守護天使: 第六回

第六回
今日係一個特別日子,

COD出?no,no,no

白貓有新角?,no,no,no

旬果有新片出?no,no,no
今日係小弟牛一,



有乜慶祝?無.

宅男係咁架啦,唔係你想點.

知我生日我諗喺地球唔多過3個人

一個係我老豆,一個係我亞媽,另一個係May姐.
無嘢嘅,just another day
係屋企打咗成日機,又無嘢做,威哥返咗大陸,好似係去做李尋歡



佢有叫我去架,不過我無興趣,等我去到佢咁年紀又無女先去啦.
一到呢D日子唔知點解就姨丈到,

算!話晒牛一,今晚一於去食餐好,
以前星期六,日你想喺梅窩食晚餐你最好訂定位,如果唔係一定無得食.

現在,哎~~小貓三四.
我:[老闆唔該]
老闆:[要乜]
我:[一碟椒鹽鮮魷,豉汁炒蜆,蒜蓉粉絲蒸扇貝,大生力.]


老闆:[咁多食唔食得晒呀.]
我:[得]

心諗多事啦你.
正當我坐喺到等食時,聽到背後一把熟識嘅聲音,
女:[唔該老闆,外買,我要......]
我擰轉頭見到一身casual wear嘅Anna姐

我:[Hi Anna姐]
Anna姐:[Hi Leo]
我:[買外買呀?]
Anna姐:[係呀,]
Anna姐:[你呢?又同威哥食飯?]
我:[唔係,一條友.]
Anna姐:[IC]


老闆:[你地識架?一齊囉,反正佢叫咗好多嘢驚佢食唔晒.]
我:[多事啦你]
老闆:[係丫嗎,食唔晒浪費食物呀.]
Anna姐:[咁...好呀.]
我:[係喎都唔記得你住呢到上面.]

Anna姐係住喺呢到上面對住海嗰一排House.
我:[成日嚟買外買架?]
Anna姐:[間唔中]
我特登好大聲講.

我:[下次唔好嚟呢間呀,個老闆好多事架]
佢又喺入面好大聲咁回我

老闆:[咁係呀丫嗎,食唔晒又叫咁多浪費呀.]


我:[啤?]
Anna姐:[OK]
Anna姐:[做乜今日一個人叫咁多嘢食?]
我:[今日我牛一]

Anna姐:[牛一?]
我:[生日呀.]
Anna姐:[IC,HappyBirthday.]
我:[Thanks]
Anna姐:[點解一個人過生日,唔同女朋友一齊慶祝?]
我:[我無女朋友點慶祝?]
Anna姐:[咁唔同friend?]
我:[我都話無囉...]
我:[Sorry,今日有D躁]



可能兩杯到肚,又可能係呢D日子,

我從未試過用咁語氣同Anna姐講野.
Anna姐:[唔緊要,係呢你點解一個人住梅窩?]
我:[被迫]
Anna姐:[同屋企人嘈?後生仔有時同屋企人嘈下好正常,屋企人無隔夜仇架.]
我:[我都好想同屋企人嘈.]
Anna姐:[點解?]
我:[以前成日覺得老豆老母好煩,我又無食煙飲酒吸毒,係宅D啫,咁都唔得,成日話我呢樣話我個樣,但係原來比人煩都係一件幸福嘅事,4年前我啱啱讀YEAR 1,有一日我上上下堂收到電話,因為交通意外我父母咁就走咗,真係好突然,我成個腦一片空白,無晒反應.]
我:[平日都係有老豆老母照顧,覺得係理所當然,但係一無咗,真係唔知點算

佢地走左之後一個月,呢一個月我食勻晒所有超市杯麵,百佳,惠康,759,7仔,AEON,OK

我通通食勻晒,嗰一刻我真係頂唔順,我真係崩潰,我唔想再食杯麵,你知唔知我做乜?]
Anna姐:[你做乜?]


我:[我衝咗入廚房]
Anna姐:[之後呢?]
我:[我攞起把菜刀,我同自己講,我好掛住亞媽以前煮D嘢食,我好想再見到佢地,我好掛佢地呀.

我攞起刀,心諗,一刀,只要我一刀拖落去隻手度我就死硬,我就可以去搵佢地,我唔洗再食杯麵.]
我:[把刀一邊震住一邊慢慢放落隻手度,我手腕開始感覺到刀身嘅冰冷,

我不斷同自己講,拖落去啦,拖落去啦,一嘢就夠架啦.]
Anna姐:[最後都係無做到?]
我:[唔]
Anna姐:[諗通左死唔係辦法?]
我:[唔喺]
Anna姐:[咁係咩嘢令你回心轉意?]
我:[咁啱有電話響,PS4機友19solidsnake打比我問我出咗COD,今日打唔打.]
Anna姐:[你個機友救返你]
我:[YES]
我:[我老豆亞媽佢地無咩嘢留比我,得呢一層村屋,之後所有生活都要食自己.]
我:[其實我好掛住佢地呀]

到咗呢一刻我已經feel到我D眼淚滴到成檯都係.
Anna姐好溫柔咁捉實我隻手,我係第一次拖佢隻手,上次酒吧單嘢我都只係拉佢手臂.

佢隻手好柔軟,好溫暖.
之後飲咗好多酒,我都唔記得發生咗咩嘢事,只係知我貓咗,有人扶我返屋企,入屋又再劏過.
第二朝起身個頭痛到爆,好似同曹星如打完一場咁,唔係,係比曹星如打完一身先真.

飲杯水飲清醒下先,坐喺床上面,睇住個廳,

唔記得介紹,由於一條友住,所以我將以前喺房入面嘅嘢全部放晒係廳,房用嚟放雜物.
望住我呢個小天地,今日睇落好似有D唔對路,點解今日間屋咁亁淨?

我記得我尋晚劏到一地都係架,重有地下D雜物唔見晒,

最恐怖係我床邊D用過嘅紙巾同飛機杯都唔見晒.

嗱,唔好問我做過乜呀.

尋晚唔好同我講係Anna姐送我返屋企呀.OH SHIT~~~~~~~~~~~~~~~~~~~~~~~~~!!
正當我頭痛緊喺屋入面發生嘅事.
門鐘響起,嘩! 我真喺嚇咗一跳,乜個門鐘仲會響咩,我好似幾年無聽過佢出聲喎

打開門,見到一位我唔係好想呢一刻出現喺度嘅人,Anna姐

啫係話佢尋晚送我入屋重幫我清潔埋間屋,
Anna姐:[Morning,MAY I]
我:[....Sure]
Anna姐:[你尋晚飲到好醉]
我:[你送我返呢架?]
Anna姐:[係呀,你仲嘔到我成身都係.]
我:[吓!]
Anna姐:[所以我攞咗你一件衫換呀,如果唔係我無衫返屋企呀,我下次洗乾淨先比返你,OK]
我:[哦,OK,OK]
Anna姐:[食D嘢先啦,]

佢買咗碗粥比我.
我:[唔該晒,又麻煩到你,重要你幫我執屋.]
Anna姐:[下次心情唔好就唔好飲咁多啦.]

佢又用佢對柔軟嘅手輕輕咁拍咗我手背一下.
Anna姐:[你一個人住間屋都幾亂下喎.]
我開始feel到塊面好熱,額頭開始冒汗.
Anna姐:[見你無嘢咁我走啦,BTW后生仔唔好用咁多{嗰D野}呀,小心身體,ByeBye.]
OH NO~~~~可唔可以比個窿我娟入去呀.