簡介

身邊有冇朋友話自己見到靈界事物,如果有,唔好羨慕佢,亦唔好當佢傻唔睬佢,因為見到唔係一件開心事,佢本身都係受害者。。。。。。



各位好,相信每個人都經過童年,我都唔例外,不過我諗我所經歷過嘅同你哋會有唔同,因為我自細就見到同感受到另一個空間景物,即係你哋所講嘅靈界。初時以為人人都見到,就毫無忌諱咁同人講,點知就俾父母話我亂講,唔準再講,講一次打一次,漸漸認知到其他人原來見唔到感受唔到,為免俾人排斥,覺得我有問題,所以一直都冇再同人講我見到嘞,但之後受到靈界滋擾,大病左一場,好番之後就再感應唔到喇,直到。。。。


“阿俊,返黎攞輪椅去3B5號床推人去物理…….”對講機傳來主管全叔的命令

“收到,而家由藥房攞藥去緊OT,之後返黎…..”

呀,我唔記得自我介紹,我叫凌思俊,現職慈愛醫院中央支援組中級支援助理,其實即係醫院跑腿,8小時工作時間內不斷接ORDER,推床,推車,推輪椅,除左食飯時間同中間飲水去廁所有得抖,就不斷咁做做做,做到收工,冇法啦,學歷唔高,自然要勞力搭夠…….

講下講下,推住架藥車去到OT大門之際,迎面而來果個女人,好似係公認叫做現世女天師果位女風水師郭紫盈,望真D原來真人比上電視仲靚女,佢越行越近,擦身而過果陣……..




“啊呀!?咁嘅?呢度係….”忽然身處一片白茫茫空間,再望下自己又係全身發光,我有D以為自己發緊白日夢……..

“你唔係發緊夢,亦唔需要驚,呢度係光陰天,屬天界三十三天最高層次,係你原本嘅地方,你有通靈力量,就因為你由呢度而來,屬於呢度,亦代表左你嘅使命………”一段信息就咁進入我意識裡面,唔係聲音,四周圍一片寧靜…..

“使命?我有咩使命?”腦裡面諗極都唔明有咩要做….

“你有通靈能力,自然要為靈界辦事,協助接頭人守護六道平衡……”



“接頭人?哦…哦……但係我已經再見唔到果D….”其實我心裡面都係一舊雲…….

“而家只係等你有個準備,接頭人遲D會幫你解開封印,再話你知點做,就咁啦…….”

我定一定神,眼前變番醫院OT門前,自己推住架藥車㩒鐘等開門,所有野都冇變,好似時間停左又行番一樣,只係覺得好似冇左一D記憶咁…………….

“阿俊!!爽手啦!!成2個字都未返嚟!!CALL你又唔應機,啱啱3B病房姑娘又追call喇!!死去邊度蛇呀你!?~~” 對講機又傳來全叔怒吼

“十分鐘!?我啱啱到OT門口咋~”我不甘被屈,立即反駁



“唔好再講大話喇!!快D搞掂返黎啦!!” 全叔再次怒吼~~

“得喇,而家入去,轉頭即刻返黎~~”隨住OT大門打開,我推住藥車入去,交收之後離開,推住空車轉出走廊果陣,突然惑覺全身寒左一寒。。。。

“咁嘅?噢!!”隨即推住車嘅雙手開始不斷咁震,仲越震越犀利,開始連對腳都不斷震,企都企唔穩。。。。

“哦..哦..哦..哦..哦..命..命..命..命…~~” 我坐左落地,全身係咁震,想求救都講到囗齒不清。。。

“同事。。你見點呀?” 有3位男女,睇制服好似係姑娘,男護士長同醫生見到我咁樣就急步行過黎,姑娘行埋黎㩒住我手腕。。

“Pulse180…” 姑娘望了望男護士長

“同事你之前有冇試過發羊吊?...”男護士長見我震住咁搖頭,跟住望向醫生…..

“Pulse咁快,先SEND去A&E穩定左先,等照BRAIN CT再FOLLOW….”醫生再望了望護士長



“A&E,有急症,有冇同事可以推床過來OT前走廊……係…….ok…….”護士長攞起內線手提電話講左一陣…….

“A&E話忙到踢哂腳,冇人得手推床過黎……DR 張,咁…..”男護士長望左望醫生…..

“凌思俊!!你仲唔返黎係咪唔想撈?應我機呀!!....”對講機又傳來全叔怒吼~

“同事,借來用用….”男護士長隨即攞起對講機回應….

“唔好意思,請問同事你係咪CS嘅IC呀?...”

“我係,先生你係?....”全叔有D疑惑咁問

“我叫輝SIR,係骨科病房護士長,你同事懷疑發羊吊全身不斷咁震,而家喺OT前走廊,要送去A&E,但果便冇人得閑,想你幫忙揾同事去A&E推張床過來,同時收番架手推車番去,我地會叫A&E準備好,你派同事去就得架喇…..”



“下?!咁大件事呀…..哦…….好啦,咁麻煩你喇輝SIR,我會安排人去㗎喇……”

“A&E,我係神經外科DR.張,我想你地安排一張MON床同O2……”醫生同一時間攞起電話…….

“唔…..咁我再諗諗…….OK……”

“DR.張,A&E果邊有問題?”輝SIR見DR.張面有難色……

“A&E啱啱收左幾個TA重傷者,個個駁緊命,冇人得閒SETUP……”

“咁輝SIR幫我TAKE CARE同事先,我過去SETUP…”一直喺我身邊果位姑娘呢個時候企起身……

“你唔記得我啱啱考左A&E專科護士牌咩?”

“係渦!咁麻煩你嘞ANNlE….”



“輝SIR,咁都唔記得你點做人老公㗎?” 望住ANNlE背影,DR.張拍了輝SIR背脊一下……..就喺呢個時候,我開始支持唔住,失去知覺................
已有 0 人追稿