《我係窮郵差，專門幫陰陽相隔嘅親人送信》（書局上架中）: 46

 
 
我哋坐咗係圖書館，陳教授講：「你上之講完，我就忍唔住嚟搵你，因為我真係好掛住我前妻。」
 
 
「睇嚟陳教授都對你前妻一往情深，係個好老公。」
 
 
「無錯。我真係好愛我老婆，MANDY架。」
 


 
陳教授係天之驕子，係人哋心目中嘅人生贏家。
 
 
陳教授係出身係小康之家，爸爸係公務員，媽媽係律師。自細對佢嘅教育都好好，好用心咁裁培佢。無論係彈琴、算數定空手道。
 
 
所以入名校同外國嘅一流大學都係無難度。
 
 


陳生同佢老婆係大學時認識，因為兩個人都係成績最好嘅學生，所以爭得勢成水火，同時因此認識大家。
 
 
有時係陳教授拎到奬學金，有時MANDY拎到奬學金。
 
 
亦敵亦友嘅關係，亦係識英雄重英雄。
 
 
陳生開始欣賞哩個成日同佢爭成績嘅人，留意佢上堂會揀嘅科，佢發現哩個女仔特别對語言嘅科目有興趣，會成日揀法文、德文哩啲科目去讀。


 
 
「其實試下語文科都無壞嘅⋯⋯」
 
 
陳生咁諗，開始揀一啲佢唔熟悉、唔係佢專長嘅科嚟讀，為咗嘅係同MANDY讀同一個科。
 
 
不過都只係同學嘅關係，陳生一直都唔敢同MANDY講啲咩嘢。
 
 
直到一次去美國交流嘅機會，係畀成績最好嘅人，就造就陳生同MANDY機會一齊。
 
 
去美國好多時候都可以自由活動，MANDY係一個好鍾意去博物館嘅人，就問陳生：「你去唔去？⋯⋯一齊嚟睇？」


 
 
陳生一直都唔係一個好識講野嘅人，所以成程都無乜對話內容，佢都知死定。
 
 
去到海馬前，陳生就問：「妳知唔知道海馬⋯⋯」
 
 
「我知，係雄性嘅大肚架嘛。」
 
 
話題又畀佢講咗。
 
 
「咁妳仲知唔知⋯⋯海馬男係追女仔嘅時候，會變色仲會跳舞。」


 
 
MANDY哈哈大笑咁話：「哩個真係未聽過⋯⋯」佢撓一撓頭髮，行近陳教授身邊問：「咁你追女仔嘅時候又係點？」
 
 
佢哋兩個人之間嘅距離突然去到好近。
 
 
陳生只係覺得成身都好熱，亦唔識答哩條問題。