《我竟然同左一個陌生男仔去歐遊...》: 《意大利篇- 佛羅倫斯 Firenze (5.1)》

其實成晚我都冇點訓過，好似差唔多四點先訓得著。


第二日朝早，我衫未換，頭未梳就落左去。反而Nick已經換好曬衫，佢見到咁頹既我，係都要笑我：


「琴晚做賊黎？你咁衣衫不整好容易令人誤會架喎。」


「失眠啊，我係長期病患者。」




「聽講有心事既人先會失眠喎，去旅行就係要拋低唔開心既事丫嘛，唔係咩？」


「知道喇，我保證我食完野我就會有返曬精神。」我勉強擠出一個微笑。


我地入去琴日經過既canteen，見到已經有好多人食緊早餐，原來同我同房既Cara都喺度，咁啱佢隔離有兩個位，所以我地就行過去同佢一齊坐。



早餐係自助形式，如果冇記錯價錢好似係5歐羅左右，喺意大利黎講已經算好唔錯，加上食物既選擇都幾多，如果再早啲落黎既話應該可以食到更多野。
不得不提，嗰度既咖啡真係好好飲，果然正宗既咖啡都係要黎到意大利先飲到。

我地拎完野食坐低之後，Cara又開始好興高采烈咁同我地講佢琴日去過既地方，雖然有部分景點我地琴日都去左，不過佢係咁推介我地去米開朗基羅廣場（Piazzale Michelangelo），話嗰度係觀賞整個佛羅倫斯最好既地方。

“Make sure you stay until sunset, it's very romantic.”

印象中佢係咁樣同我地講。

如果Cara既職業係一名媒人既話，我相信佢會非常之稱職。



食完早餐之後，我好快上房執返好個look我地就出發，雖然嗰陣只係啱啱開始旅行冇耐，但我已經冇咩心機打扮，或者我已經比Nick見到我最頹又冇化妝既一面，已經唔諗住再掩飾。

佛羅倫斯話大唔大，話細唔細，我地除左冇比錢上圓頂鐘樓嗰啲之外，喺市中心比較出名既景點我地差唔多都去曬，當然除左Cara講既廣場，所以我地都係漫無目的咁周圍走。

人去旅行我地去旅行，點解我地可以咁hea？

我忽然諗起琴日Nick講關於但丁既故事，我對佢既生平亦開始好感興趣，反正我地都冇咩行程可言，就好快咁決定左去但丁故居參觀。

冇GPS既我地，嗰次搵路都搵得比較辛苦。故居既位置比較偏僻，我記得嗰日係佛羅倫斯古城附近穿過左好多條巷仔，先黎到呢座好古老亦毫不起眼既磚屋——據說係但丁既出生地，雖然佢並冇喺入面住過。

縱然但丁一生痴情既故事令人感動，但黎到呢個故居，並冇乜野令我覺得驚歎。

其實但丁故居只係一個好小型既博物館，裏面都係展示下但丁既生平同佢生活既年代，並冇任何代表到佢既展覽品，說穿了其實只係一個拎但丁做gimmick既景點，如果唔係瘋狂崇拜但丁，唔需要特登黎。即使你好中意佢，黎到可能只會失望咁走。



不過值得一提既，喺故居門前既地下有一塊磚頭被刻上左但丁既剪影，如果唔係有人圍住喺嗰度，我諗我地都唔會發現，因為實在太唔起眼。聽其他人講，係一名但丁既狂熱fans刻上，只要倒上一注清水就會見到，雖然我始終睇唔出嗰個係但丁。



到左差唔多晏晝兩三點，我地食完野發覺附近都冇乜好行，就諗住提早上去米開朗基羅廣場。

佢位於市區南部既高地上，喺阿諾河既附近。行上去原來都唔係咁簡單，你就當好似行左20分鐘山路咁，我諗少做運動既人直程會覺得辛苦。

不過就算要我行一個鐘我都肯，因為上到去廣場，我就知一切都係值得既。