但從佢神色嚟睇,顯然,哩個唔係阿龍想要嘅答案
 
 
阿龍帶我走到上一個山坡,坡後有一個狹谷,下面係不見底嘅深淵,我好好奇點解佢會帶我嚟哩度。
 
 
「阿亮,其實我真係幾羨慕你。」佢望住下面講。
 
 


「我有啲咩咁值得你羨慕?」我失笑問。
 
 
「擁有嘅一切,知唔知道⋯⋯喺靈薄鎮嘅人,唔會有將來,佢哋唔會有下一站,只能一世都喺度,所以先會可以四周圍咁去。」
 
 
佢開始喺度講一啲,好沉重嘅嘢。
 
 
「由細到大,我都唔明,點解爸爸媽媽會咁憎我,對啊我拳打腳踢,會寧願遺棄我。


 
 
點解人哋可以喺一個幸福嘅家庭長大,自細就有好嘅教育,學好多嘢,去外國一流嘅大學。
 
 
我就連飽飯都無。
 
 
點解會咁唔公平。
 


 
最後,我終於知道,所有嘢都係整定,人間萬事生死順逆,都由生死簿決定。
 
 
由你一出世,父母家底,已經決定你將來嘅路,人間一切並唔係偶然,每件事都係有原,係必然發生。」
 
 
「你唔覺得咁樣好荒謬咩,咁人生仲有咩意思,人同機械人咪一樣?」
 
 
咁又如何⋯⋯我都已經經歷咗,所以我先唔明白你嘅自由⋯⋯點解你會有⋯⋯你自己嘅自由,可以跳脫生死簿外。」
 
 
阿龍嘅情緒,唔見有啲咩變化,唔似嬲又唔似動氣。
 


 
大家都無再講嘢,我再仔細去思考細味阿龍啱啱所講嘅嘢。
 
 
忽然間我有啲唔明⋯⋯
 
 
「阿龍,點解⋯⋯你會知道⋯⋯我個腦受傷?」