夢醒時份: 第二章

一日嘅運動量足以彌補一星期吸收嘅卡路里，又或者只係我自己太虧。

經過幾個鐘嘅運動，把全身肌肉耗至極點，今晚應該可以訓到個好覺。

**********************************************************

「咦！原來前日係夢入面見到嘅係佢，點解佢今日著嘅衫同我係夢入面見到一模一樣嘅。」我自己喃喃自語。

「早晨呀，咁多位！」





「今日我地早餐食邊間好？而家已經好肚餓。」

「冰，你尋日又打完波呀？使唔使叫間早餐大份D 嘅俾你補下呀？嘻嘻！」

「沙，我個樣有無咁虧呀？」

另一位同事答道：「冰，你個樣唔係虧，只係好少見你一返黎就話肚餓要食早餐。平時都係沙問食咩先嘅。」

「係喎！搶左最為食嘅人講嘅野添，唔好意思呀！」





沙即刻谷起個鰓，悶哼一聲：「你先最為食，快d 叫啦，唔係一陣無時間你食呀！你今日有in-house，一陣怕你無力走，我地今日都好忙未必幫到你，你好食飽D 啦。」

「OK！放心，我做唔晒嘅野唔會留俾你，但食唔晒嘅話會留返俾你。哈哈！」

沙扁住咀叫：「邊個會得閒食你食剩嘅野，你留返自己OT 宵夜啦！再唔嗌早餐，一陣黎到你都無時間食啦！」

**********************************************************

果然，俾沙個咒罵咒中，真係要OT。 沙執好自己嘅野臨走前行過黎。





做個好得戚嘅表情：「加油啦！雪櫃仲有份你嗌左未食嘅午餐等你今晚做宵夜！我走先啦。」

個一刻我只可以苦笑地回應：「多謝！」

係佢離開我個位行去搭電梯嘅背影，我更加肯定前日個夢一定同佢有關。

因為佢走嘅姿勢同情景係一模一樣，只係夢入面個景象比較模糊。

但呢一刻嘅我根本無時間去諗其他野，要快手做完所有野，唔係連訓覺嘅機會都不是屬於我的。

幾經辛苦，終於做好晒手頭上嘅野，拎住自己盒飯返屋企。

係地鐵入面，我嘗試回憶到底前日個夢究竟係點，但好支離破碎，淨係記得沙離開嘅最後一個畫面。

我係度諗我究竟應唔應該同佢講我前日夢到佢，仲要夢到佢今日著嘅呢一套衫。





然後一首歌係我耳邊響起：

「才離開沒多久就開始　擔心今天的妳過得好不好 整個畫面是妳　想妳想的睡不著」

但願我並無呢種感覺。。。

<續>