《我係窮郵差，專門幫陰陽相隔嘅親人送信》（書局上架中）: 97

 
「唔想跑呀。」
 
 
我懶洋洋咁瞓喺度，完全唔想郁。
 
 
「咁・陪．我．呀！」佢一嘢拖咗我落地下。
 
 


我真係好廢，連阿妹哩啲咁手無摶雞之力嘅人都拉得郁我。
 
 
「你跑唔跑㗎？」
 
 
「跑囉⋯⋯」
 
 
阿妹每日都會落樓下個公園跑1個鐘步，據佢講係因為做完運動後會比較有精神溫書，結果就變成咗習慣，每日持之以恆。


 
 
而我每日持之以恆嘅就係瞓覺，有時都幾羨慕佢。
 
 
「叫你做下運動都好似要你死咁。」
 
 
「我跑兩個圈就夠。」
 


 
「喂喂喂唔得呀，我跑幾多你跑幾多。」
 
 
「唔洗，我兩個圈就夠。」
 
 
「你就想⋯⋯」
 
 
當我哋行緊去運動場，路上吵吵鬧鬧時，我突然收到一個WHATSAPP，我以為係見工嘅通知，當然立即打開，係一個陌生嘅短訊：「有無興趣做郵差？」