「大叔,我想問一句⋯⋯你都去到陰間?」
 
 
佢無理我,拎咗個枕頭出嚟。
 
 
「我哋瞓埋喺同一個枕頭上面就得。」
 
 


「吓唔係嘛?咁GAY?」
 
 
「邊度GAY呀?」
 
 
「我死到唔肯㗎啦。」
 
 
兩秒後我已經同大叔瞓埋一齊,近到行多前少少就可以KISS到佢。


 
 
佢已經扯晒鼻鼾。我仲聞到佢極大陣啤酒味,聞到都想嘔。
 
 
只係過多兩秒後,我都瞓咗。
 
 
當我到咗陰間時,佢已經喺夕陽棧道等緊我,手中仍然喺棒住啤酒喺度咕嚕咕嚕咁飲過唔停。佢一見到我嚟到,就伸一伸佢個啤酒懶腰。
 


 
「你對陰間應該唔陌生啦。」
 
 
「都算係嘅,不過我第一次嚟哩個位置⋯⋯好似係⋯⋯之前⋯⋯」我個頭又有啲痛,諗唔起先前嘅嘢。
 
 
而佢表情話我知,佢有啲驚訝。
 
 
「做咩咁望住我?」
 
 
「果然⋯⋯」佢口嗡嗡咁。
 


 
「做咩?」
 
 
「無⋯⋯咁你對陰間認識有幾多,知唔知佢存在嘅目的係乜嘢?」佢問。
 
 
「係⋯⋯人死後去嘅地方。」
 
 
「啱一半,大部分人死後的確會嚟哩度,不過陰間並唔係人生嘅終點站。」