《我竟然同左一個陌生男仔去歐遊...》: 《意大利篇- 五漁村 Cinque Terre (2.1》
“K…. Y…..” 除左initial之外我150度近視既雙眼睇唔清楚所有字母。
但呢個收件人一定唔係Nick。
只不過，佢選擇左要瞞住我，我又何必成個八婆仔咁揭破人地，又唔係啲咩大事。
將明信片成功投遞後，我地就將餘下三個漁村都快速遊覽一遍，因為大同小異，我就唔詳細逐個逐個講。
去到第五村（Monterosso）時，不知不覺又接近黃昏時分，聽人講夜晚既五漁村更值得人留低觀賞。
Monterosso離La Spezia最遠，但同時係唯一一個擁有一整片海灘既漁村，我諗呢個係佢同佢四個鄰居有啲唔同既地方，有種喺赤柱既感覺——一個大泳灘，無盡頭既海岸線，歐陸式建築物，仲有碼頭可以比遊客搭船出海睇風景，完全就係一個高尚住宅區。
呢度既日落，帶來既係一種同米開朗基羅廣場截然不同既感覺；望著呢度水清沙幼既景色，太陽就好似喺你正前方緩緩下落咁，不同於喺佛羅倫斯帶有文藝復興色彩既復古色浪漫。
夏天既意大利，即使入夜都好適合喺海邊行，我見到周邊都有好多舉手投足都發放住甜蜜氣息既情侶喺沙灘旁散步。
我諗，即使愛之路被封閉又如何，其實同自己中意既人一齊行，每一條路都係屬於佢地既愛之路。嗯，我諗起都覺得肉麻。
而我同Nick，呢種唔可以完全話係陌生人，但又算唔上好朋友既關係，其實有時都幾尷尬。當要講，可以講既話題都差唔多講曬既時候，剩下既只有死寂既空氣。
通常喺呢啲情況，TVB既編劇應該會加一句：「你餓唔餓？不如我煮個面你食？」而喺我地既世界入面，亦都離不開食野呢個話題。
所以天時地利人和下，我地走左入一間雜貨店。冇錯，係雜貨店。
雖然海邊既餐廳充滿住情調，但係情調往往都被附上一個價錢牌，而且非常昂貴。
你就當我地兩個都咁cheap啦，入去用好抵既價錢買左一大包croissants同其他零食，就當作我地既豪華晚餐（其實係我提議先既）。
拎住一大袋野行返過去海邊，我地就係咁搵一張長凳坐低，開始「撐凳腳」。
「多謝你肯陪我癲，連呢啲飯錢都陪我慳。」其實諗返都有啲唔好意思。
「唔係丫，我地咁樣坐喺度食，仲有情調啦，你睇下，隔離隻海鷗都想join我地。」佢每一次笑，我雙眼都離唔開佢既酒窩。
俗語講得啱啊，重要既唔係做緊啲咩，而係邊個陪喺你隔離。
或者呢個就係屬於我同佢既小確幸。
我諗我地喺嗰度停留左都唔短時間先捨得走，始終眼前既景象，并唔係隨處可見，有一種感覺，係影一千張相都捕捉唔到。
不過戲肉可能依家先上演。
*
當我地返到Monterosso火車站時，見到仲有好多人等緊車，明明都已經夜深，要留低既遊客應該已經返左自己既住宿，要走既亦無須全部約埋同一個時間走。
我地問一問工作人員，原來從La Spezia站開出既列車發生故障，所以服務受阻，連佢地都唔清楚究竟嗰晚仲有冇火車返返去佛羅倫斯，只管推卸責任，叫我地親自去La Spezia站詢問情況。
不過其實我地都有錯既，呢個通知原來一早已喺各車站播放，只係我地花太多時間係外面，並無留意到任何火車站既廣播。
去到La Spezia站既時候更是一片混亂，站裏只剩低兩三個職員，其實都幾登佢地慘，幾個人被幾十個講住唔同語言既遊客追問。最後都係要透過廣播，用充滿意大利口音既英文講，話只有持有某一班開往佛羅倫斯既火車票既乘客可以上車，其他班次只能作退款。
大家聽到後都發出連串既抱怨聲，嘗試去售票機買21:24既班次，可惜早已售罄，列車已經爆滿。
一早就買左21:24班次既遊客就急不及待咁入去候車室，最後好似只剩下十幾個「無家可歸」既人，包括我同Nick。
「除左火車返唔到去架喎…唔通要喺個火車站度過夜？」一向冷靜既我，亦開始慌張起黎。
「我諗你想留喺度都唔得，呢度好似最後一班車開出後就會關門，你睇下，連啲職員都準備走喇。」
「咁點算啊？諗住黎個一日遊最後竟然變成咁…」
喺我地諗緊辦法既同時，好似隱約聽到附近除左我地之外，仲有幾把講緊廣東話既聲音，都喺度討論緊究竟要點返去。所以情急下，我地都走左過去問佢地。
「唔好意思啊，你地都係香港人？我同我朋友都唔到去Florence啊，你地係咪都係去Florence？」
「係啊，不過我諗今晚冇辦法返到去架喇，我地依家睇緊仲有冇得book一晚住宿。」
其中一個滿頭金髮，略帶ＭＫ味道既女仔說罷，就埋首繼續篤手機，而其他同行既人好冷淡，完全冇理過我地，然後就行出去火車站。香港人似乎冇乜人情味。
「睇黎依家唯一既方法，就係搵地方過埋今晚，聽朝先一早返佛羅倫斯。」Nick提議道，其實佢唔講我都心裏有數。
問題係，依家正直旅遊旺季，要訂房的早已訂好，我地又點會咁容易搵到住宿呢？
我記得嗰陣天色已經好黑，而La Spezia因為唔算係五漁村，所以喺街上冇乜人行緊，完全有被打劫既風險。
我地幾乎見到有旅館就入去，但多數得到既回應都係 客房已經fully booked tonight，始終我地咁遲先發現冇得返去。
好彩上天都憐憫我地，機緣巧合下竟然走去到去一個住宅區，竟然見到有個牌寫住”Allogio/Accomodation”，隔離有個轉右既剪嘴。喺毫無選擇下，我地選擇左去博一博。