《我係窮郵差，專門幫陰陽相隔嘅親人送信》（書局上架中）: 57

 
佢有啲疑惑咁拎出手機畀我。
 
 
「妳而家瞓喺張床度，放鬆。」
 
 
我叫佢除鞋同埋多餘嘅衫，然後較大個冷氣。
 
 


「喺妳瞓咗無耐之後，我就會一同嚟。」
 
 
「真係？」
 
 
「如果妳信我嘅話。」
 
 
「⋯⋯我信你。」佢食咗粒藥後，臨瞓前問：「你成日都咁帶人落去？」


 
 
「我無試過呀。」
 
 
「無試過你又識？」佢奇怪道。
 
 
「因為⋯⋯」
 


 
係⋯⋯點解我會識？
 
 
印象中好似試過⋯⋯咁到底係有定無？
 
 
「咁嗰對門係咩嚟？」佢指一指我間房嘅一對黑色大門、英式風格，同唐寧街十號、英國首相官邸對門好相近，黃帶封喺門上，滿佈塵積。
 
 
「係以前哩個部門嘅郵差用，用嚟通去陰間。」
 
 
「咁點解我哋唔用哩對門去？」
 


 
「因為⋯⋯哩對門之後發生故障，去咗就十死九生，所以我哋係唔會用。」
 
 
我回答緊佢時，佢已經溫溫鄧鄧，極想瞓咁，果然佢好快就已經瞓著咗。
 
 
等佢大概瞓咗四個鐘之後，係啱啱好十二點。
 
 
我開始捉住佢隻手，然後唔夠兩分鐘，我都沉睡喺夢中。
 
 
黑色⋯⋯
 


 
喺夕陽嘅光照下，小棧道殘影處處，王胤瀅就企喺路旁，一直凝望天空，個樣好沉醉。
 
 
佢一見到我嚟，就好似見返親人咁，好驚訝。