自從住咗hall先知，扑野原來可以咁簡單: 繼續系列《五、ocamp · 戀愛嘅add drop period》5.2
「喂？」話筒入面傳來阿希沉重嘅聲音。
「點呀，你講啦。」我故作輕鬆咁講，試圖掩飾我嘅不安。
「唉，我都好亂，一時之間唔知點做好。」
「其實你係咪覺得我好隨便，所以你先咁樣？」我始終都係忍唔住高聲地質問佢。
或者我心裡面一直當佢係謙謙君子，而我又明知道佢只係當我係朋友；除咗佢覺得我容易食之外，我實在諗唔到其他理由可以自圓其說。
「唔係呀，我真係無咁樣諗過。」佢即刻解釋：「對唔住。」
「不如我地見面講？我想當面同你傾。」
「如果你只係想同我講不如當無發生過之類嘅說話，不如你而家講埋佢。」我冷冷地道。
「咁…咁當無事發生過喇，真係好對唔住。」佢充滿歉意咁講。
「好呀。」我瀟灑到好似若無其事咁答佢：「不過我想同你講，我會比你唔係因為我隨便，而係因為果個人係你。」
然後我就cut咗佢線。
我嘅面皮比紙更薄，承受唔起任何被拒絕嘅機會，所以我寧願以高姿態離場。
咁樣做或者比起做一個死纏爛打嘅女人更加好過啲。
我入咗廁所，打開水嚨頭，啲水係咁流出嚟，我啲眼淚都跟住一齊流。
「喊完呢次就唔好諗喇，人地無話過鍾意你架，唔好咁戇鳩喇李芯宜。」我望住塊鏡講。
呢次之後我就開始避開阿希，唔想再同佢有多餘嘅接觸。
無奈嘅係，搞ocamp令到我地無得唔見，甚至係日日都要見。
阿希：11:17 你瞓醒未呀，一齊食野？
個日原本預定兩點鐘係集合時間，同班freshmen見下面玩下game咁；
我一見到係阿希搵我，我就即刻倒頭大睡。
點知我一瞓醒已經一點半。
「仆街，瞓過龍。」我拎起部電話望一望，見到有十三個未接來電。
13個未接來電：阿希
「屌。」我當下無暇理會阿希打過幾多個電話嚟就好匆忙咁出咗門口。
然後我因為行得太急，結果仆咗係石屎路上面，成個膝頭都因而損哂。
「屌，真係黑到仆街。」我暗罵自己之餘都係組爸媽個whatsapp group到講：我嚟緊喇，啱先仆街所以遲咗。
去到課室之後，我見到阿希已經到咗，佢係遠遠望住我；而我見到佢嘅目光就隨即移開自己嘅視線。
幾個遊戲過後就係break time，好多人都係呢個時候出咗去，阿希亦唔例外。
到差唔多開始之際，我見到阿希拎住盒膠布走向我面前。
「你隻腳點呀，仲痛唔痛？」佢望一望我個傷口：「你一陣清潔完就用喇。」然後佢將盒膠布放係我手上面。
我心裡面有好多個問號，到底點解佢仲要咁關心我？
自從個日之後，阿希比起以前對我更加好同體貼，唔知一定以為佢想追我。
「你想食咩呀，我幫你買呀。」
「你唔好咁夜瞓喇，聽日要一早起身架。」
「你唔餓我同你兩份share一個飯喇。」
但係我心裡面好清楚唔係。
諗諗下，佢應該只係覺得自己有愧於我，所以想對我好去彌補返自己嘅過錯。
所以我都無再避佢，由得佢對我好。
我諗我地之間嘅關係就只剩下補償呢兩隻字。
－－－－－－
直到正ocamp當日，因為我同佢唔係同一組嘅關係，所以我地係朝早嘅集合時間之後，都無再見過面。
經過一輪跑hunt、無聊mass game之後，我同阿希個組去到夜晚嘅房game環節先再聚首一堂。
