自從住咗hall先知，扑野原來可以咁簡單: 《七、我們仨 》7.1

記得我啱啱入hall果陣咩人都唔識，我遇到我第一個係hall既朋友。

佢係同我一樣打開壁球既Dennis。

我地兩個係中學既學界已經識，不過完全唔熟。

後尾升咗上黎大學之後都會撞到下，都會打下招呼咁。

「咦，Mavis，你住呢個hall架咩？」嗰時Dennis一入lift見到我，佢一臉驚訝。



「係呀，我啱啱調咗過黎，之前個hall太嘈，我頂唔順。」我吐吐舌頭同佢講。

「哦，咁真係橋喇。我都係呢個hall架。你幾樓呀？」佢好淡然咁問。

「二樓。」

「屌，我又係喎。得喇，得閒介紹啲friend比你識。」

臨出lift前，Dennis補多句：「係呢，你識唔識打牌？」



「識既，不過好廢架喎。」我有啲尷尬咁答佢。

「掂喇，下次打牌搵你。」佢拋低呢句。

就係咁，我地交換咗電話，就各自返咗房。

－－－－－「Hey, 係hall？」過咗兩日，我收到Dennis第一個Text。

「做緊project呀，做咩？」我隔咗一陣睇到電話就覆佢。



「打唔打牌呀而家？我地三缺一喎。」

「但我趕緊Deadline喎，晏啲打通宵就得。」

「其中一隻腳隔離hall架，咁唯有下次喇。」

呢次之後，Dennis都有再問我打唔打牌，但好多次都夾唔啱時間，所以就成唔到事。

直到有次，佢問我睇唔睇joint hall既足球比賽。

「You go soccer tonight? 」佢係晏晝問我。

「幾點架？我未做哂功課呀。」我心入面諗，我係hall咩人都唔識，就咁去睇好似好戅鳩好odd。

「八點半就完架喇，一齊去啦。」佢咁樣答我。



嗰時我見佢誠意拳拳咁邀請我，我出於新人入hall既心態都唔好意思推佢，唯有應約。

「7點lobby等喇。」

我抱住個戰戰兢兢既心情，換好衫就落咗去lobby。

「Mavis，呢個係我女朋友Sonia，呢個係Connie，都係我地層架。」Dennis隔離企咗兩個女仔，佢地兩個都幾靚女，估唔到我地hall既女仔質素都唔錯。

「hello，我叫Mavis呀。」我同佢地打咗個招呼，我地就一齊行去球場。

沿途上我同兩個女仔無乜交流，全程同我傾計既都係Dennis。

「你想return既話一定要參與多啲hall既活動，唔係既話無人認得你，唔會return到架。」佢好熱心咁同我講hall黎緊有咩活動，叫我一定要參加。



「哦，好呀，有咩叫我囉。」第一年住hall既我咩都唔識，唯有附和一下已經住咗兩年既老鬼Dennis。

呢次我同Sonia同Connie都無太多既交流，唔知佢地係咪唔想同我講野呢。

之後每次叫打牌，都會係Dennis同我聯絡先。

即使打咗幾次，我同Sonia既關係都唔算話熟咗好多。

可能因為我同Dennis本身就識，我覺得佢已經係我喺hall最熟既人。

「今晚一唔一齊食飯？」Dennis幾乎隔晚就會問我一次。

而我知道，佢問我既同時，一齊食飯既意思唔係同佢兩個人食，而係同Sonia三個人一齊食。

「呢個組合都幾老尷喎。」我暗忖。



不過我得閒都會照去食，反正我平時都係一個人食飯。

多兩個人陪我講下野好過無既。

－－－－－－－

隨住打牌既次數增多，我同Sonia兩個女仔就開始熟絡起黎。

我地兩個都唔祟韓，反而都係上開高登，仲係年資頗深既會員。

因為呢樣野，將Sonia同我既距離拉近咗好多。

我無諗過一個靚女會咁毒。



「喂你有無睇呢個post呀，好撚好笑。」佢開咗條link比我睇。

「屌有呀，真係笑到仆街。」

而女仔正常都會化下妝買下衫咁，我同Sonia既衣著風格又好相似；

我地之間既話題基本上係無窮無盡。

加上我同Sonia都係超級夜貓黎，呢種作息時間令我地就算忙完成日，夜晚返到hall都會有得見面。

同層最好既就係，我一返黎佢地就會探個頭出黎。

「喂Mavis你又咁夜既屌！」Sonia最鍾意捕捉我啱啱返黎個樣。

我地既友誼就係呢個環境下萌生出黎。

之後既時間，我開始成日係Sonia、Dennis呢對情侶間房到出出入入，原因不外乎係一齊吹下水、飲下酒或者睇戲。

呢啲就係hall既日常生活。

雖然好平凡無咩特別，但呢啲就係現實生活。

我地每日就係咁無聊咁過。