《我竟然同左一個陌生男仔去歐遊...》: 《意大利篇- 米蘭 Milan (1.1) 》

香港飛去米蘭，冇delay既話需要12小時25分鐘。

由於我係機場留左差唔多成日既關係，我一上機就訓著左，所以即使阿Nick坐係我隔離，我地全程除左我起身食野既時間，基本上冇傾過計，只係我訓醒既時候，佢同我講佢睇左四套戲。

到達米蘭個陣係當地時間朝早7點幾，所以我一教訓醒，完全冇時差既感覺。

一踏出米蘭Malpensa機場，我就有種煥然一新既感覺，我終於可以呼吸歐洲自由既空氣！

我記得4，5歲既時候，同屋企人去過法國，但當然一啲記憶都冇。雖然人生有一半時間都係外國生活，但歐洲比我既感覺硬係好唔同。




「好神奇啊！兜兜轉轉竟然黎左意大利，真係冇諗過，雖然對米蘭冇咩感覺，但其實我好想去Florence同Venice。」


我閉起雙眼，伸住懶腰講。

「大小姐，有得比你上到機你都要知足喇，唔係你依家仲係香港機場張凳到訓緊啊。」


佢既語氣帶有一絲既不滿，睇黎佢成程冇訓開始有少少燥底，我亦都即刻識做。




「Sorry，係既係既，都係多得你係水深火熱中拯救左我，唔係我真係可能流浪街頭，我等陣一定會請你食Pasta，講得出做得到。」


我做出道歉既手勢。

話音剛落，連接去City Centre既接駁巴士就到左，因為想儘快去到個Airbnb，我地就好慌忙咁拎住幾件大行李咁衝過去，Nick見我一個女仔雞手鴨腳，就二話不說單肩背起我個旅行袋，然後拉住我隻手行，雖然只係一個平凡既舉動，但不得不承認，我個刻的確係有心動既感覺。

個程車大概50分鐘，但開得好唔穩，震到我有少少作嘔。佢見我禁住肚個個位，就主動問我係咪唔舒服，要唔要藥。



癡_線，我同以前個男朋友佢拍左幾年拖，平時連我M痛都睇唔出，一個識左一日既男仔，就可以對我咁細心。

我暗暗自喜，覺得黎緊既旅程，一定好有趣。

×

經過一番折騰，我地終於到達阿Nick book既Airbnb，我以為一個男仔去旅行應該會求其揀啲有張床，訓到既就算。

點知原來間屋係佈置得好有心思，好有「家的感覺」個種民宿。

屋主好熱情咁同我地打招呼，帶我地參觀左間屋一圈，就比左房匙我地。一打開房門，有好多心形擺設，十足十酒店個啲浪漫結婚週年紀念特別呈獻咁，我見到都忍唔住深呼吸左下。


「哇，估唔到你個look咁man，原來中意呢味野架？」我大聲笑左出黎。




「冇辦法啦，咪同你講左我都係前幾日先book，得返呢間近市中心又就腳咋，將就下啦。」佢既語氣有啲尷尬。


「唔緊要，都係搵個機會笑下你姐，我有地方住已經好知足喇，哈哈。不過訓地下真係好唔舒服喎，咁既話我都唔好意思訓床。」


「咁你想陪我訓地下，定係唔介意我同你訓同一張床？」佢對住我奸笑。


「Sorry，岩岩先識你，唔應該同你開呢啲玩笑。得啦，夜晚鋪張被係地下我就訓得著，我地男人對訓呢方面真係好求其架咋。」


哦，對訓呢方面好隨便。我聽到佢咁講，偷笑左一下。




時間尚早，我見佢個樣都開始攰，就提議佢先係床到訓一覺，我就出去市中心兜一個圈，夜晚返黎再請佢去食餐好既。而佢亦都因為成程機都冇訓過既關係，連衫都唔換就成個人灘左係張床到。

雖然我冇潔癖，但諗起我夜晚都要訓呢張床，我就接受唔到一個十幾個鐘都冇沖涼既男人訓過，所以都係叫左佢去沖涼先。

佢話Ladies First，比我沖先，但我沖完返入房，就見到佢已經換左套衫係張床到訓著左，我諗佢坐完long haul機真係攰到頂唔順，我就由得佢，張床咁大，最多今晚訓另一邊。