《我竟然同左一個陌生男仔去歐遊...》: 《意大利篇- 五漁村 Cinque Terre (1.1)》

唔知大家仲記唔記得，我咪話過成個意大利，最想去Florence同Venice既？

佛羅倫斯就去過喇，但始終冇踏足過威尼斯。

原因係我地第二晚喺佛羅倫斯嗰陣，已經開始諗定意大利之後去邊度好。經過一番Skyscanner同GoEuro既搜尋下，我地決定左去法國，再順住上去德國。

只不過因為由Venice出發既話會耽誤左少少個行程，所以被逼放棄。只好留一日喺五漁村，然後就要返返Florence出發去法國。

「其實五漁村都好靚架，有好多彩色既屋仔，同威尼斯嗰個彩色小島都有幾分相似。」



Nick嘗試安慰去唔到威尼斯既我。

「其實你唔講，我都真係未聽過五漁村呢個地方，聽落去都幾得意既。」

去唔到我其中一個Dream Place，難免有少許失望，但我都努力嘗試唔去埋怨啲咩，因為呢刻我已經非常committed要同Nick一齊周圍去，冇諗過自己一個走左去。

*

第二朝我地晨咁早就起左身，連間Hostel都未開始serve早餐，有少少掛住佢杯咖啡。



從佛羅倫斯去五漁村，一啲都唔難。只要去返第一日嗰個中央火車站，直接喺自動售票機買飛，13歐羅度，但注意目的地係一個叫「La Spezia Centrale」既地方，上面並無「Cinque Terre」呢個選擇，原因等陣會講返。

頹到極致既我地，走左去火車站對面既麥當勞食早餐，但今次應該係心理因素吧，我竟然會覺得麥當勞（非McCafe）啲咖啡好飲。

成程火車大概兩個鐘多啲，途中會經過Pisa站，即係好出名嗰個比薩斜塔既所在地，所以好多人去五漁村會順便去埋Pisa，不過我地因為時間關係，就放棄左去嗰度，其實每個人去到，咪又係擺個做到爛既推塔Pose就走，對我黎講冇咩特別。

魚與熊掌，不可兼得。

女人既心情真係可以好反覆，琴日我係個唔襯衫，吹啤酒既女漢子；今日我係個為左影相呃like而特登襯衫既港女。而Nick照舊都係著得好平凡。



由於早出發既關係，整夜無眠既我理所當然喺火車又訓著左，朦朧中感覺到我有好幾次唔小心訓左喺Nick膊頭，不過自然反應下，好快又彈返起身。

2小時12分鐘後，列車到達La Spezia站！

一直唔知道有呢個地方存在既我，當然對呢度尤其陌生。

猶記得踏出火車站，只見到小屋幾棟，並無想像中既彩色屋山丘。

「說好的彩色屋仔呢？」我一臉著急咁問Nick。

「唔好咁心急啦，都未到。其實呢度仲未算係五漁村架。」

佢耐心咁同我解釋，原來五漁村顧名思義，係有五個村鎮所組成，而喺La Spezia再搭火車轉乘到第一個鎮（Riomaggiore），車程只不過係十分鐘既事，班次亦非常密。

當我地順利到埗第一個村鎮時，我喺火車站既圍欄旁見到前面既一片深藍色大海，海浪聲不斷衝擊著懸崖，頗為壯觀。



出去車站後需要行一段樓梯路先會到小鎮既中心，雖然仲係未見到心目中既景象，但沿途既風景已經足夠令我慢慢欣賞。一邊行一邊回望時，就好似見到全島既風貌咁。

Riomaggiore好似係最多店鋪同餐廳聚集既鎮，兩旁既建築物都被塗上唔同色，就好似置身喺一個童話式小鎮咁。不過因為係渡假勝地，比較少見到真正當地人既生活，街上大部分都係被唔同國家面孔既人擠滿，人流亦絡繹不絕。
 
我地經過左一間叫媽媽咪啊～(Mamma Mia)既小型take away餐廳，裝修非常小巧卻有特色，海藍色既度假屋感覺。



入面傳黎好香既薄餅味，就好似當日喺佛羅倫斯見到既雪糕店一樣，有好多人排隊，所以我地就被吸引入去。

倉猝決定下，最尾只係同Nick叫左一個lasagna一齊share黎食 ，因為貪佢夠飽（除左餐佛羅倫斯牛扒，我地平時其實幾慳住黎食），只可惜味道只屬一般，而且好似翻叮叮唔夠熱咁，但後尾先知原來佢地既炸魷魚，海鮮嗰啲先係最出名，策已失，不過make sense，漁村嘛。

我地喺鎮上既main street兜左一個圈，可能喺周邊五顏六色建築物既影響下，即使一間普普通通既店鋪都顯得特別有趣。







穿過大街，慢慢就行到黎海灣，周邊氣氛非常熱鬧，喺呢度終於見到我等左好耐既海邊小屋群！海岸上既一件件彩色屋背山靠海，Pastel色調同旁邊湛藍既海水相映成輝，交織成我見過最靚既風景之一。



喺呢個鎮停留左大約一小時，為左趕得切一日去曬五個漁村，我地唯有向下一站進發。每條村其實都被火車軌連接著，站與站只隔3-4分鐘車程，4歐羅一程，或者可以購買一日票（~16歐羅）。當然，唔想用錢既話，亦都可以選擇徒步，有冒險精神既我地，提議一齊試下行去下一個鎮。

據Nick講，Riomaggiore同下一個鎮（Manarola）之間有一條步行道名為”愛之路”( Via dell'Amore)，被譽為”最浪漫既沿海步行道”（好似係），全程都係20分鐘。

可惜既係，因為我地去嗰排，愛之路被洪水撞壞，正在維修中，所以我地同佢就”有緣無份”了。




「都好既…唔洗陪你行呢條咩愛之路…聽個名都覺得肉麻… 」我裝作鬆一口氣。


「車，你估我想同你行既，只不過呢條已經係五漁村徒步路線入面最舒服既一條路，一係我地返去搭車。」Nick亦都故作不屑。


「唔得！話過要行就要做到。你睇下嗰邊好似有個指示牌話可以行山路去Manarola…嗯…好似都係話行20分鐘姐。」我指著離我地唔遠既木牌。


或者嗰刻我地兩個既頭腦都被海浪聲所弄昏，大家都睇錯左個指示牌上面某啲資訊，然後，我地中伏了。