唔知係勞碌過度定休息唔夠，我覺得自己應該作感冒，開始不停咁打乞嚏。
不過身為組媽無理由一句唔舒服就掉低成班組仔女，何況當時只係十二點幾，所以我決定頂硬上。
「喂，我地玩殘廢捉衣因囉！」玩咗幾個game之後，Leo又再提議玩啲體力勞動遊戲，一班freshmen即刻拍手叫好，當時已經凌晨三點幾。
有幾個比較靜同乖嘅freshmen就話想瞓，呢個時候阿晨開口話：「嗱，想瞓嘅就留係到停屍間，想繼續就隔離房玩喇！」之後阿晨同其他爸媽就帶住一班精力旺盛嘅freshmen過咗隔離房。
「喂，我有啲唔舒服呀，真係屌唔住，今晚你地幫我頂住先喇。」我係Leo臨走之前同佢講。
然後我地幾個留係房嘅人就熄哂所有燈、各自拎起個枕頭，就咁瞓係鋪佈床褥嘅地上。
阿希：03:49 你去咗邊？點解唔過嚟玩嘅
我：03:50 我唔係咁舒服，想抖下
隔咗唔夠五分鐘，我見到房門打開咗，企係門口果個係阿希。
佢一手拎住個枕頭，躡手躡腳咁行去我身邊。
在場嘅人早已經呼呼入睡，此刻依然清醒嘅得返我地兩個。
「你過嚟做咩呀？」我細細聲咁問佢。
「嚟陪你。」佢係我耳邊講。
「唔洗啦，你返去玩喇。」我推開佢。
「唔得喎。」佢一野瞓咗係我隔離，摸一摸我塊面話：「你病咗我要睇住你。」佢再錫咗我額頭一下。
如果呢刻唔係漆黑一片，我塊面應該好紅。
然後佢就攬得我好實，好似生怕我會離開佢咁。
我地好純粹咁相擁，直到我地都幾乎瞓著，佢先捨得放手：「我地唔好攬住瞓喇，聽朝比人見到就麻煩。」
雖然心裡面再次浮現好多問題，亦不解佢而家嘅行徑算係咩意思。
一切似乎都已經超越咗補償嘅行動。
不過無論點都好，有咩事都應該要等個camp完結先再講。
第二日一瞓醒，我並無好轉到，反而好似比前一晚更加嚴重；除咗不停流鼻水之外，身體都感覺到沾寒沾凍咁。
「你頂唔頂得順架？不如你今日唔好玩，你去瞓喇。」阿希皺起眉頭咁講。
「我OK呀，仲頂到。」向來有責任心嘅我絕對唔想自己因為唔舒服而中途離隊，所以無論如何都要頂硬上。
後來阿希返咗房間一趟；到出返嚟嘅時候，身上面多咗件外套。
「嘩，你發冷呀？三十幾度仲著件咁厚嘅褸？」佢個組嘅組媽Vivian一見到就問佢。
「屌，你理我呀。」佢擺一擺手，無視組媽Vivian講嘅野。
之後晏晝嘅活動我都毫無精力，心裡面只係想快啲到食飯時間，等我可以坐低休息。
「喂，你著住喇！」後來阿希見到我係咁打乞嚏，連紙巾都用咗幾包；佢除咗件外套比我。
「你唔凍咩？」其實以當時夏天嘅溫度，我諗係得我會覺得凍。
「你著喇戇鳩，你病又唔係我病。」
我好開心咁笑咗笑，之後全日都著住阿希件外套。
雖然身體上嘅凍仲係揮之不散，但係心裡面真係好覺得好溫暖。
而當晚嘅重頭戲就係營火晚會，即係我地口中嘅camp fire。
呢個環節除咗要跳好白痴嘅camp fire舞以外，就係比一眾搞手大講自己感受、成班莊員組爸媽係到喊哂口咁嘅感動環節。
我諗因為我第一次玩ocamp，所以我自己嘅感觸其實唔係話特別大。
反而係個營火更加震撼我嘅人心。
