「我就當我從來都無仔女!反正同無都一樣!」
 
 
佢好激動咁樣將碎片扔落地下,踐踏多兩腳。
 
 
「我開始明白點解Maggie佢哋兩個會唔敢同你講,佢哋真正嘅性取向。」
 


 
「你咩嘢意思,唔通你覺得佢哋好馨香呀?乜面都無晒啦而家!」佢紅臉中青筋暴露。
 
 
「名聲緊要定你同仔女嘅感情重要?」我忍唔住大聲講。
 
 
佢稍為冷靜一啲,我繼續追話:「如果你有用心咁去讀封信,我相信你會明白,你個女好勇敢同善良⋯⋯如果你稍為有嘗試去明白,就知妳嘅掙扎同痛苦有幾大。」
 
 


佢面上嘅青筋漸退。
 
 
「始終都係兩父女。」
 
 
佢開始鬆一口氣,想伸手執返封信時,有一把男聲從後而置。
 
 
「咁又唔係,我明白大叔你點諗。」


 
 
阿龍。
 
 
「又唔係望子成龍,望女成鳳,只係想仔女正常孝順,又有邊個理過大叔作為父親嘅感受?」佢慢慢行過嚟講。
 
 
「阿龍⋯⋯你點解喺度?」
 
 
「你都喺度啦,所以我咪喺度。」
 
 
我望住大叔,佢開始猶豫起嚟。


 
 
「喂⋯⋯你唔好搞到佢⋯⋯」
 
 
阿龍好認真咁話:「我真係咁諗,講到好在乎父親,咁又唔見佢哋為咗父親改變?」
 
 
「阿龍!」我拉開佢去另一邊,遠離大叔嘅屋企,由佢自己決定。
 
 
我哋行喺河邊,我話:「上次多謝你幫咗我哋。」