[愛情浪漫］［懸疑] 求婚。求分: 第四回 - 主人

「德定街32號仁安大廈．．．是這裡吧。」

我看著Google Map，終於找到日記主人所留下的地址。 

我在大廈樓下徘徊了一陣子，心在掙扎究竟是否該走上去。會有危險嗎？ 

不過一想起日記主人的經歷，同情心便移動了我的腳步，走進這棟大廈。

 按下電梯的28字，內心開始緊張起來．．．為什麼有點去相睇的感覺？明明只是做好心送回日記給人家．．． 



電梯叮的一聲，提醒我已經到了28樓。

想不到，走廊比大廈外觀華麗呢，也很寬敞，足夠兩個我這樣身形的人肩並肩行。 

跟據指示找到B號的單位後，我按下門鈴。不知怎的，我很期待一會兒開門的是怎樣的人。 

不久，便聽到有人開鎖的聲音．．．開門的竟是一個隔著鐵閘也嗅得到旺角味少年。
那把過時的金髮，加上中間分界的髮型，怎也不像到了適婚年齡。他會是日記的主人嗎？
「請問小姐你係搵邊位？」金髮男以溫柔的聲線問道。 



「係咁既…我叫雪瑩，之前係『Star 迫 』執到本日記 ，見到背面寫住呢個地址，就諗住送返比本日記既主人…」

我帶點害羞回應。 「日記？哦，日記，啊．．．你等陣。」 

金髮男說罷便打開了鐵閘。 「真係唔好意思，要你一個女仔係出面咁耐，我開頭以為又係d邪教係度派傳單，不過你咁靚，就算係咩教我都會開門。」 

「係咩，哈哈...」我無奈地笑了兩聲。 

「天口咁慶，入黎坐低飲杯野慢慢傾！請！」 



金髮男熱情地邀請我進去，我竟然沒半點危機感便答應了他。大概我仍想對日記主人了解多點。 

「Em...好啦，不過坐一陣我要走喇。」 

於是我跟金髮男走進屋內。單位的裝修、擺設很中國古代風，私樓來計這裡是大單位，看來這戶人家一點也不窮。 

我們坐在木製的沙發上，金髮少年給我倒了杯茶，他的細心跟那外形真是格格不入。 

「唔好意思，我介紹下自己先。我叫阿凱。」金髮少年道。 

「你好，阿凱。係呢，本日記係你架？」 

「係啊，真係唔該晒你。一定係我上次飲野留低左喇。」 

「你而家無野丫嘛？」我以關心的語氣問候。 



「我會有d咩啊？啊，都有既，能夠認識到你我都真係幾開心。」 

「真奇怪，他不是剛剛求婚失敗嗎？為什麼好像什麼也沒發生過一樣？」我心忖。 

我以奇怪的眼神對阿凱說：「我仲以為你而家一定好唔開心...唔好意思，坦白同你講，我八卦偷睇左你本日記。」 

「係？！唔緊要啦，我唔介意。」凱的語氣依舊輕佻。 

「咁就好喇，老實講我睇左頭兩頁之後仲以為係識得你，因為裡面個場境...尤其大學果度同我果時好似。」 

「咁有趣？唔知呢d算唔算叫做緣份呢？」 

如果從一名高大Obba講出這句話，我大概會被迷倒，可是MK風不是我的胃口。 



「er...你諗太多喇，我只係覺得有d奇怪。」 與此同時我從手袋拿出日記，遞給凱。 

我繼續說：「Anyway 比返本日記你先，我都差唔多要走喇。」 

我把杯中的茶喝完，然後站起來，準備離開。 

「咁快？」凱有點驚訝。 

「係啊，我今日其實有d攰，一陣仲有野要做，打攪晒。」 其實，我只想快點離開這裡。 

「咁好啦，有機會再見。」 

「拜拜。」 

「拜拜。」 



(第四回完)