老馬嘆住氣講, 「唉, 你話係咪痴膠線吖, 呢種人就真係食古不化, 人地講兩句就咁上心, 跟住就搵個仔黎做出氣袋, 似乎最無家教果個係佢至真!」
 
猩猩仔又再講, 「仲有, 我以前試過同過一個女仔拍拖, 但因為大家意見不合而鬧交分手, 果次比我老豆知道之後, 佢足足將我打左一個禮拜, 佢仲話我緊係唔識得去尊重人, 對人唔好, 仲話要同我一齊上佢屋企度同人道歉!」
 
我地三個聽到都同一時間去問, 「咁最後有無咁做呀?」
 
猩猩仔居然真係點左一吓頭, 噓, 好野, 果然真係黏得云循, 我地三個嘆氣三聲之後, 「唉, 無野好講, 叫野食先囉!」
 
個單位其實地方都叫做 ok , 但我地幾個人商量過之後, 知道個林生原來啲思想係咁古怪同要面, 咁如果到時比佢知道我地租佢個單位黎係開高級馬檻嘅話, 咁唔知佢又會唔會上哂頭咁就連我地都趙埋, 唉, 都係叫 Jenny 搵過第二個盤黎比我地睇好過嘞。
 




星期六下晝, 尖沙咀行人道上, 一個女人正一面焦急咁街邊度等緊車, 個女人不斷望住手錶, 「死嘞, 遲哂嘞, 遲哂嘞!」
 
突然, 一架 Honda Civic type R 正剷住埋黎路邊, 車窗降低左, 「陳小姐, 妳要去邊度呀?」
 
Jenny 望一望司機位嘅人, 哎喲, 好囉好囉, 「喂猩猩仔, 我要去深井呀, 你而家方唔方便兜我一轉咁呀?」 猩猩仔諗都唔諗就答, 「咁快啲上車啦, 呢個時間好難截車架!」
 
司機位隔離擺滿哂野, Jenny 唯有就開住後座車門上車。
 
猩猩仔擰轉個頭問 Jenny 去深井邊度, 但 Jenny 見猩猩仔隻眼瘀哂, 塊面又有啲傷痕咁,  「猩猩仔, 你呀爸又打你呀?」
 




猩猩仔笑住擰一擰頭, 「無事嘅, 小小傷之嗎, 好嘞, 開車至講啦!」
 
Jenny 坐住響後座度不斷襟住手機, 而猩猩仔就係咁不斷響倒後鏡度留意住後座嘅 Jenny, 私家車正火速向住深井方向駛去。
 
車程行左一半之後, 猩猩仔就同坐後面嘅 Jenny 講, 「陳小姐, 我尋日同呀爸講, 我想遲啲去澳洲果便試吓搵野做同發展, 而且我啲朋友響果便又有地方比我住, 所以…」
 
Jenny 挑通眼眉, 「咁你去澳洲係咪想避開你呀爸呀?」猩猩仔無出到聲。
 
靜左一陣, 猩猩仔再講, 「陳小姐, 唔怕話妳知吖, 我上次第一次見到妳嘅時候就真係嚇左我一跳架!」 Jenny 等緊猩猩仔嘅繼續。