[愛情浪漫］［懸疑] 求婚。求分: 最終回 - 求婚 (下)
宏續說：「由第一日見到你，我就被你吸引住。如果你仲記得，果日係我特登走過黎主動問你可唔可以同組，而阿凌佢係之後先走過黎問可唔可以加入我地果組。」
我思考著宏的每句話。
宏拿起酒杯喝了一口，然後繼續說：
「最初令我心動果個唔係阿凌，係你。之後認識你多左，覺得同你好啱傾，又有共同既興趣...最重要係感覺相處得好舒服。我自問唔係一個容易動情既人，但係我個心確實為你所動。正當我想伸手去捉緊呢份心動既時候，好可惜，我發現你已經同緊子文一齊，仲非常恩愛。我知道自己無呢種福份，亦唔會嘗試去破壞人地既幸福...所以我一直將雙手放低，白白讓呢份心動既感隨著大學畢業漸漸散去。
大學果幾年阿凌一直都好關心我，對我好好，但係我個心始終只係向住你，有時現實就係咁殘酷，令你心動那位往往令你不能動身。
直到大學畢業，同你幾乎失去聯絡，果時我係好唔開心。但呢個時候阿凌依然Keep住搵我，仲不斷開解我...係某個時刻我比佢感動到，最後亦同佢一齊左。但其實我分得出對阿凌既呢份係感動，對你果份係心動，係唔同既。
只不過果時我接受現實，相信對阿凌既呢份感動總有一天會升華。
有一晚我打開FB，見到你出POST果句「我被求分了。」我先知道你同子文分左手。
我諗左好耐，考慮左好耐，掙扎左好耐，最後決定要行返一條正確既路。
我都講過，我相信命運並唔係注定既，知道行錯路就唔應該繼續行落去，要行返啱果條。」
「你點可以......」我忍不住打斷了宏的話。
「之後我決定要搵返你，去搵返我差唔多已經忘記左既呢份心動。得知你同子文分左手之後，我跟蹤過你一段時間，得知你有一個習慣，每個星期六都會去你屋企附近果間Star迫，而且每次都會坐係同一個位。
我估你係因為鐘意果個位夠靜，為左確保果個位無人坐左，你總會係間Star迫開門後半個鐘就去到果度。
你執到本日記果個星期六，我特登等Star迫一開門就入去，然後放低本日記係你坐開果個位對面，特登比你執到，然後引你比返本日記我。
唔放係你坐開果個位，係因為我驚你會以為個位已經比人霸左，而唔會覺得本日記係人地漏低左。
其實你睇我本日記果日，我一直坐係你...後面。本身我只係想確保你有執到本日記，然後我就會走。但係我一見到你，就唔捨得。見你咁仔細睇我本日記，我就好想留係度，同你一齊分享我既回憶。
之後既事你都知喇，我唔再多講。
仲有，我想講日記裡面每句都真係我既回憶，𥚃面既內容亦係我由大學時已經寫落，並非近排先作出黎...除左一段 - 果晚係我向凌提出分手。」
「你知道我呢刻諗緊乜嘛？我覺得你好變態。」我這樣對宏說。
「我知你而家好嬲，但我係真心愛你。雖然我係講左個好大既大話，但係我想話你知我愛你呢三個字並無半點虛假...我做咁多野，都係為左同你係埋一齊。比個機會我，原諒我。」
我的眼匡開始積存淚水，宏好像等待我說些話，例如會說原諒他...
沈靜半响後我終於開口：「對唔住啊，我知道你對我係真心，我都好鐘意你，但係...我始終接受唔到因為我既出現搞到你同呀凌分開，我接受唔到我既幸福係建立係人地既離別之上。更加接受唔到你呃我咁耐，我地既一切都建立係一個大話上面。至少係呢刻我真係接受唔到。」
「你錯喇...錯晒。」宏說。
宏搖搖頭，眼帶淚光繼續說：
「你既出現無錯係令我同呀凌分開，咁係因為你喚醒左我。你喚醒左我求婚係要向最愛既人求，唔係向最有感情既人求。我係度諗，點解同呀凌一齊左3年都完全無同佢結婚既念頭。無錯，之後我係有打算向呀凌求婚，但果時係因為呀凌同我講過佢想早d結婚，如果唔結就分。咁我慣左同佢一齊，唔想無左佢先有同佢結婚呢個念頭，但係...但係由始到終我都唔明點解要結婚。
我諗左好耐，同阿凌結婚會唔會只係因為衝動？定係習慣？定還是只為同佢有個交代？
直到睇到你FB，知道你同男友散左，果一刻我突然叮左一聲，果份久違既思念、忘卻左既感覺突然間返返黎。有一刻，我真係以為自己會同呀凌結婚，但到左呢一刻，我好清楚明白唔可以同凌結婚，因為我唔可以同一個唔係我最愛既人結婚。
你唔係拆散我同呀凌，而係提醒左我，救左我同呀凌。你可以話我自私，但係如果我真係同呀凌結婚，但又不斷諗住另一個人，呢份承諾、呢份約束仲有意義咩？呀凌都想嫁一個對佢真心真意既人，當我向佢求婚，佢點頭果下就等如認同眼前呢個人係佢一生中既最愛。但原來對方唔係咁諗既時候，你話到頭黎自私既係邊個？咁樣既婚姻仲有乜意思？你明白婚姻真正既意義嘛？」
宏此時從手提包拿出戒指盒，跪在地上。然後打開盒子，閃爍生光的鑽石戒指映入我的眼簾。
「雪瑩，求你比個機會我，求你嫁比我！求你以後唔好同我分開！」
兩行淚已從我的眼眸流下，這是感動的眼淚？還是受到傷害而流下的淚？
這晚的最後，是會以宏的求婚成功作結束；還是以我的求分為結局？
我知道，這一切也是取決於我。兩個人的命運就在我手中。又或者命運已幫我決定了一切，不然怎會讓我那麼巧今天就遇上凌？否則此時我已答應宏的求婚了。
「雪瑩，嫁比我好嗎？」
．．．．．．．．．．．．
．．．．．．
．．．
我應該...嫁給宏嗎？
-.-- . ...
求分往往有千種原因；但求婚便只有一個理由。
婚姻的價值觀在於能與最愛的人訂下盟約，是一個誓言，是一個承諾，當中的責任是大得容易讓人害怕、甚至卻步。
一個男人第一眼碰見對方，做盡一切去追求，只需要膽量和細心；可是到他人認清結婚對象後，下決心買戒指求婚，就需要相當大的勇氣和決心！
有時候女孩子表面看到的緣份、感覺，又知不知男方為了營造這些東西背後策劃了多少，做了多少呢？
求分，理由可以是見異思遷，可以是性格不合，也可以是如故事開始時女主角被分手般沒有原因；求婚，就只是想給對方知道：我愛妳，願意於下半生保護妳，與妳在一起。
我擺脫了命運的擺佈。
[全故事完]