新手作家的共鳴: 理念

    到底，我地堅持甘耐，系為左啲咩呢？

    就好似拍拖咁，你中意一個男/女既，點解？

    可能只系熱情，可能佢好靚或者好型，或者純粹只系作為備胎咁存在，或者系你自己想要保護佢……

    同樣問題，其實有唔同既答案。

    好多人都係覺得為左名利，覺得能夠曝光於大眾面前，先可以達到依個目標。演員要背稿，畫家通常要死後先發達，做作家先系正途……





    又或者純粹只系將作為當成一個踏腳石，揾到其他目標之前當系備胎一樣存在……

    或者你自己覺得自己宜家既魅力值唔夠比你去沾花惹草，可能你既目標覺得文學風格先系佢杯茶……

    甚至，難聽一啲，純粹為左自己既熱情。

    無論系點，我都覺得，既然你都已經開始，就唔好結束。

    我講過，我自己系想用自己既創意，創造一個住滿自己筆下所有人物既世界。





    但係，我唔敢話咩我自己唔會改變。始終我自己只系一個form4既學生。自己既生日花系雪花蓮，代表住改變……

    人會成長，成長過程會帶來改變。

    自己有玩開塔羅牌，啲friend揾我占卜既時候我成日都話，命運系可以改變，響唔同既時間用唔同既心態進行占卜，帶來既結果都唔會一樣。就好似一秒前你冇諗過自己死纏爛打會對對方帶來麻煩，可能結果會系逆戀人或者逆愚者，但係可能下一秒你意識到原來死纏爛打只系會GG快啲，你自己得到成長，占卜起黎可能會達到一個好結果。

   其實，如果用一個唔同既心態連命運都可以改變既話，同時，點解成長唔可以帶來其他既改變？

    冇人知道改變到底系好定唔好。





    如果大家都知道改變既後果，可能就唔會有病態賭徒。

    但係，作文就根本唔能夠用依套理論解釋。

    作文既情節可以改，作文既角色可以變，但係作文既目標絕對唔能夠變，尤其系往負面既方向變。

    再次舉個栗子，之前自己作開既《奶爸》系列，就係因為自己既改變，放棄自己工作左三個月既努力。

    浪費幾個月事小，但係歪曲自己本意事大。

    有時候，自己迷失，自己唔知道自己究竟響度做咩，可能就係自己既本意已經被歪曲。我每一次刪除文章，都係因為自己已經迷茫。我唔會怪責社會，因為縱使社會令我迷失，但係忘記初衷，系最可恥既一件事。

    如果熒幕前既你，系一個新手，系一個滿懷熱情既作家，在此送上安徒生筆下，《夏日痴》既一段。

    雪花蓮





    陽光撫摸並且吻著花兒，

    叫它開得更豐滿。

    它像雪一樣潔白，

    身上還飾著綠色的條紋。

    它懷著高興和謙虛的心情昂起頭來。

    雪花蓮系冬天開花既植物，但係故事之中，一朵雪花蓮居然響冬天癡想夏天，慢慢開花。

    象征住既系，一啲為左自己理想可以無視壓迫既人。





    如果相反，你係一個已經對世界失去理想既人，送上可口可樂公司總裁既一句話：

    我們每個人都個像小丑一樣，玩著五顆球，這五顆球分別是你的工作，健康，家庭，朋友，靈魂，其中只有一個是用橡膠做的，掉下去會彈起來，那就是工作。另外四個球都是用玻璃做的，掉了，就碎了。

    如果世界給予你壓迫，難道你就自己自甘墮落，令自己既目標夢想，跟住你既靈魂，一齊犧牲比一個橡膠波？

    ……

    如果社會唔容許，如果世界壓迫，都希望

    執著追求自己夢想同生命價值，

    毫不懼怕現實世界中風霜雨雪逼迫，

    相信，唯有咁樣，先系對社會，對所有睇你唔起既人，最好既報復。