英雄同盟戰: 2.招賢納士2

「阿德~！你覺得呢件點呀？」

misa著住雪白色既婚紗，顯得格外華麗


「嗯...都ok丫...」阿德好似心不在焉



「喂呀~比啲反應好喎！」misa叉起雙手





「依家係我地結婚呀，你唔好咁hea得唔得呀！」


「知啦...」

阿德捉緊misa既肩膀:「misa，你係世界上最靚既女人黎，著咩都咁靚啦」


「嘻..算你啦！」





misa望住鏡中既自己同阿德:「咁...就呢件啦好唔好呀？有啲喱士幾可愛丫！」


「嗯，就咁話啦」


阿德口中說好，心裏卻想

「唉....點解我果陣會咁傻仔應承佢結婚架....」





「結左婚，等於呢一世都比misa食住呀...佢咁貪錢，我啲錢實全部比佢拎哂啦」



阿德同misa因一次意外而成為盜賊，以偷竊為生

為IID成功搶下超級電腦Archangel後，金盤洗手




九龍半山club one






「衛小姐，你地睇下張菜單有冇問題」


「阿德你睇下~」

misa將婚宴菜單交到阿德手上


「嘩...一圍都成萬蚊.....」

阿德心入面已經滴汗:「菜單冇問題既，不過...駛唔駛60席咁多呀？」


misa笑道:「依家我地結婚呀，排場緊係越勁越好啦」





「阿德你讀大學實識好多人啦，到時請哂佢地黎啦！」


「吓...我本身同佢地都唔熟，而且畢左業咁耐....」


「叫你搵就搵啦！最緊要就多人，人情都收得多啲嘛！」

misa繼續保持自己貪錢既性格:「到時呀，邊個比唔夠一千蚊人情，即刻趕佢走！」


「唉...救命呀....」

阿德心想:「啲大學同學畢左業都冇聯絡啦...當年我又同公司反左面...無理由到時全場空凳咁柒掛...」







兩人及後離開會場，走到街道上


「係喎！！姊妹我都未搵喎！」

misa驚叫:「等我駛駛聲叫返以前啲舊同事先，阿德你都快啲搵班朋友黎做兄弟呀！」


「...係.....」



「請問...」





一個身材魁梧既男子走到兩人面前

「兩位係咪就係，林保德先生同衛美莎小姐呀？」



「無錯..不過我地好似唔識你喎...」misa皺眉道



「唔緊要，我地都係第一次見姐，我叫花仔榮」

花仔榮拎出執照:「我係IID軍隊，PAZ既成員之一，今次黎...係搵你地傾合作既」


「又係IID....」

「無興趣呀！」misa拉住阿德走開:「我地夠錢洗架啦，唔使合作，阿德我地走！」



「不過..我知道哂你地啲野喎」

花仔榮奸笑道:「100次以上地鐵內盜竊，都夠你地坐幾年監啦」


「我...都唔知你講乜！」

misa一回頭，就見到花仔榮展示手機上

阿德同misa響地鐵入面偷野既影片！



「你....」

「嘿，咁你依家明啦，衛小姐都唔想你地個婚禮泡湯掛」


「...我明白啦...咁即係我地點都要同你地合作啦」

阿德無奈道



misa捉緊阿德:「阿德呀！今次IID又唔知會比咩麻煩我地架！」



「misa..依家我地冇得揀....」

阿德道:「至少..我唔想我地兩個要坐監」

==============================================


同日晚上，東京世田谷區，若林家宅


「你知道世上有多少個男人嗎？35億，加5000萬人」


「哈哈哈哈屹屹屹屹屹屹屹屹！！！！！」

睇住電視上既搞笑藝人表演，食住薯片既rina笑得開懷


「刷...刷...刷....」

而rina既丈夫智也，卻正響大廳拖地


「喂！一陣先拖啦！你阻住我睇電視呀！」



「...哦....」

「唉..放左工都仲要拖地...」智也輕聲抱怨


耳朵靈敏既rina一聽到，大叫

「你講咩話？！」


「冇野....」



曾勇破印度外長暗殺事件既特工rina，調到東京IID分部後與智也相戀

結婚後過住少奶奶既生活




「係喎，聽日我返香港搵阿玲佢地呀，間屋你自己睇啦」

rina兇狠地望住智也:「你唔好諗住我唔響度，你就可以去搵其他女人呀！」


「知啦....」


面對極品惡妻rina，智也完全失去日本男人應有既尊嚴



「叮噹」


「邊個呀...老公去開門啦！」rina指點智也去開門

「哦....」



「咔！」


