夢醒時份: 第四章

「艾彌沙！...」一個尖叫將我自己從夢中扎醒，原來又係夢入面見到沙。

雖然我同沙編入做同一個項目，但大家都各自係自己嘅工作枱到做自己野，真正嘅交流仍然好少。或者可能等到個項目正式啟動嘅時候，我地先會有更多嘅交流。

今日返到公司見到有時間睇下個項目嘅資料，然後走去搵沙同佢傾一下入面嘅工作。

「沙，你而家得唔得閒呀？我頭先望左下份job，有野想問下你。」

「冰，無問題呀，我尋日都已經睇左下大慨有咩野。」沙笑住答。





我驚訝呆滯左一陣。

「嘩！咁快！我見到呢份job 要分開外國同香港兩份資料黎做，不如我做外國個部分，你做香港個部分？」

沙好奇地問：「外國個部分多過香港喎，不如平分啦？」

「唔緊要嘅，都唔係差太多姐，如果有個人做兩邊嘅話唔小心撈亂左資料就麻煩，我怕我自己會咁。」我伸脷傻笑。

沙嫣然一笑：「咁又係，你有時都幾大懵，無問題呀。」





「車，我幾時大懵過呀，係一次有份job 唔記得提印度個邊交快D 俾你姐。」

沙半帶忿怒地:「你都記得呢！個次搞到我俾個客係咁催犒！總之，個次之後你就係大懵！超大懵！」

「OK！你贏啦，差你一餐飯啦。」

「咦！黎緊書展喎，沙你有無興趣去行下？」

「都有呀，不過好多人會好迫喎。」





「一係搵日唔使OT 嘅時候一齊去行下？」

「無問題，就下個禮拜啦，下個禮拜應該無咁忙。」

「OK！我買左飛就通知你。」

放左工，我whatsapp 沙：「沙，去書展個日你想食左飯先去定行完先食？我睇下使唔使留位。」

沙：「行完先食啦？早D 行無咁迫，同埋行到累之後食野特別滿足架。」

我：「哈哈！咁行完先再睇食咩啦。」

沙:「:)」

仲有一個禮拜我就同沙第一次出去，我沒有興奮卻有不知所措嘅感覺。雖然唔係第一次約女仔，但對住呢個女仔嘅感覺總係莫名其妙怪怪地。





<續>