第十回
每日最興奮都係可以同Anna姐同船返工雖然無特登約埋,但係大家都係差唔多時間,

好難唔一齊,朝朝都見到個靚女點會唔開心.
今日當然都係同佢一齊啦,因為班次時間,所以多數我同佢都係最早返工嗰個.

但係今日有啲例外.

有人早過我同Anna姐,係隻{腐}
我地三個企咗係公司開口,


Anna姐:[早晨]
Asuka:[Anna姐早晨]
我諗住去開門,忽然俾人阻住.
Asuka:[仲唔叫人?]
我啤一啤佢,

佢啤實我.
Asuka:[快啲啦.]
Anna姐:[咩事呀?]
我:[早晨~~~Asuka姐]


Anna姐:[吓!]
Asuka:[唔,乖~~宅!!]
Asuka:[開門啦.]
Anna姐見到咁唔知俾乜反應好.
睇到呢度我諗唔洗我講你都知尋晚戰果係點啦.

唉~~失敗,打咁耐機都未試過一晚入面死咁多次.
Asuka:[Anna姐你先啦.]
Anna姐:[哦.]
Asuka指住我:[你最後.]



佢之後返埋佢個位.
Anna姐望實我,

Anna姐:[你地做乜呀.]
我:[唉~~連最後尊嚴都輸埋囉.]
佢笑一笑,

Anna姐:[咁你以後要叫佢Asuka姐?]
我:[唉~~~我入房做嘢先.]
一個男人輸晒所有尊嚴,真係自己都覺得好鬼無用.
就係咁我每日見到Auska,都要叫佢Auska姐.
佢都已經做咗成個月有多,我多數都係同佢一齊食,佢話唔鍾意帶飯喎.

咁呢排Anna姐又好鬼忙無同我食lunch,次次都係叫我幫佢買三文治就算.


原本唔想同Asuka食,不過唉~~算啦,男人老狗唔好咁小氣.

識耐咗其實佢份人都OK架,可能都鍾意打機,都幾多話題講,不過係公主病少少.
Lunch Asuka又走過呢叫我
Asuka:[宅!!食飯呀.]
我望一望佢,原本諗住今日搵Anna姐食,好似好耐無同佢食飯,不過佢出咗去開會,咁.....
我:[哦,好.]
食lunch時我問佢.
我:[你打咗好耐機架?]
Asuka:[一年多啲]
我:[吓!!天才!]
Asuka:[係鬼,以前條仔鍾意打機咪成日同佢一齊打囉.]
我:[IC,原來陪男友打機,咁係唔係打機勁得濟所以條仔走咗.]
Asuka:[你把口都幾乞人僧架喎.]
我:[Sorry囉]


Asuka:[佢識咗第二條女咪飛咗我囉.]
Asuka:[佢走寶啦,我咁正佢都唔要.]
我:[你真係幾有自信吓喎]
Asuka:[如果連我咁樣都無自信咁其他女人咪要排隊跳樓.]
我:[口味嘅嘢好難講嘅,你覺得正,可能佢覺得垃圾呢]
Asuka:[你講咩呀,咩垃圾呀,睇你都未拍過拖啦,死宅!!]
我...我又俾人打中死穴.

唔怪之得佢男友唔要佢啦,超級公主病,點解我識親啲女人都咁惡架,
Asuka:[做咩呀,唔出聲俾我講中呀?]
我:[唔.係.呀.得未.]
Asuka:[喂,點解你朝朝都同Anna姐一齊返工?]
我:[我地都係住梅窩,搭同一班船,所以咪成日一齊返囉]
Asuka:[梅窩仲有人住咩?我好似小學入過去,之後都無再去過]
我:[係呀,梅窩仲有人住架,外星人.]


Asuka:[我見你兩個成日一齊以為你兩個係情侶.]
我一聽到佢呢句連飲緊嘅可樂都噴埋出嚟.
我:[你...唔好,亂講呀.]
我:[俾Anna姐聽到就唔好啦,人地係美國有男朋友架.]
Asuka:[人地有男友你就唔好成日同人一齊出出入入啦,除非你想.....]
我:[我想咩?]
佢一手指住我:[你想撬人牆腳囉.]
我:[嗱,雖然我唔介意俾人屈,但係真係唔好亂講嘢,]

Asuka:[或者佢都唔介意呢]
我:[嗱!!唔好屈Anna姐呀]
Asuka:[我作為一個女人,如果對一個人無好感,係絕對唔會日日同佢一齊行架.]
我:[咁你又同我日日lunch?]
Asuka:[其他人一睇就知係你呢隻癩蝦蟆想食我呢件天鵝肉啦]
我:[發神經,燒鵝肉就有你份.]


Asuka:[不過諗諗吓都係無可能]
我:[又乜呀]
Asuka:[Anna姐咁高質素,無理由會睇得上你呢啲....吓]

佢上下咁打量我一嘢.
我:[我呢啲咩呀?]
Asuka:[呵!呵!呵!自己諗].
我:[嘩,你真係好攞命,我認輸,我投降,我頂唔順,救命呀.]
Asuka:[搵日我同Anna姐食飯八掛吓先]
我:[嗱,你唔好亂嚟呀,]
Asuka:[我要做,你阻到我?]
我:[我....]
雖然Asuka真係串到爆,但係諗深一層佢講啲嘢又好似有啲道理.
今日收工Anna姐又真係等埋我先一齊走喎.
搭船時Anna姐問我:[呢排你成日同Asuka一齊食lunch?]
我:[係呀]
Anna姐:[見你同佢都好玩得埋咁.]
我:[可能都鍾意打機呱.]

Anna姐:[你...覺得佢點呀?]
我:[OK啦,係公主病少少.]
講講吓Asuka打電話呢
我:[喂,現在?好呀]
Anna姐:[邊個?]
我:[Asuka搵我打機.]
Anna姐:[佢都幾靚女丫]
我:[唔]
Anna姐:[你無興趣咩?]
我:[唔]
Anna姐:[你想追人就認真啲啦]
我:[唔]

我一邊同Asuka打機一邊聽Anna姐講嘢.

可能太專心打機,佢又講得好細聲,佢似自言自語多啲,所以唔係好聽到Anna姐講乜.
Anna姐:[你地年紀又差唔多都幾襯丫,又啱傾,佢又靚,又...後生過我...]
我:[吓咩呀?]
Anna姐:[你有無聽我講嘢架?]
我:[我....]
Anna姐:[算啦,無嘢啦,唔講啦.]

Anna姐黑口黑面,塞實對earphone無再理我.
剛才佢講乜呀,我真係聽唔到丫嗎.