當我同王胤瀅再一次見返佢媽媽嘅時候,已經唔再係屋企,而係一間公立醫院。
 
 
王胤瀅嘅媽媽瞓咗係病床上,臉無血色,口插住喉,好似話係呼吸系統已壞。
 
 
原來,王媽唔係一個已死之人,但係一個將死嘅人。
 
 


「佢係幾日前送嚟醫院嘅,不過一直都無人探佢。」醫院嘅姑娘咁同我哋講。
 
 
王胤瀅企係房病門口好耐好耐,都唔敢入去睇佢,淨係隔住窗望住佢。
 
 
直到我話:「唔通嚟到都唔入去?見一面都好。」我一手推咗佢入病房。
 
 
王媽媽大槪感到有人嚟,微微張開眼睛,左望右望。


 
 
當佢發現係王胤瀅,眼睛即刻掙大,好激動咁,好似離床而逃。
 
 
「媽⋯⋯係我呀。」王胤瀅開口講。
 
 
當知道王媽媽未死嘅消息後,王胤瀅即刻去搵佢爸爸,佢爸爸先一五一十將所有嘢講晒出嚟。
 


 
所謂嘅謊言與真相。
 
 
原來當年,並唔係王媽媽拋棄佢哋,而係王爸首先搭上咗內地公司嘅女職員,自己外遇在先,但王媽媽並無諗住離開哩個家。
 
 
作為一個女人,可以點,只好繼續忍落去。
 
 
只係女職員,亦即係後來嘅後母,踩場踩到上嚟,上到嚟屋企搵王媽媽:「你老公就肯定要我架啦,我勸你都係死咗條心佢啦,佢唔會要返你㗎。」
 
 
「個女都肯定跟佢,咁你想你個女日後有好日子,我對佢好嘅話,不如趁佢未懂事就走啦。」
 


 
佢逼走王媽,逼王媽講到係佢拋棄王胤瀅,等王胤瀅唔洗掛住佢,唔會再對佢有牽掛。
 
 
但王媽係每時每刻都好掛住王胤瀅,即使去咗遠地工作。
 
 
所以無論係畢業定返學,佢都會返嚟出席,不過要係最遠嘅位置去祝福佢女兒。
 
 
「如果想你個女生活好啲,讀好嘅學校,不如你做人阿媽都出一份錢啦。」
 
 
後母又咁樣,哄王媽每個月都交一筆錢出嚟,話係對王胤瀅供書教學嘅一啲津貼。
 


 
一個女人獨力生存已經好唔容易,再加上佢每個月都畀緊錢後母,名義上嘅生活費,所以王媽嘅生活一直都唔係咁好,喺外地打工都只能夠住最平嘅樓。
 
 
今次返嚟,唔知係咪知道自己時日無多,而且王媽知道佢地已經同王胤瀅講自己死咗,所以同佢哋協議好,用鬼魂嘅方式,默默咁係背後守護住佢返學。
 
 
哩段日子都係咁樣過佢嘅生活,用佢嘅方式守護佢個女。
 
 
「媽咪,妳要捱落去呀,我仲未還返欠妳嘅債㗎⋯⋯」
 
 
王媽媽勉強咁笑住,點點頭。好似係應承緊王胤瀅咁。
 


 
哩次係王媽媽最後一次笑。
 
 
王媽同王胤瀅嘅相處時間,唔夠一日,王媽就撒手人寰。