「吓!咁我哋咁早返嚟做咩?」
 
 
「你唔係估唔到呀。」大叔深深咁飲一啖酒之後話。
 
 
佢又拉咗我去一樓一。
 
 


「阿萍呀,畀返上之嗰個女仔佢呀。」
 
 
「小雨呀?無問題。」萍姐又向我單眼,我全身不禁打咗一個冷震。
 
 
「大叔⋯⋯我真係唔需要啦。」
 
 
「唉,男人之家婆婆媽媽,入就入啦。」


 
 
結果我又同小雨同一間房。
 
 
死雞蟲⋯⋯
 
 
究竟郵差同叫召妓有咩關係。
 


 
「⋯⋯又係你呀?」
 
 
「哈哈⋯⋯係呀⋯⋯」
 
 
「做唔做呀今次?」
 
 
「呃⋯⋯我哋不如傾下計⋯⋯」
 
 
我想將注意力放喺間房嘅環境上面,但我發覺咁樣仲唔好,因為間房啲氣氛有啲怪。
 


 
「你想點啫~」佢咯一聲笑出嚟。有咩好傾呀我哋,我妓女嚟㗎咋。」
 
 
「不如我哋探討,你係點解會會會從事哩種輔助性工作⋯⋯?」
 
 
小雨點起一枝煙,噴出雲霧淡煙:「你唔係對我有興趣嘛?」
 
 
「少少啦⋯⋯啊,我係指你嘅身世。」
 
 
佢又再次笑到啲煙周圍噴,我唔明有咩咁好笑,未見過人講錯嘢咩。
 


 
「有頭髮邊個想做哩行呀⋯⋯」
 
 
小雨開始同我講佢嘅故事。
 
 
小雨早婚,老公大佢六年,佢哋屋企一直一家三口都生活得好愉快,老公喺馬會做,收入都OK,所以屋企尚叫小康之家。
 
 
「我想買樓。」
 
 
生咗BB之後,佢哋兩公婆見住老公嘅同學開始有錢,買得起樓同車,參觀完一個同學喺貝沙灣嘅屋後,就開始覺得自己住嘅地方⋯⋯
 


 
以前都唔覺,而家覺得好唔靚,唔夠大⋯⋯唔夠豪華。
 
 
「明明小陳嗰隻嘢都只係IVE畢業咋嘛,點會買得起貝沙灣而我買唔起。」完咗夫妻間激情之後,佢老公瞓喺佢隔離,有啲不忿咁講。
 
 
「唔緊要⋯⋯我知你叻咪得囉。同埋我哋又唔一定要住貝沙灣㗎嘛。」小雨摸摸佢心口,安慰道。
 
 
然後無幾耐,佢老公自殺。