《我係窮郵差，專門幫陰陽相隔嘅親人送信》（書局上架中）: 129

 
王胤瀅打電話畀我。
 
 
電話另一邊，傳嚟佢嘅哭泣聲，佢一路喊一路話：「喂⋯⋯」
 
 
當我趕去到醫院，王胤瀅同一個女人坐喺張凳上。
 
 


嗰個女人低頭抱面絕泣，而王胤瀅坐喺佢側邊陪住佢，仲有兩個警察喺身邊，拎住筆喺度記錄嘢。
 
 
王胤瀅見我嚟咗，都無過乜嘢，淨係點點頭，我睇到佢嘅雙眼通紅。
 
 
「妳無事嘛？」
 
 
「爸爸唔喺度啦⋯⋯」


 
 
當我收到佢電話嘅時候，聽到呢個消息，都有啲唔係太相信。
 
 
雖然話王胤瀅自嗰一件事之後，一直都唔鍾意佢爸爸，但始終都係佢親生嘅爸爸。
 
 
「冇可能，冇可能㗎⋯⋯」王胤瀅嘅後母一邊搖頭一邊講：「佢前幾日一直都好開心⋯⋯點會無啦啦自殺呢。」
 


 
我突然之間諗起，新聞報道呢排自殺嘅人，其中一個奇怪疑點就係，事發前睇落好開心。
 
 
警察繼續喺度問：「佢無任何嘅地方睇落唔尋常？」
 
 
「無⋯⋯真係一啲都唔無⋯⋯」王胤瀅嘅後母忽然好似諗起啲咩，成個人定咗一定。
 
 
警察都好敏銳，即刻追問「你係咪諗起啲咩啊？」
 
 
「佢⋯⋯好似話佢見返前妻⋯⋯發夢嘅時候。」王胤瀅嘅後母補充：「我一直都以為佢係講笑，所以冇當係啲乜嘢。」
 


 
王胤瀅瞪大眼睛望住佢媽咪，然後驚恐咁望住我。
 
 
見返前妻⋯⋯？
 
 
「好呀，唔該晒你，有啲咩想再補充我哋再搵你哋。」
 
 
送走警察之後，王胤瀅就拉我去醫院走廊嘅另一邊，一個媽咪聽唔到嘅地方。
 
 
「你係咪接過我爸爸嘅案件？」佢皺眉抿嘴話：「你又話唔可以帶人落去嘅⋯⋯」
 


 
「我⋯⋯我無呀，我哩排根本無帶過人去陰間。」
 
 
「咁但係我爸爸點會話喺夢中見返我媽咪？哩個唔係去咗陰間係乜嘢？」佢越講越激動，淚水已經流到成臉都係。
 
 
「我⋯⋯」
 
 
「雖然我好憎佢咁樣對媽咪，但佢始終都係我爸爸呀。」
 
 
我好似解釋乜嘢都無用，王胤瀅已經認定咗係我做嘅事，即使我解釋佢都唔會聽得入耳。
 


 
我都係將嗰一句唔係我做嘅收返入口，由得佢發泄就算。
 
 
「對唔住⋯⋯」
 
 
「我想靜下，Sorry⋯⋯」佢望住地下講。
 
 
我遞上紙巾畀佢，懸喺半空，佢無接受。
 
 
「咁今晚，我⋯⋯」
 


 
「今晚就咁算啦。」
 
 
「好⋯⋯」
 
 
步出醫院嘅時候，唔知點解好似失去咗一啲嘢咁，心裡面好唔舒服。