係呢間大學終於黎到最後一年了。八月尾又再次搬入熟悉既宿舍。

「等埋!」Chris大汗搭細汗既佢拖住Gip 追入去Lift到。

「唔該、唔該。」Chris連聲道謝Lift內幾個新既臉孔。

可惜,Lift內既人都因為外面太熱而閪哂臉。

唯獨一個女仔閪臉得黎又紅卜卜,幾搞笑,成個小學雞咁。



而呢個女仔,係Chloe。

Chloe唔係一個嬌小型既女仔,只不過搬屋呢啲超粗重事都唯有向爸爸求救,所以搬入黎果日簡直一家大細浩浩蕩蕩咁入黎。

一齊入𨋢既屋企人卻永遠都唔知道呢個𨋢曾經送過幾多隻羊入虎口,好可能包括佢地個女。

幾經辛苦,Chris、Chloe同好多其他既同學仔都已經係宿舍Settle好哂,黎緊星期五樓聚係每層一定有既節目,亦係一餐To see and to be seen既晚餐。

目的係咩?除左各自物色異性之外,仲有識定啲睇落岩傾或半夜救到你命既朋友仔。



例如阿邊個邊個踢波Fit既、LOL有鑽既、鍾意打牌既、主修賭馬既、條女大波既、條仔大隻既、同Major既、有相同興趣既等等等。

Chris同Chloe有一面之緣,不過Chris又無幻想啲咩。


一幢宿舍靚既女仔唔多但亦都唔少,住過一年都已經聽同見過唔少光怪陸離、嚇撚死人既愛情史,性同愛係呢個地方又幾咁廉價,所以都無乜值得期待。

之不過要確保多啲人出席,Tutor都會主動去R下啲新hallmate黎,Tutor叫到,Chris不單要準時到更加要幫手事前Pm下人。

一個新既WhatsApp group最重要係氣氛,Chris引領之下,大家都紛紛報上名來,一堆素未謀面既人突然間變到好熱鬧,其實都幾荒誕。



「有冇人打牌架?」Chris問。

「Me!」未出過聲既Chloe秒回咗。

「香港牌?128?」Chris問。

「無問題。」

「好,星期五飯後雀局!」

星期四晚Chris準備打電話去訂枱時,望下WhatsApp 傳緊既出席名單, 發現Chloe原來無留名。

咁但係佢之前又話咗好,見佢幾靚女,唯有PM去確認下啦。

「Friday Join?」Chris好簡潔咁問。



「我應該OK呀,Sorry無講到。」Chloe隔咗一陣就覆咗。

如是者,星期五晚就由街外飯局開始,Hall既雀局完結。

一點幾,對於住慣屋企既新人黎講,時間都唔早喇。


Chris開始同其他老鬼執牌、收枱,但其實大家都未眼訓。

於是一行幾人諗住入Chris房小飲幾杯吹下水。

「Chloe,我地去飲下酒、玩下Game,你一唔一齊?」Chris膽粗粗就問埋新雀友Chloe。

「好呀。」Chloe出奇地爽朗咁答應。



整整六人從啤酒、紅酒玩起,由圍枚撞機玩到痴線佬、king's cup,轉眼又已經三、四點,成間房既人都已經醉醺醺,講得上係滿天酒氣。

每班酒肉朋友入面都總有一個會發酒癲,又或借醉行事既人,而Jason絕對經典中既經典。

佢飲酒之後好鍾意鳩叫同扔野,好彩既係佢自己部電話、唔好彩既係人地部電話。

今晚Jason又太興奮喇,半醉之下一野車咗隻玻璃杯落地下,不過在場既人都真係太醉,根本無人有閒情逸致去清啲玻璃,除咗Chris。

Chloe飲咗成兩個鐘都未去過廁所,尿意終於超越左醉意,佢緩緩咁想穿過一條條既死屍走去廁所,之不過佢完全忘記咗Jason怒扔咗果隻玻璃杯。


「小心!」正當Chloe就踩上玻璃之際,Chris一手公主抱起左Chloe。

「屌,有玻璃架!」Chris好自然咁放返低Chloe係無玻璃既另一邊。

Chloe係一刻間醒哂,係到回想究竟岩岩發生左哂咩事。



另一邊,Chris咁做只係出於自然反應之下唔想朋友受傷,換著係on9 Jason佢一樣會公主抱佢。

至於Chris對Chloe有好感又係另一回事。

Chris成晚從食飯到飲酒都特登咁坐係Chloe對面,一係可以自然而唔尷尬地打量Chloe,二係可以同Chloe保持距離。


Chloe絕對算得上個靚女,雖然當佢唔講野又唔笑時望落有啲高傲,但白皙既膚色、自然啡色及肩既長髮同精緻既眉型、紅唇同埋一個整齊對稱既笑容,已經令Chris目不轉睛。

只不過Chris怕既係自己,Chris既過去已經唔能夠用一個「花」字去形容。

Chris 見證亦經歷咗好多荒誕既事。

原本Chris已經做好心理包袱打算最後呢一年係GPA上再創高峰,只差一點點Chris或者就可以直跳上PhD program,踏上自己最夢寐已求既學術殿堂。



理性上,最後呢一年真係完全唔應該投放任何時間係感情上。

可惜,計劃總係趕唔上變化。Chris對Chloe刻意既迴避其實咪就係已經心動咗。

------

第二朝起身時,睡眼惺忪既Chris一落床望到地下一地垃圾,連玻璃碎都有,見識不少既Chris都嚇左一跳,好彩Chris既Roommate長期都係女朋友到訓,唔係實嚇死佢。


可能係屋企住左成個暑假,酒量差左好多。

頭痛欲裂既Chris突然又想起Chloe。

「11:03 A mess in my room.....」Chris嘗試係WhatsApp同Chloe開展對話。

Chris開始左慢慢執整地既垃圾,完全無為意枱上個電話,Chloe岩岩秒回咗。

「11:04 Need help?」

「11:38 Yes ah」Chris一見到即刻放低哂手頭上既垃圾袋。

十五分鐘後,毫無消息。

「11:46 訓醒未呀」Chris忍唔住補多左句。

似乎都係無回應,Chris見有啲肚餓就決定執埋眼前D雜物就落去食個飯。

「11:53 醒咗。吹埋頭過黎啦,岩岩沖緊涼。」

咁又唯有等埋Chloe啦。

係大家都宿醉既情況下,Chris同Chloe一齊單獨咁係Canteen食左第一次飯。

「係呢,你一陣有咩做呀?」Chris同Chloe講。


「無呀,今日成日都無野做呀。」

「識玩呀,留低成日Hangover。」

「邊有呀,原本都無諗住飲酒既,係真係無野做囉。」

「哈哈,我都無呀。」

「咁執完野不如睇返套戲?」

「我ok呀。」

Chris已經確確實實地心動咗,因為平時既佢一定訓個晏覺,但今日佢地就係Chris既床上規規矩矩咁睇戲。

為求應景又好笑,Chris揀左套自己睇過既Hangover黎播。

眼訓、劇情、內容係呢一個晏晝對Chris黎講都唔重要,因為Chris未敢同Chloe談及私生活既部分,Chris亦未敢置身係一個要做決擇既十字路口。

Chris只着眼咗係目前呢一段自己既小幻想入面。