【少少甜】扑野扑得你心碎: 三

接下來我要介紹下我老死，阿輝。

陳景輝，阿輝，同我同年，今年22歲，身高一米八二，外貌俊俏，家境富裕，係人地眼中既高富帥，亦係我由中學識到依家既好朋友，同時都係啟發左我開偵探社既人。
 
雖則阿輝又高又靚仔又有錢，但中學到依家其實凈係溝過一條女，原因係條友份人太木獨兼見到女口窒窒唔識講野。通常d女開頭見到佢咁靚仔會係咁癡埋去但好快就會被佢悶親。

而我呢條矮柒窮就直接被d女無視。
 
F4果年，佢睇中左隔離班既女神，條女無波無籮，但勝在有對43吋白滑長腿同一副端莊動人的容顏。



阿輝對佢極之著迷，利用銀彈攻勢請條女去食法國大餐又送頸鏈又送iPhone，足足唔知洗左幾多錢幾多時間心機先打動到女神同佢一齊。
 
阿輝溝到女神原本我替佢十分高興，同時礙於朋友妻不可虧呢個普世價值，我更係安分守己地無利用我既能力去窺探佢條女d做愛史。但有一日，阿輝突然面色蒼白咁行埋黎同我講：「立生，我，我條女話佢，佢好似，好似，好似，有，有有，有左……」
 
我果下心諗，唔撚係掛，行埋得果一個月就搞大人地個肚！
 
佢問我點算，我話叫佢落左個bb。
 
但佢竟然話：「我都係咁諗，但，但係Lucy（佢條女）話想生佢出黎。」
 


響果個moment我靜左幾秒，諗左陣，覺得事有蹊蹺，然後話：「你肯定，個bb係你既？」
 
阿輝愕然。我接著說：「你同佢搞野果陣有無帶袋呀？」
 
「無呀，Lucy話唔用好feel d。」
 
「咁佢係咪處先？」
 
「佢話佢係，我諗應該係。」
 


「拿，咁，你約佢出黎，等我幫你睇下條女係咪凈係同你扑過野，費事你做左人便宜老豆！」
 
阿輝猶豫左一陣，：「咁樣好似唔係幾好……」
 
我回應：「喂輝哥，你係我老死我依家幫緊你，你估我真係對你地d性生活咁有興趣呀！」
 
阿輝說：「我唔係咁既意思，但咁樣做好似…搞到好似我唔信佢咁…」
 
我說：「唉，輝哥，你鐘意啦，你唔想我都唔勉強你，不過呢單野被你老豆老母知道左，佢地肯定打死你。你最好同你條女再傾下，如果到時你要借錢落仔唔方便問老豆老母攞錢，我儲落有d積儲可以幫下你。」
 
阿輝眼角含光：「呢單野你記得同我保密…我唔想惹人話柄。」
 
我說：「得啦，你自己諗諗佢啦。」
 
三日後，阿輝面帶愁容黎求我：「立生，呢次你要幫幫我。」