由納粹德軍開始佔領歐洲各國,就估計有五百多萬既猶太人死於呢場屠殺,而當中有一百多萬人,都係葬身於Auschwitz,世界上最多人死亡既地方。

我帶上耳機,搵到自己語言既導覽人員後,就行到左當時真正既集中營入口。

終於,我踏上左呢一片曾經屍橫遍野既土地。

上面被釘著既德文標語「Arbeit Macht Frei」,意指「Work Sets You Free」或者「勞動帶來自由」。


 


明顯地,係一個極為諷刺既句子。

1940開始,納粹德軍開始從歐洲各國押運囚犯到此,包括吉卜賽人,捷克人等等,當然猶太人佔大多數。

當時既猶太人被送到集中營前,其實滿懷希望以為能用工作黎換取新生活,但佢地又點會諗到,呢個係納粹德軍一個極之醜陋既謊言。

當佢地到達集中營時,被軍醫作篩選分類,老人小孩婦女等沒有價值既「老弱婦孺」就會直接被送到毒氣室批量殺害,無數既家庭就喺嗰一刻被分拆,從此,永不相見。

佢地被送到毒氣室前,都會被要求脫下全身既衣物,甚至會為佢地送上毛巾,每人分配一個衣櫃,做出帶佢地去梳洗既假像,以減低恐慌。



到毒氣釋放時,人們先意會到,原來只係納粹軍既精心佈局。

短短二十分鐘,就可以令全部房間加起黎既幾千人喪命。
 
其實大多區域並冇限制攝影,只係對亡者較為敏感既地方禁止拍照。



廢棄的毒氣罐





下火車既一刻,所有隨身行李都會被沒收,而德軍就會將佢地既衣物,頭髮等等作黑市買賣。

隨身衣物鞋子



 
聽著耳機內導覽人員既解釋,還說有些納粹軍變態得會在毒氣室內裝上小孔使長官能得以「觀賞」佢地被毒殺既過程,光是幻想已令人毛骨悚然。

而剩下被認為「有價值」既男性,就會被剃光頭髮,開始做無意義既體力勞動,目的只係為左虐待佢地,大部分人最後都死於勞役或致病。

其實集中營內有一間醫院,當然,只係有名無實,納粹德軍只係用醫院黎掩蓋佢地喺裏面進行極不人道既地下人體實驗。



在營地裏走過既每一步,埋藏於泥土下,都係佢地無辜既亡魂;在牆上掛著既每一幅照片,都係確確實實存在過喺呢個世界上既面孔,我從來未試過喺一個「景點」內感到如此凝重。


導覽期間有中場休息,大概二十分鐘到,有穿梭巴士直接到達二號集中營(Birkenau)。

由於最初既Auschwitz集中營無法容納所有納粹德軍帶黎既人, 佢地就開始興建二號。

Birkenau既面積大非常之多,聽說可以容納近十萬人,因為第二營有多個毒氣室同焚化爐,而火車可以直接進入營地,所以方便納粹軍將猶太人送到呢度直接滅絕。

死亡路軌



五年間,一百多萬條,甚至比呢個數目更多既生命就此消失。



到1945年蘇聯紅軍擊敗納粹,解放集中營時,搵到既係無數具屍體,仲有數不盡既衣物,頭髮,同埋一個個曾經裝載著佢地希望既行李箱,喺下車既一刻,不至身外物,連靈魂都被沒收了。

當時被虐待得沒有糧食而嚴重營養不良既囚犯



納粹軍槍殺猶太人既其中一個位置,被放置鮮花悼念



納粹軍人最後被擊敗捉拿後,被處死既地方


當我親身喺呢度感受到死亡既氣息,眨眼間只覺得自己係一個極為渺小既存在,當世界上仍然有權力,種族,宗教上既醜惡紛擾,自己所遇到既問題,或者根本微不足道。



導覽黎到最後一站,望著刻著不同語言既紀念碑,只覺得無論有多少哀悼既話語,都無法改變呢一段血淋淋既歷史。

"To the memory of the men, women, and children who fell victim to the Nazi genocide. Here lies their ashes. May their souls rest in peace. "




Auschwitz對我黎講,絕非一個景點,而係展現人類史上最荒謬一章既人間地獄。

臨解散前,我離遠望到,有幾個披著以色列國旗既年輕人在對著墓地默哀,然後唱著淒涼既歌曲,悼念佢地被殘忍迫害既祖先,我既心情立刻被渲染得沉重,係最為令我印象深刻既一幕。

一段無法被清洗既過去,只能靠生於現代既我地,去學懂要記得,歷史遺留下來既慘痛教訓。


「那些不能銘記過去的人,註定重蹈覆轍。」




“Those who do not remember the past are condemned to repeat it. ”– George Santayana