「係呢個啦!」邦叔拉開塊布「豆釘仔整整下冇再上嚟整,得我自己一個幫佢執埋啲手尾」

一揭開塊布,成個火箭模型喺眼前,而架火箭係擺喺月亮上面。火箭雖然係冇真個啲咁高,但係起碼有一道門咁高。

喺個刻,我呆了。

「豆釘仔好勤力㗎!」邦叔說「日日放學就嚟整……架火箭佢整嘅……我淨係負責個月亮架咋!」

我就攞個水晶球出嚟,對比一下。原來真係照住水晶球嚟整。



「你又知係畀我嘅?」我問

「你入去架火箭咪知囉」邦叔說

我就一步一步好小心咁踏入咗架火箭。啲燈自動開咗,無端端火箭入面慢慢咁播咗首歌-----分分鐘需要你,然後再仔細咁望,入面嘅機身貼滿咗好多嘅合照……合照入面都係一男一女,而女個個係我。

「蕭婥藍……」突然有把男人聲係個火箭入面,原來只是個廣播「係咪好靚……我見你呢排唔開心,所以就決定整呢架火箭畀你……願我會揸火箭 帶妳到天空裏 在太空中兩人住~~~ 當你唔開心嘅時侯,唔好屈喺心入面,要記住話畀我聽啊,因為我知道大家分分鐘都需要大家。眨下眼,我哋已經拍咗兩年拖啦。同你一齊嘅時光真係好開心,證明咗我哋係好夾!嚟啦!我哋要起飛啦!我會帶你到一個得我同你嘅世界!」

唔知點解,我喊咗出嚟。唔知係咪潛意識已經搵返啲回憶定只係被感動到喊。我再望望啲合照,從啲合照嚟睇,我同呢個男仔真係好恩愛。睇完啲相,好有溫暖,舒服嘅感覺。



我抹乾眼淚,然後走出來

「邦叔……多謝您………有機會嘅話…我會同豆釘仔講」我十分感動,眼淚又開始奪眶而出

「你開心就得啦」邦叔感到十分欣慰

之後,Mandy同我離開咗學校。

「點呀…有冇刺激你個腦啊」她問



「唔知……但係我依家對啊神呢個男仔有啲感覺」我說

「畀着我都有感覺啦……整架火箭畀你喎……我都感動啦」

「唔怪得啊諾話佢喊咗幾日」我慚愧地說

「如果我有啲咁好嘅男孩對我就好啦」她抱怨「話時話,個男仔咩樣架?」她好奇

「都幾靚仔」我遞了一幅合照給她看

我依家嘅感覺仲複雜過之前,依家我只係想親眼見到呢個男仔,然後真心想同佢講聲對唔住。同時,每次睇啲合照,都會微微一笑,感到好溫暖。唔通,啲記憶真係返嚟?