那些年，我被女朋友狠狠地戴了頂綠帽: 外傳－分手後的我

同啊言分手個一日，我係異常地冷靜。
正常人返到屋企，可能會喊到天光，再絕食三日，最後搵朋友哭訴。
以上既野我全部都冇做。
我返到屋企，第一件事係同屋企人打招呼，然後沖涼。
我重邊沖涼邊唱歌，然後再同朋友打機。
唯一唔同既，就係我冇再抽時間同啊言sms。
以前幾忙，幾多野做，幾攰都好。
都一定會搵佢，風雨不改。

係個個時間，我拎住部手機。


好似有千言萬語想同啊言講，但係我一句都講唔出口。

重有一個改變，就係我發夢會見到啊言。
每次個夢都唔同，有時係回憶，有時係幻想緊 如果冇同佢分手會點。
直到現家我都有發夢見到佢。

因為我掩飾得好好，基本上所有人都唔知我同佢分開左。
直到有同學問起，我先淡淡咁講出黎。

分左手之後，我既生活就係咁。


我以為 我放低左佢。

當我過左一段時間之後，當我重遊舊地既時候，
我先發現啊言一直係我心中。
記得我係正文 講述心臟受傷個一段？『我個心臟傳黎劇痛。
就好似畫左我一刀咁，初頭只係有條傷痕，不痛不癢，
但係慢慢咁，你會睇住啲血飛曬出黎，
最後你會失血過多而死。』

回憶都係一樣，一開始係好冷靜，慢慢咁你先感受到痛


個種痛 唔係一，兩日；係一，兩年。

當我經過啊言屋企既時候，我就諗緊佢做緊乜野。

當我經過冒險樂園既時候，我就諗起佢同我玩到身水身汗。

當我經過書局既時候，我就諗緊啊言會唔會再送書俾我。

你做既每一件事，每一個地方
都好似有佢既影子咁。

時間唔可能忘掉一切，只能淡化。

不過現家既我，生活得都算不錯。