個晚阿聰一個人煮緊公仔麵,有個著住hoodie、下身係短運動褲嘅女仔入咗嚟,手上面拎住包出錢一丁。

佢見阿聰用緊個爐,猶豫咗一陣想轉身走;呢個時候阿聰開口:「你係咪要用個爐呀?我就煮完架喇。」

「er,係呀,唔該哂。」女仔即刻露出一個好放心嘅樣,同阿聰講:「咁我轉頭再出嚟,你用埋先,唔急架。」

阿聰煮完個麵就坐咗係到食,食到一半個女仔先返嚟。

「我用完架喇,你慢慢喇。」阿聰禮貌上講聲。



「好呀,唔該。」個女仔同樣地回應。

之後嘅氣氛格外地寧靜,無人出過一句聲。

唔知有無試過呢種情況:雖然你同一個陌生人共用同一個空間,理應唔講野係唔會感到尷尬,但只要一但開始咗交流,之後唔出聲反而會有一份尷尬同不安係到。

阿聰就係因為咁樣諗,所以就嘗試打開話題同個女仔講:「新年都係hall嘅?唔洗返屋企過年咩?」

女仔好似有啲意外阿聰會開口同佢講野,不過好快就答返佢:「屋企人唔係香港呀,所以我咪返嚟囉,反正都係自己一個。你都係喇,新年流流自己係到食公仔麵。」



「哈哈,係呀,同你一樣囉。」

佢地好自然咁傾落去,話題不外乎係講下自己year第、讀咩科之類嘅門面野。

「係呢,講咗咁耐,你叫咩名?」

「叫我靜怡得喇。」

到大家都食完麵各自返房,阿聰先知原來靜怡就係Cason口中,對面房新搬入嚟果個女仔。



明明一直以來阿聰都無撞過靜怡,但一識咗之後就好似冥冥中有注定咁,之後幾日出出入入都經常見到靜怡。一開始佢地都只會打個招呼,後來大家都會寒喧幾句,甚至試過頂住自己房門企係門前傾一陣返番房。

阿聰心入面覺得靜怡的確好似Cason所講咁係幾靚女,簡單啲講就係可供食用,不過有女朋友嘅阿聰都無諗太多,呢啲野留返比Cason好過。

而呢幾日嘅交流不疑令佢地好似突然拉近咗好多咁。

「咦,咁夜嘅。」阿聰個晚準備出去食飯,遇到啱啱出lift嘅靜怡。

「係呀,我頭先收工返嚟咋嘛。你咁夜去邊?」靜怡問佢。

「我出去食野咋,掛住做FYP都未食夜晚,餓到仆街。」阿聰講完之後摸摸自己個肚。

「哈哈,我都未食野呀,諗住煮個麵算。」

「咁不如一齊出去食喇。」



阿聰無諗咁多,純粹諗住兩個人一齊食個便飯。

靜怡眼入面閃過一絲猶豫,不過最後都係應承咗。

-----------------

沿途上佢地都無咩出聲,可能因為大家都未試過要對住對方一段頗長嘅時間。


靜怡著住件大褸,頸上圈住一條杏色嘅頸巾,不過佢都凍到係咁搓自己對手。

「你係咪好凍呀?」阿聰問。

「少少喇。」靜怡有啲靦腆咁講。



阿聰本身想除件褸比靜怡,不過又覺得似乎會做多咗,所以都係放棄咗呢個念頭。

「咁我地行快兩步喇!」佢唯有咁講,加快腳步行去茶餐廳。

由於新年嘅關係,附近嘅食肆好多都未開門,唯獨得呢間唔係特別好食嘅茶記全年無休,所以呢個夜晚都異常爆滿。

「叫兩個餸一齊share好無?」阿聰問。

「好呀。」

當晚佢地一邊食住魚香茄子同咕嚕肉,一邊傾起自己嘅事。

「點解你呢個sem先入嚟住嘅?」阿聰問靜怡。

「上個sem我去咗exchange呀,所以而家先返嚟囉。」靜怡微笑。



「唔怪得喇。仲以為你係新人而家先收到hall offer。」
「唔係喇,我舊年已經住緊呢間房架喇。」靜怡反問阿聰:「你呢?點解Year4先嚟住hall嘅,之前又唔住?」

