直到佢生日前幾日,我睇到佢係ig story post咗啲好負面既野。

「你唔開心?」我始終都係忍唔住關心佢,可能因為我真係鍾意佢。

「好開心,你會關心我。」

「傻咗咩,做咩呀你。」

「無呀,我覺得我自己都唔係好理解自己。」佢咁樣講係咩意思,我到而家呢一刻都唔知。佢繼續講: 「係呢,你記唔記得我幾時生日?」



點會唔記得,你話過好易記。但係說算幾難記都好,我鍾意你就點都會記得住。

「記得,三月十五呀嘛。」

「叻女。同我食生日飯好無?」

個晚係我同佢嘗試斷絕來往之後,第一次再同佢出黎食飯。

平時出街佢會戴con,今日佢戴咗眼鏡。呢個係我見過最熟悉既樣,因為我多數見佢都係喺hall。



「我地食咩?」佢見到我之後同我一齊入閘,行去往油麻地方向既月台。

「無所謂,你生日你話事啦。」

「咁我地去鋸排啦,阿軒介紹,幾好食。」

我地坐低叫完野食,佢就開始同我講佢啲野。


「呢幾年,我覺得自己變咗好多。讀大學真係唔啱我,呢到識既朋友我覺得好唔啱玩,我完全唔想同人social。諗返起之前讀asso開心好多,而家住hall又悶,我真係快啲grad出黎做野算。」佢一口氣講咗好多野,總之都係表達佢覺得而家過得一啲都唔好。



「咩呀,你有阿軒佢地呀,見你同佢地都玩得幾埋。」

「阿軒今年好少返hall訓啦,成日得我一個無人陪我。」

「咁你可以同其他人玩架嘛,你又成日咁摺。」

「我就係唔想social,無興趣同其他人熟。」

佢就係一個咁奇怪既人。平時同我地打牌飲酒,佢又會好正常好開心同我地傾計,唔只係我,可能係對住hall既其他人,佢望落都係好融入到大家既圈子咁。

佢雖然成日話自己係毒撚,但係佢既外表一啲都唔毒,因為佢係個好識打扮既男仔。所以我有時都好疑惑,呢個人個腦到底係諗緊乜。

「咁你又要話悶,又要唔想social,好難幫到你架喎。」

「算啦,我係咁架,我都話過我份人係好負面,你識我耐咗就知。我讀書又唔叻,返工個到又做得唔係好過人,身邊個個兄弟都出哂pool,得返我戅鳩鳩咁。」



其實佢咁樣講我都唔知點樣應佢好。


佢講到自己好想拍拖咁,但係同我又無一齊,咁樣算係咩?

唔通我話「你咪有我囉」咁樣呀,我都係講唔出呢啲咁核突既野。

阿信咁樣同得我講,我心入面都好清楚個答案。

佢唔鍾意我先會同我講呢啲野,就好似當我係佢一個朋友聽佢訴苦講下經咁。

我諗我真係唔應該再對佢有任何期望,少少都唔可以。

個晚返到去,我地依然同之前一樣,各自返咗房。
同之前一樣,返到房無耐,收到佢既whatsapp。



阿信:Thank You

我:Thank You for what?

阿信:For everything you did 


我個心比呢句野震攝咗一下,我終於忍唔住問佢。

「其實你由頭到尾有無鍾意過我?」

「唔話你知。」佢始終都係唔肯講,其實我寧願阿信話無,咁樣我死心會死得快啲。

「你咁講我都知答案。」



「sorry,如果我再搵你係因為個啲野,你一定要屌醒我。」

呢晚,我無喊,但係我食咗一枝煙。


我唔係第一次食煙,但係我本身唔係食開煙,只係以前有試過。

我因為阿信,開始食煙。

唔係咩懶型既行為,我覺得女仔食煙好醜好肉酸,食落成個老江湖咁。

我諗大部份人都唔會鍾意食煙既人,包括我自己。

所以我都唔鍾意我自己。好垃圾。

不過我真係好想食,好似咁樣先能夠抒發到啲情緒咁。



你話食完會唔會開心啲,其實又唔會,反正就係想食。

有人話一醉解千愁。

飲酒會頭痛,食煙唔會,所以我食煙。

之後既日子,我偶然都會係hall area或者我地座hall撞到阿信,我地會點個頭say個hi,大家既距離又拉返遠。

我無忘記到佢,對佢既感情唔知叫唔叫淡咗,不過總算對我生活無太大既影響。

不過每當我食煙,多數都係因為我又諗起佢。

後來去到hall一年一度既annual dinner,佢又再搵我。