教授捻起枱上面一疊疊案件嘅紙張:「第二點奇怪嘅地方係,唔少死者嘅家人都聲稱,死者自殺前並冇任何情緒低落或者遇上啲咩困難,反而係⋯⋯幾開心添。呢樣就令人更加困惑。」
 
 
「咁奇怪?」記者話:「好多時自殺嘅人都係因為佢地遇上一啲困難或者係佢哋嘅內心⋯⋯唔開心但無人幫到佢地佢哋先會選擇自殺呢條路,從未聽過因為開心所以去自殺㗎啵。」
 
 
「無錯,所以我地都可以判斷,呢次咁大量出現嘅自殺案件,絕對唔係平時咁普通嘅事,當中一定有啲因由。」教授咁樣講:「如果搵唔出呢一個原因,好可能呢個自殺潮會繼續落去。」
 
 


節目去到尾聲嘅時候,我房門忽然敲響。
 
 
「你好⋯⋯我係嚟⋯⋯寄信。」一個短頭髮嘅女仔入咗嚟,靦腆咁講。
 
 
「我叫Maggie,今年⋯⋯廿九歲。」
 
 
Maggie嘅爸爸喺兩年前過咗身。


 
 
「係我心裏面一直有個秘密,好想同佢講,但一直都講唔出口。結果佢就過咗身。所以我想藉哩封信同佢講返哩件事。」
 
Maggie有一個阿哥,一家四口其實幾幸福。
 
 
兩個仔女都出咗身,自然兩老都可以享下福。
 
 


Maggie都係一個聰明又可愛嘅女仔,喺四年前就已經結咗婚,佢阿哥仲早啲,喺五年前就結咗,大家婚姻都算美滿,夫妻間仍然相敬如賓。
 
 
只不過,兩老一直都好想抱孫,無奈佢哋兩個一直都生唔出。
 
 
「我爸爸一直都以為,係我嘅身體問題,所以媽咪成日都會煲啲藥膳畀我飲。又會叫我老公食多啲生蠔。」
 
 
「真係好體貼嘅父母。」
 
 
「但咁樣係無用。」
 
 


「喔?」
 
 
「因為⋯⋯」Maggie望一望手上嘅戒指話:「根本就唔係身體嘅問題⋯⋯」