場搶左間解款車，入面有1.7億港紙。跟住比警察捉左，佢竟然上訴成功，當庭釋放。
1996年，佢挷左李嘉誠個仔，要求同旗下長江基建股票NUMBER一樣，1038，即係10.38億元。如此巨額被列入世界紀錄。
1998年，張子強走佬返大陸，最後比阿爺處死左。
季炳雄，末代賊王。
犯下既事蹟同葉繼歡差唔多，所以就唔詳講啦。
最特別係佢比人捉左之後，話人地捉錯人。
不斷話自己係關德興，唔係季炳雄，痴咗線。
依三位賊王，雖然下場都唔係好好，但佢地既事蹟，已經激發咗小弟既小宇宙。
我內心都好想好似佢地咁，食大茶飯食到上報紙，上電視。
果種感覺一定好痛快。
好，我決定要成為新一代賊王，再唔要手上都係底褲，要做單勁既出黎。
2017，報紙上再唔係佈滿我地行業飛黃既事跡，上面總係充滿三個數目字。
六八九。D人又好鍾意係前面，加一個英文字母，同一個七字。
成日係到D7689，我心諗其實依個係唔係車牌？
我係巷度老笠完條港女。
佢口裏說不，身體卻很實誠，雙手遞上左錢，跪地求饒。
今時今日咁既服務態度係邊度搵。
我丟低手上D底褲，心懷感恩咁拎左港女d錢。
前日我既收穫重係得d底褲，
今日睇黎我終於要轉運啦。
「多謝合作，小姐你可以走啦。」
說時遲，那時快，條港女即刻唔見咗影。
係呢個時候，我果肚叫咗，係一個非常淒厲既叫聲。
我相信依家，已經係下午茶時間。
無錯，透過肚既叫聲，我先知道依家係幾點。因為我無手機，無錶，無樓，無女，無車，好在仲有工番，同人地講既「五無」真係有過之而無不過。
我係一個敬業樂業既人。
生活除左老笠之外，淨番既娛樂就係睇下報紙，去圖書館睇下書、上下網，暸解下時事。
D人成日話香港點好點好。
落到黎D同鄉又成日同我講，捱多七年，你攞左個咩身份證，一天都光晒啦。
老笠整整七年我咩風浪未見過呀！
03年撞正個沙士，我用條底褲當口罩，繼續開工。
08年對雷西兄弟偷晒人地袋入面D錢，我甚至食底褲過活。
七年又七年，身份證攞左啦，又有咩改變姐。
我靜係見到更多既同鄉落黎同我爭生意，同埋人地銀包入面d錢無多過。
近排我終於儲夠錢，去深水涉鴨寮街買左隻錶，幾日就壞咗。好，好在佢唔會爆。唔係手都無。唔係唔知以後點做野。
老笠番黎既錢，捉襟見肘，僅僅可以過下日子。
我拎住岩岩老笠完既辛苦錢(當確係辛苦錢，老笠十個都唔知有無一個比錢而唔係比條底褲我)去左輝記茶餐廳，叫咗個波羅油，加杯熱奶茶。
識叫一定咁叫。
輝記d波羅包熱辣辣新鮮出爐，口感脆，又唔淋，熱奶茶濃郁而又香滑。
我最鐘意老笠完人之後，過黎食。
我問岩岩將野食遞上黎既輝叔︰「喂，輝叔點解D人成日要D7689。」
輝叔就話︰「好意頭囉。」
「下，點好意頭呀。」我唔係幾明。
「將個六掉轉，未有兩隻九，代表可以活到九十九歲。」
「七八呢？」
「未姐係可以有七個老婆，八個妾侍。」
「原來係咁。」
遲D我做完大荼飯，買部車，車牌一定要用依個號碼，衣錦回鄉，揸住間車返大陸。依鑊我仲威唔過海洋公園個威威。
「痴線，你地識唔識野價，雷到死。」
眼見講野既係一個頭染金毛既MK仔。
「689係特首。」
「特首？」我同輝叔異口同聲。
「唔係領導咩？」
「原來係大陸拎。唔怪唔知啦。」MK仔白我地一眼。
「擺領導個名係車牌，都好威姐。」
個MK仔聽完我講依句野，佢頭也不回咁樣走左。
「Hi Auntie佢個奶呀，個靚仔仲未比錢就走咗。」
輝叔憤怒了。
我並無理會輝叔既憤怒，而係開始係到諗，我要點樣先可以開始我既食大茶飯計劃。
----------------------------------------------------------------------------------------------------------------
植入式作者的話:
小弟平生無咩叻，最叻係道FFd故仔，
如果鍾意我既作品，歡迎黎我既專頁
https://www.facebook.com/graylittledog/
比我一個Like，比我知道你既支持，比我有更大既動力去創作。
想睇我其他作品，或者想追故仔最新既動向可以去依道
https://www.shikoto.com/author/11830/%E7%81%B0%E8%89%B2%E5%B0%8F%E7%8B%97.html