行出房門口先知, 原來我係間大屋入面, 間屋兩層高, 有個兩個藍球埸咁大左右, 左右盡頭同中間都有一條樓梯行落下面果層, 裝飾似係好古舊既風格, 途經都有好多間房咁, 但全部都關晒門

「呢隻game個背景你應該都有睇過嫁? 係古舊魔法年代, 所以唔好期望啲野會好靚同好方便呀」

Alice突然咁講, 好似發現左我周圍望黎望去, 跟住佢又話「呢度係我地測驗員GameX入面既屋, 亦都係我地既儲存點, 每次登出同登入都係同一個地方」

「其他隊員已經出左去買物資啦, 今日就由我負責帶你去體驗下呢個世界同呢度一啲基本既資料啦」

「嗯」我好簡單咁回應





一直都覺得入到呢個虛擬世界, 感覺應該好似去旅行咁, 但我眼前呢一刻既感受實在太震撼!

一行出屋既門口, 係一條好大既村落...每間屋都唔會高過三層, 成條村都比好高既樹木包圍住, 目測都有二三十米高.

就咁睇, 條村應該係分唔同區域去做唔同既事, 好似我一出門口附近既屋, 大部份都係吉屋, 同埋同我住緊果間係好相似...

「係啦, Alice, 呢度咁靜既...係咪全部player就係呢度生活?」

「你咁講都無錯, 如果係對外開方的話...但依家得我地呢班人, 所以唔會有其他玩家, 周圍咁靜都好合理, 不過係呢度先咁靜咋! 行返出去城市中心就好旺嫁啦~」





「咁...仲要行幾耐先到?」

「好快啦, 我地住得先近出口, 五分鐘內就到」

一路行出去都無咩特別, 沿途都係差唔多一式一樣既屋...直到行出去見到個城市之後...

「嘩......................................................」我真係擘大個口得個窿

「點呀? 係咪好大呢? 跟住我行唔好盪失路呀!」





「咁我地依家係去邊?」

「想唔想學點用魔法? 依家就帶你去學」

作為一個機迷, 我既答案一定係好想...入黎呢度唔單止係想體驗呢個系統, 呢個世界! 更加想既就係去玩! 去打機!

「想! 快啲教我!」

「哈哈~~~你睇下你個樣急到! 笑死我」Alice一路笑一路行

呢個女仔真係咩都可以笑一餐

呢個世界簡單講就係分左四個大城市, 同一個中央城, 而中央城就係所有玩家一開始既地方, 而四個城市分別係東, 南, 西, 北四面. 每一個城都有一座塔要去攻陷過關, 每個都唔同層數唔同關卡, 絕對有挑戰性! 而且有分小關同王關, 打贏亦都會跟據難度同貢獻度分配獎勵...

四邊唔同既大城市都有獨立而且特別既風格, 而且有唔同特性, 而果四大城分別係 ---





東邊 蓬萊仙島 - 東島

南邊 天然之都 - 南都

西城 火炎山脈 - 西山

北邊 冰封帝國 - 北國

中央 魔法之城 - 中央市


「打爆機即係要打晒四座塔先叫做爆左機?」突然咁問, 令到Alice係講解緊歷史入面抽離返出黎

「呀...現時既情報無錯的話就係既, 但打贏都唔係咁易, 雖然話挑戰係無限, 但我地生命有限! 無人會想用死去換取關卡情報...」





「咁講返我地個進度比你知啦, 之前同Steve佢既傾過, 由東島開始打起, 最後先去打北國, 但我地發現實力唔夠再打上一層, 所以就停留左係東塔中段層數, 然後轉去南邊再打...同樣地去到中層已經好吃力, 所以我地再轉南都果邊開始打上去」

「有樣野值得同你講下, 每次去唔同既城市, 大家都會因為天氣同環境而令到自身有提升或者弱化. 舉個例, 火火一開始係東都果時, 連練習魔法都覺得力不重心, 打東塔更加係無表現, 最後Steve發現, 火火係戰鬥型既體格, 體內既暗藏屬性係火, 所以對住水屬性為主既怪物會效果減半, 亦都印證左呢個世界係存在屬性相克既理論」

「明白...我會留意嫁啦, 咁你地依家打到去邊呀?」一時間太大資訊量, 都唔知講咩回應好

「打到四個城既中層位置, 依家主要係東島果邊練習同埋活動, 你記唔記得你岩岩黎果一日, 我地就係打緊中層通往中上層條路果隻王關boss...好彩有杰仔係度, 如果唔係應該打唔贏」Alice又諗返起果一日危險既情況...

「好! 講左咁多大概都知道既! 快啲交我等我快啲練習, 我都要幫你地出一分力!」

「Ok! 行啦!」







 
已有 0 人追稿