「無呀,本來住得唔算太遠都廢時哂錢。但臨grad都係想體驗一下hall life,咪住囉。」阿聰淡然咁講。

「係嘅,人一世物一世,乜都要試下。」靜怡若有所思咁講:「唔係第時會後悔。」

食完飯之後佢地一齊返到自己個層,臨入房門之前靜怡問阿聰:「係呢,你今晚有咩做?」

Cason呢段日子因為同屋企人去旅行,所以開sem先會再返嚟;而Stephanie亦都跟屋企人返咗大陸而唔係香港,阿聰夜晚其實非常得閒。

「無呀,應該係房彈下結他、hea下咁掛。」阿聰答。

「咦,你識彈結他架?咁我地jam下歌好無呀?好耐無唱歌喇我!」靜怡聽到阿聰識結他,馬上露出興奮嘅神色。



阿聰見靜怡誠意拳拳,又唔好意思拒絕,於是就話沖完涼再搵靜怡。

「都係jam下歌姐,無事嘅。」阿聰心入面諗。

---------------
靜怡返到房之後,拎部iPhone出嚟望一望,Eddie都係無搵過佢。

自從去咗exchange之後,遠距離將佢同Eddie嘅感情同時拉遠,縱使佢地已經一齊咗兩年。雖然Eddie從來無講過分開,不過靜怡感覺到距離呢日不遠。

靜怡曾經嘗試過挽回,不過似乎無法令已經變咗嘅Eddie回心轉意。

而返到香港之後,Eddie更加成日搵唔同嘅藉口推搪同靜怡見面。

靜怡覺得好心淡,同時又好寂寞。

靜怡第一眼見到阿聰,就覺得佢同Eddie好似:戴住黑色圓框眼鏡;正常適中嘅身形;一頭清爽短髮;重點係成日著裇衫。

靜怡一向對著裇衫嘅男仔毫無抵抗力。

所以自從同阿聰認識之後,靜怡成日借意爭取同阿聰交流嘅機會。

好多時所謂嘅「偶遇」,都係靜怡刻意製造出嚟。

因為hall嘅走廊距離好窄,要聽到門外面嘅情況其實並唔難。

好多時只要細心一聽,對面房出入嘅開門聲其實好明顯。

靜怡就係捕捉住呢啲時刻,係阿聰出門口嘅時候同時打開自己道門,咁就會同阿聰「偶遇」到。

「Hi,去邊呀。」每次阿聰都會主動同靜怡打招呼先,而靜怡都會故作淡然咁回應,其實所有野都係佢預期之中。

當然,靜怡咁樣做嘅目的都係因為想見到阿聰。

不過佢自己都分唔到到底係因為阿聰太似Eddie;定因為佢真係想見阿聰。

反而呢種癮有增無減,所以佢更加樂於同佢相處。

呢晚佢仲主動話去阿聰間房Jam歌,其實靜怡希望可以同阿聰更加親近。

以前Eddie都會拎個結他同靜怡唱下歌咁,可惜呢啲日子唔會再返嚟。

沖完涼之後,靜怡著住camp tee短褲咁行過去阿聰房。

「hello,你ok未呀?」靜怡探個頭入阿聰房。

「你入嚟喇。」阿聰頭頂仲有未乾透嘅水珠,靜怡諗佢應該係啱啱沖完涼。

靜怡雖然心入面想同阿聰靠近更多,不過始終係男仔房,加上佢地嘅熟稔程度又未至於可以令靜怡當係自己房咁,所以入到房都只係企咗係到。

「你坐喇,唔洗企係到喎。」阿聰指指床上面嘅位置,而佢自己就坐係電腦櫈到。