可能因為我第一次親眼目擊camp fire個火有幾盛大，心裡面無疑係覺得好壯觀。
望住熊熊烈火，心裡面諗起搞ocamp呢段日子；其實ocamp玩咩根本唔重要，最重要係你遇到咩人。
「而家請各位爸媽同自己嘅組仔女圍圈，大家分享下自己係呢個ocamp得到啲咩。」MC一聲令下，人群即時變成一個個圓圈，我地組都一樣。
阿晨、Leo同另一個組爸Ken，佢地都紛紛大吐心中情。
到我嘅時候，我只係講咗句：「ocamp玩嘅野可能好戇鳩，不過係呢到有機會會遇到對你好重要嘅人，佢甚至會陪你行埋之後大學生涯嘅每一段路。」
「所以如果你搵到呢個人，記得要好好珍惜佢。」
到分享完咗，大家都爭相係個營火面前影相，喊嘅有、笑嘅又有。
「喂，我可唔可以同你影張相？」我鼓起勇氣，走去阿希身邊問佢。
「好呀！」佢笑咗笑，之後跑去叫人幫我地揸機。
阿希搭住我膊頭，而我成個人都傾向佢身體到。
我同阿希就係營火面前留低咗一張倩影。
我諗呢張相就係我同佢呢段日子發生過所有事嘅憑證，無論最後如果係點都好。
－－－－－－Ocamp完結之後，我同阿希依然好似之前咁相處，佢對我仍然係好好。
我已經唔認為呢種好係單純嘅補償，我心裡面確信。
雖然佢無開口，但係我覺得佢一定係鍾意我。
「喂，阿希，你輸喎，你要同KiKi打車輪！」個日成班爸媽出嚟打邊爐，我地又係到玩埋啲戇鳩game，點知阿希輸咗，成班男仔要佢同另一個組媽打車輪。
坐係阿希隔離嘅我心裡面當然不是味兒，我無同其他人一齊好落力咁起哄：「咀佢！咀佢！」
然後阿希同KiKi真係錫咗。
之後成晚我都無乜再出過聲，阿希都感覺到我塊面黑到仆街。
「喂，一陣同你一齊搭巴士呀。」佢邊碌塊肥牛邊係我耳邊講。
「我今晚唔返hall喎。」我冷淡地回應。
「我送你返屋企囉。」佢再講。
飯局完結之後，我同阿希就走去搭巴士，條街亦因為深己夜而人煙稀少。
「我今晚返荃灣。」我同佢講。
「咁咪好順路囉，好野。」佢輕鬆地講：「做咩呀你？」
「無呀，覺得你好隨便姐，人地叫你錫你就錫。」我好不滿咁講：「而家你地交換哂口水咁，KiKi係咪已經係你嘅人喇，下？」
佢聽完之後就停低咗，然後雙眼定定咁望實我：「以你呢個講法，咁你係咪一早已經係我嘅人喇？」
我一時反應唔嚟，頓時語塞，然後先話：「唔明你講咩喎。」我就繼續向前走。
阿希拉住我，將我成個人拉向佢面前：「喂，唔好嬲喇。我應承你，以後李芯宜就係我嘅人，無第二個。」
「你鍾意我咩？你對我嘅好唔係為咗補償？」
「一開始我都以為係，後來我發現我對你嘅行為係常理解釋唔到，我平時一定唔會咁樣做。但係我又毒撚性格唔敢開口，所以…」佢唔好意思地搔搔頭。
「咁即係點呀而家？」我忍唔住笑咗出嚟。
「比個機會我好無呀，芯宜。」佢攬實我講。
就係咁樣，我同阿希居然咁樣就開始咗。
聽好多人講ocamp係出pool嘅好季節，又會有人因為咁而分開、嗌交；加上我同阿希嘅事，我真係覺得ocamp係戀愛嘅add drop period，有人前來有人離去。
至於我地嘅結局係點？我都唔知架，因為而家阿希就瞓咗係我隔離，靜靜地睇住我打呢個故事。
「I love you，芯宜。」佢係我耳邊講。