「請問..」


「智也！！！若林智也！！！！！！」

門前既奈央見到智也，歡喜大叫


「係...奈央？！你唔係去左香港IID分部咩？」智也同時亦吃驚


「說來話長啦...今次我係以IID秘密軍隊PAZ成員既身...」



「喂，搞乜咁嘈呀，睇緊電視架！」

rina走出玄關，望到奈央:「你...乜水呀你？」


「你好呀若林太太，我叫奈央，係IID秘密軍隊PAZ既成員...」

「同時都係...智也以前既同事黎呀」


眼見打扮嫵媚既奈央，rina既危機感馬上提升


rina將智也拉到一邊:「老公，係咪真架？！佢真係你前同事？」


「當..當然啦..」

智也心想:「你咁好打，我緊係唔敢偷食啦...」


「咁...阿奈央小姐，今次你黎打搞我地係咩原因呢？！」rina既言語雖友善，但當中卻露出殺氣


「我地已經請示左東京IID當局，佢地表示智也你可以過黎我地呢邊啦」


「你地..呢邊？」

「嗯，PAZ既獨立部門.....」


===========================================


旺角.某女僕cafe


「主人一齊跟我做魔法丫！moemoeQ~~~~」

身穿粉紅色女僕服既小櫻，帶住毒男顧客做出恥力極高既魔法


響dse公開試後，小櫻繼續佢響女僕cafe既兼職工作

樣子甜美可愛既小櫻亦成為店鋪最受歡迎既女僕


而cafe關門後，小櫻亦完成一整日既工作


「嘻，就黎儲夠錢去日本搵takuya bb啦！」

小櫻懷住愉快既心情，離開店鋪



「小櫻！」

薰姐姐早已於樓下等待小櫻


「薰姐姐！唔好意思呀，因為鋪頭閂左門之後都要執頭執尾」小櫻連忙道歉


「唔緊要，我都唔係黎左好耐姐..行啦」

「嗯！」




油麻地某後巷


「嘿嘿，你地呢啲死貓，一日到黑嘈住哂，等我斬哂你啲手手腳腳啦！」

「喵~~喵~~！」

貓咪不停反抗，但未能擺脫變態狂徒強而有力既右手



「停手！！！」

兩個身影從狂徒身後閃出


「就係你呢個衰人，之前響呢一帶殺死啲貓貓！」

此兩人正是小櫻同薰姐姐，兩人早已換上英雄式既制服，並戴上面具




幾日前，老友記茶餐廳



「油麻地再有流浪貓被虐待至死....」電視機正播住新聞報導


「點解呢個世界會有啲咁既衰人傷害貓貓架！真係過份」

小櫻放低手上既飯碗，怒道


「係囉，虐待動物既都好冇人性呀！」

薰姐姐忽發奇想:「小櫻，既然你地慕容家係英雄家族，不如我地...」

「就做super hero，專去捉啲虐待動物既衰人丫」


「好呀！我唔會放過果啲傷害小動物既人架」








「你地乜水呀！我點對啲衰貓關你地撚事！」

狂徒雙手各持一把小刀，拔足衝向兩人


「我地幪面雙俠，係唔會比你傷害貓貓架」

小櫻以靈活既走動方式，輕鬆避過斬擊


「就等我地，將你好好制裁！」

薰姐姐右手拉後集氣

「皇極驚世拳第一式，破天！」


拳頭擊中前，拳風已經將狂徒轟至十米外



「薰姐姐...你好犀利呀！」小櫻眼見敬佩道


「哈哈..只係啲皮毛野黎姐..只要打到佢重傷昏迷就得啦」

薰姐姐摸住頭道:「咁，我地快啲綁起佢啦」



「！！！」

小櫻同薰姐姐同時感覺到

後面有人


「邊個！」

兩人同時轉身，擺出攻擊勢態



此人以純正廣東話開口

「你地就係慕容春櫻小姐、以及杜雪薰小姐啦？」

「放心，我唔係警察，無惡意既」

街燈剛好影照住此人日式既俊俏臉孔



「你係....？」薰姐姐問

「我叫拓也，係國際情報機構，簡稱IID既獨立軍隊PAZ既成員之一」



「係...係..」

小櫻卻一時間比唔到反應:「係takuya bb？！！！！」

拓也既容貌，竟跟小櫻日思夜想既樂隊主音takuya一樣！



「嗯？」拓也皺一皺眉:「雖然拓也既日文的確係takuya，但係..我之前應該未見過你架喎」

「不過今次黎搵你地，係有另外一個目的」


「想請你地加入，獨立部隊『Troopers』」


==================================================


「首領，我係拓也，慕容春櫻同杜雪薰都搞掂啦」


「嗯...咁即係香港呢度，就只有石至磊一個因為唔響香港而搵唔到」

「依家，就只差果兩兄弟啦」