《我係窮郵差，專門幫陰陽相隔嘅親人送信》（書局上架中）: 148

 
「陰間？真係有哩樣嘢？點解我哋從來都唔知嘅？」
 
 
「死咗嘅親人喎！新聞報道咪話好多人都係見過自己死咗嘅親人囉！證據完全吻合！幾肯定哩件事都係關郵政局事㗎啦！」
 
 
「郵政局職員死全家！」
 
 


網上嘅力量非常龐大，好快地我畀人起咗底，矛頭直指我哩個職員身上，所有人都認為係我搞到咁多自殺嘅人出現。
 
 
我的地址、電話、讀嘅學校，基本上所有個人嘅資料都俾人哋起晒底，放晒上網。
 
 
 
「哩條友嘅媽咪同細妹，都係唔見咗，會唔會係咁因為所以報復社會？」
 
 


「有無人會幫佢叫外賣？呢排Pizza Hut好似幾好食。」
 
 
睇完哩啲留言，我終於明白點解我會電話會響過不停。
 
「亮仔，你要小心啲呀。而家全世界都認定你就係兇手，唔知佢地會做啲乜嘢，你真係要小心啲啊！」
 
 
呢一刻，我個腦好亂，完全諗唔到啲乜嘢。
 


 
「知道啦娟姐，唔該晒你嘅通知。」
 
 
同娟姐收咗線之後，行出街我都覺得每一份每一秒有人監視住我。
 
 
首先，網上面流傳嗰一份文件，普通人根本沒可能拎得到，哩一份係機密嘅文件，可以肯定係郵政局內部流出。
 
 
究竟係邊一個流出來？
 
 
第二個問題係，點解偏偏係哩一個時候呢？自殺潮嘅時候？
 


 
最終問題都係，究竟自殺潮點解會發生？
 
 
「你⋯⋯你⋯⋯」一個16、7歲既男仔，用疑惑嘅眼神望住我，手上面拎住電話，電話的熒幕開住一個post，正正就係我畀人起底個post。
 
 
街上面望住我嘅人越嚟越多，仲有個走埋嚟，搭住我膊頭話：「你咪就係嗰個郵差？」
 
 
「你認錯人啦！」
 
 
 
我fing佢隻手，一枝箭咁樣衝咗返屋企。


 
 
我好似比全世界通緝咁樣。
 
 
而家目前唯一能夠做，就係搵局長解釋返件事。