【邪惡迪士尼系列】《白雪公主與七個毒撚》: 第四章
許漢壓根都對喱件妹妹仔無興趣，一見到佢身材同男人無分別嘅身材，就無曬胃口。
拎去賣幾個錢都好，然後去風流快活就好啦。
但白雪公主都唔蠢得曬嘅，佢都感覺到即將發生啲唔好嘅事……
「你想做咩呀？」
白雪公主下意識地退後。
許漢一步一步壓迫過嚟，對住白雪公主露出各式各樣嘅奸笑，「嘻嘻嘻嘻……」
生平，白雪公主頭一次感受到害怕。
喱一種驚，係對於接落嚟唔知會發生咩事而驚。
對未來感到恐懼，脫離咗自己嘅舒適區係會咁不安。
白雪公主終於體驗到，咩叫危險。
「做咩呀你？喊呀？」許漢嘅語氣帶點嘲諷。
許漢認為白雪公主唔抵可憐，佢係需要受啲教訓！
就好似佢之前咁。
未受過殘酷嘅生活，係唔會識得成長，如果無嗰啲地獄嘅生活，佢應該都仲係好天真無邪。
許漢變咗，變得唔再天真。
「哈哈哈哈！依家時候仲嚟喊有用咩？」
「諗下點樣生存好過啦白痴！無人會救你，慢慢你就會大過架啦！」
白雪公主驚到喊係好自然嘅反應，同時佢因為接受唔到有咁嘅遭遇而崩潰。
一艘船如果習慣係無風無浪嘅環境下航行，當佢一遇上風浪，就會沉。
許漢上下咁打量白雪公主，「你……你咁嘅身材呀，我咁咸濕都無興趣啦！」
許漢並不知道喱一句說話對女仔嚟講，係幾咁hurt，好打擊白雪公主嘅自尊心。有咁嘅身材，佢都唔想架。
白雪公主對住許漢怒目而視，滿肚子都係怨氣。
「依家呢，帶你去雞竇之前就帶你去換件衫啦！無理由俾你著件粉紅色衫去嘅。」
「快！走！」許漢又試強行拉走白雪公主。
白雪公主今次無再反抗，反而好似接受咗命運咁。
面對住自己無辦法改變嘅情況，唯有試著去接受。
白雪公主狼狽咁爬上去馬匹度，雙眼無神，衣服都凌亂不堪，好難想像佢之前係一個身光頸靚嘅公主。
許漢往森林嘅深處走，相信穿過喱一個森林，就會見到城鎮。
茂密嘅森林裡散發著神秘嘅芳香，樹木有成40-50層樓高，就許許漢都不禁自問：「喱啲樹點生架？！成40幾層高。」
喱啲樹一定有好耐歷史。
樹與樹之間都密不透風，連一啲空間都無，陽光更加唔洗講，點樣左穿右插都插唔到入嚟。
左右兩旁嘅樹都好自然咁排成一線，形成一條馬路，供許漢佢行走。
係樹蔭下僅僅透出一丁點光線，感覺就好似就快入夜嘅時候，可以見到前面嘅光線唔多。
許漢憑感覺係樹林入面行走，佢哋都行咗好耐，但都未見到森林嘅盡頭。
佢暗暗覺得奇怪，點解好似行極都係同一個地方咁無咩點變？
許漢回頭望一望，後面嘅光景同前面嘅一模一樣。
加上極高嘅樹木俾佢哋一種詭異嘅感覺，打從心底寒起上嚟。
儘管許漢心有恐懼，但都唔想係白雪公主面前流露一分出嚟。
「喂…」許漢輕叫白雪公主一聲。
無回應。
「喂…」許漢暗暗覺得奇怪，頭先回望嘅時候白雪公主都好似無咩嘢咁。
許漢再望真啲，發覺白雪公主已經六神無主，行屍走肉咁款。
係喱個森林入面，更加睇唔到一絲希望。
不久處，許漢終於見到有間小屋，係森林嘅盡頭。因為條路嘅終於就係小屋，無第二條去路。
「屌，咁辛苦入到嚟，點知係無路走嘅！」
許漢計過啦，由喱度出返去再搵第二條路去城鎮都要一兩日時間，佢仲要返去同陳紅交差架。
許漢把心一橫，不如就賣俾喱戶人家？做個奴僕都OK。
喱間小屋十分之古老，小屋由木製成，啲木有好多裂縫，望落去殘殘舊舊咁。
許漢心中大喜，『係啦！俾喱個嬌生慣養嘅公主體驗下窮人嘅生活都好，嘻嘻。』
諗到咁，佢嘴角就向上翹，笑面迎接屋入面嘅人。
「有無人呀？」佢聲音有點因為興奮而抖震，敲一敲門。
過咗一陣，有人開門，一把低沈嘅聲音響起，「係？」
出嚟開門踠係好矮嘅男人。
留著一個油頭，唔係將頭髮都往後梳嘅油頭，而係蓬鬆，亂到好似雀巢咁，個頭油到反光。
臉上都係一撻撻嘅暗瘡印。
許漢同白雪公主見到都嚇一跳，因為佢哋第一次見到咁樣衰嘅人……
不過兩個人嘅反應係唔一樣嘅，前者係好開心，後者係唔開心。
白雪公主終於有反應，唔再好似一舊木咁。
「喂！你真係諗住……？」
「我唔想呀！我真係唔想係喱度生活…」白雪公主面容扭曲，本來已經認命嘅佢，勢估唔到會咁樣。
「求下你呀……唔好揼低我呀…」不可一世嘅白雪公主，從未求過人。
今日係佢人生最大嘅轉變，一瞬間由天堂跌落地獄，連凡間都未曾掂過。
許漢見到咁，心生一點點憐憫，因為佢嘅求情而打動咗佢。
其實許漢係個好善良嘅人，只不過講嘢係直咗啲姐。
但當佢見到白雪公主一身粉紅色連身裙，打扮得十分之高氣，提醒咗許漢。
眼前喱位少女係不久之前係一名公主。
「求？我係你城堡入面求咗人哋幾多次放我出去，但結果呢？有無因為咁樣而理我呀？」
「喂喂喂！你哋想點架？！嚟運吉架？」幫手開門嘅毒撚見到唔耐煩。