[新手上路] 真係做得出刀劍神域入面果種VR?: 24. 欲速則不達

記住! 要用心去感受四周環境既元素, 吸收再集中埋一點, 集中! 集中! 集中! 
我內心不段重複呢個句子

「我唔得啦...點解好似點吸收都係咁樣, 跟本就同之前無任何分別, 點集中都只係吸收到啲元素, 跟本就做唔到元素集中呢樣野...唉」我好灰咁自言自語, 「唔通我係撞彩咁快上手, 而唔係天才」難得開左個靚頭, 心情小不勉都會興奮, 但又估唔到咁快就卡住左

半日既過去...杰仔係好遠處行緊過黎大嗌「喂~ 劍仔你練成點呀?」

「點呀點呀? 試黎望下去到咩程度先」杰仔過到黎我身邊之後講

我望住杰仔, 嘆左一口氣「唉...我諗我之前都係撞彩, 誤以為好易就做到吸收同控制, 原來係咁難」





杰仔聽到之後, 拍一拍我膊頭「黎! 跟我去一個地方」

我唯有跟住去, 反正當下我都無咩可以做到

行左唔洗一陣, 杰仔就講「到啦, 係呢度」然後佢指住草原既一個位置

而佢指住果個位就係我第一次Alice帶我去果度, 亦係我好快掌握到點吸收元素果度

「呢度咪我第一次黎Kasa果時Alice帶過我黎...佢仲話...」我都未講完杰仔又打斷我講野





「咁佢一定有同你講呢度係全個城市最中間果一點, 就係呢度 - 中央草地」杰仔繼續指住果度

「我知呀, 我岩岩都係呢度嘗試去吸收周圍既元素, 但點吸都好啦...都係咁樣樣」我一路講一路搖頭

「咁你既然知道中央草地係最多元素既地方, 咁不如你話我知你係點樣去吸收元素?」 杰仔咁問我相信佢出於關心

「其實我都係感覺到有啲微風包圍住我, 之後有股暖流流入全身咁, 我相信呢啲就係元素所形成既魔力」我都係講個感覺出黎

「嗯...咁你覺得流入你身體既元素有咩感覺, 同埋你儲存啲元素係咩位置?」杰仔再問





突然比佢咁問起, 我又真係無諗過呢個問題...

「umm...應該係似一種能量, 需要果時先集中去相應位置?」其實我都係估

「放心! 劍仔, 你唔係無天份, 你只係用錯方法姐...Alice又係既, 講啲唔講啲...」杰仔行遠我少少既位置, 好似想準備示範啲野咁

杰仔企係正係中央草原最中心果點, 舉起右手, 合埋眼, 右手一握實拳頭, 突然附近既風都變成有形態一樣, 向住杰仔身邊轉動

依家既杰仔望落去, 就好似一個比風保護住既人一樣, 外面有一層薄薄既護盾, 不停圍住杰仔轉動, 形狀不規則, 雖然啲望落透明, 但又好似係微微既綠色咁, 真係唔打得都睇得, 呢刻既我幾想拜佢為師

「嘩......」係...除左個「嘩」字, 我係諗唔到其他字可以講

「劍仔! 呢個就係風元素最基本可以形成既形態, 不停咁流動就係風既特性」





突然杰仔右手再一fing, fing向某一個地方, 所有既風好似受到指示咁衝向同一個方向, 同一時間我都感受到好大既風力扯左我向佢指住既果一邊...好西利

「劍仔! 呢個就係風元素最基本可以控制既模式, 你想用佢係咩地方都可以」

點解杰仔可以由吸收元素到轉化為魔力既速度可以快成咁...我諗我明白點解佢地話杰仔三個月就已經上晒手

突然杰仔又再出招, 佢踎低用左手撳落草原上, 一塊石牆就由地面好咁速咁伸左出黎, 大細都有兩度房門咁大咁高, 我相信呢個就係杰仔既防禦魔法...不竟杰仔都係可以操控三種元素既老手

「劍仔! 呢個就係地元素常用既防禦手段, 但你要靈活將唔同種類元素瞬間做到吸收, 切換再轉換係十分困難同需要練習」杰仔好認真咁講

然後佢再話「就好似火火, bobo佢地咁, 連自己基本元素都未去到最熟練既階段, 更加唔好話感應埋其他屬性元素, 所以最好就係搵左第一種適合自己既元素, 然後作為基礎慢慢練習上去, 終有一日你都會練到爐火純青既境界」

好型...我諗在埸有女既話都應該比佢溝晒

係我沉醉於J緊杰仔既英姿同時, 佢講左呢句說話令我清醒返





「睇黎今日有必要教晒你唔同屬性既特質」